އިންޑިއާގެ އިރުމަތީ ބިހާރު ސްޓޭޓްގެ ލަޚީސަރާއި ޑިސްޓްރިކްޓްގައި ހުންނަ އާސާރީ ”އަޝޯކް ދާމް“ ފައްޅީގައި ހިނގި ނުރައްކާތެރި ފިއްތުންގަނޑެއްގައި (ސްޓޭމްޕީޑް) މަދުވެގެން 7 މީހުން މަރުވެ، 12 އަށްވުރެ ގިނަ މީހުން ޒަޚަމްވެއްޖެއެވެ. މި ހާދިސާ ހިނގާފައިވަނީ ހިންދޫންގެ އަޅުކަމުގެ މޫސުމެއް ކަމަށްވާ ”ޝްރާވަން“ މަހުގެ ތިންވަނަ ހޯމަ ދުވަހުގެ ހެނދުނު ވަގުތެއްގައި އެހެން ދުވަސްތަކަށްވުރެ ގިނަ އަދަދެއްގެ މީހުން އަޅުކަން ކުރުމަށް ފައްޅިއަށް ޖަމާވެފައިވަނިކޮށެވެ.
ލަޚީސަރާއި ޑިސްޓްރިކްޓް މެޖިސްޓްރޭޓް ޝައިލެންދުރަ ކުމާރު ބުނި ގޮތުގައި، ހެނދުނު 6:30 އެހާކަންހާއިރު ކައިރީގައިވާ ރޭލު ސްޓޭޝަނަށް ދެ ރޭލު މަޑުކުރުމާއެކު، ފައްޅިއަށް ވަންނަން އޮތް ކިޔޫއަށް ކުއްލިއަކަށް ގިނަ އަދަދެއްގެ މީހުން އެއްވިއެވެ. ގިނަ އަދަދެއްގެ މީހުން އެއްވުމުގެ ސަބަބުން ކިޔޫގެ ސެކިއުރިޓީ ބެރިއަރެއް ހަލާކުވެގެން ދިޔައެވެ. އަދި އެ ސަރަހައްދަށް ކަރަންޓު ދަނޑިއެއް/ނަރެއް ވެއްޓި ކަރަންޓުގައި ޖެހިދާނެކަމުގެ ބިރުވެރިކަން އުފެދި، އާންމުން ކުއްލިއަކަށް އެކި ދިމާތަކަށް ދުއްވައިގަތުމުގެ ތެރޭގައި އެކަކު އަނެކަކު ގަޔަށް ވެއްޓި، ފިއްތުންގަނޑު އުފެދުނެވެ.
ފުލުހުންނާއި އެމަޖެންސީ ޓީމުތަކުން ވަގުތުން ހާދިސާ ހިނގި ސަރަހައްދަށް ގޮސް، ޒަޚަމްވި މީހުން ލަޚީސަރާއި ސަދަރު ހޮސްޕިޓަލަށް ވަނީ ގެންގޮސްފައެވެ. މަރުވި މީހުންގެ ތެރޭގައި ގިނައީ އަންހެނުންނެވެ. ބިހާރުގެ ސަރުކާރުން ވަނީ މި ހާދިސާއާ ގުޅިގެން ތަޢުޒިޔާ ފޮނުވައި، ޒަޚަމްވި މީހުންނަށް އަވަސް އެހީތެރިކަން ފޯރުކޮށްދިނުމަށް އިރުޝާދު ދީފައެވެ.
