ސްޓޭޓް ފާމާގެ ހިދުމަތްތައް މިހާރަށްވުރެ ބޮޑަށް ފުޅާކޮށް ހަރުދަނާކުރުމަށްޓަކައި އިތުރު ފާމަސިސްޓުން ބޭނުންވާ ކަމަށް އެ ކުންފުނީގެ މެނޭޖިންގ ޑިރެކްޓަރު ޑރ. ޝާހް މާހިރު ވިދާޅުވެއްޖެއެވެ. ޑރ. ޝާހް ވިދާޅުވީ ކުންފުނީގެ ހިދުމަތްތައް ފުޅާކުރަން އަދިވެސް 100 އެއްހައި ފާމަސިސްޓުން ބޭނުންވާ ކަމަށެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ޑރ. ޝާހް ވަނީ، ބޭސް ދޫކުރުމަށް އެ ކުންފުނީގެ ފާމަސީތަކުގައި ތިބި ފާމަސިސްޓުންގެ އަދަދު މަދުކަން ފާހަގަކުރައްވައިފައެވެ. އޭނާ ވިދާޅުވީ، ފާމަސިސްޓުން ހޯދުމަށް އިއުލާނުކުރި ނަމަވެސް މާބޮޑު ތަރުހީބެއް އެކަމަށް ލިބިފައިނުވާތީ ރާއްޖެއިން ބޭރުން ފާމަސިސްޓުން ހޯދުމުގެ މަސައްކަތް ކުރަމުންދާ ކަމަށެވެ.
ދިވެހި ފާމަސިސްޓުން ތަމްރީނުކުރުމަށް މަސައްކަތްތަކެއް ކުރެވެމުންދާ ކަމަށާއި އެގޮތުން ރާއްޖޭގައި ހުރި ކޮލެޖް ޔުނިވަރސިޓީތަކާ ގުޅިގެން މި މަސައްކަތް ކުރުން ހިމެނޭކަން ޑރ. ޝާހް ފާހަގަކުރެއްވިއެވެ. މި މަސައްކަތުގެ ދަށުން ދިވެހިރާއްޖޭގެ ގައުމީ ޔުނިވަރސިޓީއާއެކު އެއްބަސްވުމެއް އެކުލަވާލުމަށް ތައްޔާރުވަމުންދާ ކަމަށް އޭނާ ވިދާޅުވިއެވެ.
”ކިހިނެތްތޯ އެކުދިންގެ ޝައުގުވެރިކަން މިކަމަށް ޖައްސާނީ. ކޯސް ނިމުނީމަ ވަޒީފާގެ ޔަގީންކަން ދިނުމާއި ތަމްރީން ވަމުންދާއިރު އަޅުގަނޑުމެންނާއެކު މަސައްކަތް ކުރެވޭނީ ކިހިނަކުންތޯއާ އިތުރަށް މިހާރު ތިބި ސްޓާފުންނަށް ތަމްރީން ދޭނެ ގޮތްތަކާ ގުޅެގޮތުން ވާހަކަދައްކަފާއި. މިފަދަ ތަމްރީން ދެ އިތުރު ތަންތަނާވެސް ބައްދަލުކުރާނެ.“ – ޑރ. ޝާހް މާހިރު ވިދާޅުވިއެވެ.
ޑރ. ޝާހް އިތުރަށް ވިދާޅުވީ ބޭސް ފޯރުކޮށްދިނުމަށް ކުރާ މަސައްކަތްތަކުގައި ފާމަސިސްޓުންނާއި ކްލިނިކަލް ފާމަސިސްޓުންގެ އިތުރުން ޑޮކްޓަރުންގެ ވެސް އެއްބާރުލުން ނުހަނު ބޮޑަށް ބޭނުންވާ ކަމަށެވެ. އަދި ފާމަސިސްޓުންނަަށް މިހާރު ދެމުންދާ މުސާރަ ވެސް އިތުރަށް ރިވިއުކުރަންޖެހޭކަން އޭނާ ފާހަގަކުރެއްވިއެވެ.
ސްޓޭޓް ފާމާއަކީ ރާއްޖެއަށް ބޭނުންވާ ބޭސް އެތެރެކުރުމުގައި ދިމާވާ ދަތިތަކަށް ހައްލެއް ހޯދުމަށްޓަކައި ސަރުކާރުން އަލަށް އުފެއްދި ކުންފުންޏެކެވެ. އެ ކުންފުނިން މިހާރު ދަނީ ރާއްޖޭގައި 193 ފާމަސީއެއް ހިންގަމުންނެވެ.
