”ފްރެންޑް 4“ ނަމަކަށް ކިޔާ ސަޕްލައި ދޯނި ބަންޑުން ޖަހާލުމުގެ ސަބަބުން ގެއްލުނު ތިން މީހުން ހޯދުމަށް ހިންގާ ސާޗް އެންޑް ރެސްކިއު އޮޕަރޭޝަނުގައި ހަރަކާތްތެރިވި އެމެރިކާ އަސްކަރިއްޔާގެ މަތިންދާބޯޓަށް ވެސް އެ މީހުން ހޯދުމުގެ މަސައްކަތް ނާކާމިޔާބުވެއްޖެއެވެ.
މި މަހުގެ 6 ވަނަ ދުވަހުގެ ރޭ 10:20 ހާއިރު ހިނގި މި ހާދިސާގައި ގެއްލިގެން ހޯދަމުންދަނީ އެ ދޯނީގެ ކެޕްޓަން މުހައްމަދު ހަމްދޫންގެ އިތުރުން، އެހީތެރިކަން ފޯރުކޮށްދިނުމަށް ދޯންޏަށް އެރި ސަލާމަތީ ބާރުތަކުގެ ދެ އޮފިސަރުން ކަމުގައިވާ އެމްއެންޑީއެފް ފަޔަރ އެންޑް ރެސްކިއު ސަރވިސްގެ ސްޓާފް ސާޖަންޓް އިބްރާހިމް އަޙުމަދާއި، މޯލްޑިވްސް ޕޮލިސް ސަރވިސްގެ ސާޖަންޓް ޢަލީ ނާފިއުއެވެ.
މި ހާދިސާގައި ގެއްލުނު މީހުން ހޯދުމަށް އެ ދޯނި އަޑިދިޔަ ސަރަހައްދުގެ މަތިން އެމެރިކާގެ ނޭވީގެ ”ބޮއިންގް ޕީ-8އޭ ޕޮސައިޑަން“ މަރުކާގެ މެރިޓައިމް ޕެޓްރޯލް މަތިންދާބޯޓެއް އިއްޔެ ވަނީ ހަރަކާތްތެރިވެފައެވެ. ފްލައިޓް ރާޑާގެ މައުލޫމާތުތައް ދައްކާގޮތުން، މި މަތިންދާބޯޓު ދަތުރުކޮށްފައިވަނީ ރާއްޖޭގެ ވައިގެ ސަރަހައްދުގެ ގާތްގަނޑަކަށް 1،500 ފޫޓު ތިރިން، މީހުން ހޯދުމުގެ އޮޕަރޭޝަން ކުރިއަށްދާ ސަރަހައްދުގެ ސީދާ މަތިންނެވެ. މި ހާދިސާ ހިނގިތާ 10 ދުވަސް ވެފައިވާއިރު، އެމްއެންޑީއެފްއިން ހުކުރު ދުވަހު ބުނީ އެ ދުވަހުގެ ހަވީރު 18:00 އާ ހަމައަށް ވައިގެ މަގުން 9,920 އަކަ ނޯޓިކަލް މޭލު އަދި ކަނޑުމަގުން 2,790.10 އަކަ ނޯޓިކަލް މޭލުގެ ސަރަހައްދެއް ވަނީ ބަލައި ފާސްކޮށްފައިވާ ކަމަށެވެ.
އެމްއެންޑީއެފުން މައުލޫމާތު ދިން ގޮތުގައި، މި ހާދިސާ ހިނގި ވަގުތުން ފެށިގެން އިންފްރާރެޑް ސެންސަރު އެކުލެވޭ ޔޫއޭވީ ޑްރޯން ބޭނުންކޮށްގެން، ކަނޑުމަތިން އޮޔާދިޔަ ބައެއް ތަކެއްޗާއި ބައިތައް ވަނީ ދެނެގަނެވިފައެވެ. މީގެއިތުރުން، ކޯސްޓްގާޑް ޝިޕް އިމާދުއްދީނާއި، އިންޓަސެޕްޓަރ ކްރާފްޓްތަކުގެ އިތުރުން ހާބަރ ޕެޓްރޯލް ލޯންޗާއި ފުލުހުންގެ ލޯންޗު ބޭނުންކޮށްގެން ގއ. އަތޮޅާއި ލ. އަތޮޅުގެ ފަރުތަކާއި ހުވަދޫ ކަނޑު އެއްކޮށް ވަނީ ބަލައި ފާސްކޮށްފައެވެ.
އެމްއެންޑީއެފްއިން އިތުރަށް ބުނީ ދޯނި އަޑިއަށް ގޮސްފައިވަނީ 1,600 މީޓަރަށް ވުރެ ފުން ސަރަހައްދަކަށް ކަމަށެވެ. މިއީ އަސްކަރީ އަދި ނިއުކްލިއަރ ސަބްމެރިންތަކަށް ވެސް އޮޕަރޭޓް ކުރެވޭ މިންވަރަށް ވުރެ މާ ފުން ސަރަޙައްދެއްކަން އެމްއެންޑީއެފުން ފާހަގަކުރެއެވެ.
