ސައުތު އޭޝިއާ ޖަސްޓިސް ކޭމްޕޭން (އެސްއޭޖޭސީ) ގެ އިންޑިއާ ޕާސެކިއުޝަން ޓްރެކަރ ގެ އެންމެ ފަހުގެ ރިޕޯޓުން ދައްކާގޮތުގައި، 2026 ވަނަ އަހަރުގެ މެއި 1 އިން ޖުލައި 31 ގެ ނިޔަލަށް އިންޑިއާގައި މުސްލިމުންނާ ދެކޮޅަށް ހިންގި އަނިޔާވެރި ޓެރަރިޒަމްގެ ޖަރީމާތަކުގައި މަދުވެގެން 25 މުސްލިމުން ވަނީ ޝަހީދުކޮށްލާފައެވެ. މި ރިޕޯޓުގައިވާ ގޮތުން، 2026 ވަނަ އަހަރަކީ 2022 ގައި މި ޓްރެކަރ އުފެއްދި ފަހުން އިންޑިއާގައި މުސްލިމުންނާ ދެކޮޅަށް އެންމެ ގިނައިން ޤަތުލުޢާންމުތަކާއި ނަފްރަތުގެ ޖަރީމާތައް ހިންގި އަހަރަށް ވެގެންދާނެއެވެ.
ދައުލަތުގެ ބާރުތަކުން ދިން ޙަމަލާތައް (15 ޝަހީދުން)
ރިޕޯޓުކުރެވުނު 25 މަރުގެ ތެރެއިން 15 މީހުން ޝަހީދުކޮށްލާފައިވަނީ ފުލުހުންނާއި ސަލާމަތީ ބާރުތަކުން ހިންގި ”އެންކައުންޓަރ“ (ނަކަލީ ގޮތުން ރާވައިގެން މެރުން) ޙަމަލާތަކުގަ އާއި، ބަންދުގައި ބައިތިއްބައިގެން ދިން އަނިޔާތަކުގައެވެ. މިފަދަ ޢަމަލުތައް އެންމެ ގިނައިން ހިންގާފައިވަނީ އުއްތަރަ ޕްރަދޭޝް، އަސާމް، ކަޝްމީރު އަދި ވެސްޓް ބެންގާލްގައެވެ.
ހިންދޫ ހަރުކަށި ޖަމާޢަތްތަކުގެ ޙަމަލާތައް (10 ޝަހީދުން)
ހިންދޫ ހަރުކަށި ޖަމާޢަތްތަކުންނާއި ގޭންގުތަކުން ދިން ޓެރަރިސްޓު ޙަމަލާތަކުގައި 10 މުސްލިމުން ވަނީ ޝަހީދުކޮށްލާފައެވެ. މީގެ ތެރޭގައި 11 އަހަރުގެ ކުޑަކުއްޖަކާއި 16 އަހަރުގެ ކުއްޖަކުވެސް ހިމެނެއެވެ.
މީގެ އިތުރުން، ފާއިތުވި ތިން މަސްދުވަހު 23 އަށްވުރެ ގިނަ މިސްކިތާއި، 1,000 އަށްވުރެ ގިނަ މުސްލިމުންގެ ގެދޮރާއި ވިޔަފާރިތައް ވަނީ ސަރުކާރުން ބުލްޑޯޒަރު ބޭނުންކޮށްގެން ތަޅާލައި، ބިމާ ހަމަކޮށްލާފައެވެ.
