ފަރެސްމާތޮޑާއަށް ދިމާވެފައިވާ ޖާގައިގެ ދަތިކަމާއި ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން، އެ ރަށުން 18 ހެކްޓަރުގެ ބިން ހިއްކުމުގެ އަމަލީ މަސައްކަތް ރަސްމީކޮށް ފަށައިފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މި މަޝްރޫޢަކީ ޖުމްލަ 142.6 މިލިއަން ރުފިޔާގެ މަޝްރޫޢެކެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. މި މަޝްރޫޢުގެ ދަށުން 18 ހެކްޓަރުގެ ބިން ހިއްކުމުގެ އިތުރުން، ގޮނޑުދޮށް ހިމާޔަތްކުރުމަށްޓަކައި 620 މީޓަރުގެ ބޮޑުހިލައިގެ ރިވެޓްމެންޓެއް ޖެހުމަށްވެސް ވަނީ ހަމަޖެހިފައެވެ.
ކުރިން ވަކިން އޮތް ފަރެސް އަދި މާތޮޑާ އެއްފަސްކުރުމަށް ކުރީންވެސް ބިމެއް ހިއްކާފައިވީ ނަމަވެސް، އެ ދެ ރަށް އެއްކޮށް ގުޅުވައިނުލެވި ގާތްގަނޑަކަށް 15 ވަރަކަށް ހެކްޓަރުގެ ސަރަޙައްދެއް ހުސްކޮށް އޮތެވެ. އެހެންކަމުން މިހާރު ފަށައިގެން ކުރިއަށްދާ މަސައްކަތުގެ ދަށުން ހިއްކަމުން ދަނީ އެ ދެ ރަށް ދެމެދުގައިވާ ސަރަޙައްދެވެ. މި ބިން ހިއްކުމާއެކު ދެ ރަށް އެއްކޮށް ގުޅިގެންދާނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން ވިދާޅުވެފައިވަނީ ސަރުކާރުގެ އެންމެ ބޮޑު އަމާޒަކީ ރައްޔިތުންނަށް ދިމާވެފައިވާ ބޯހިޔާވަހިކަމުގެ ތަކުލީފުތަކަށް ލުޔެއް ހޯދައިދިނުން ކަމަށެވެ. އެގޮތުން ފަރެސްމާތޮޑާގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަށާއި، އިޤްތިޞާދީ އެކި ފުރުޞަތުތައް ފަހިކޮށްދިނުމުގެ ގޮތުން ބިން އިތުރުކޮށްދެއްވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.
އާބާދީގައި 2،000 އަށްވުރެ ގިނަ މީހުން ދިރިއުޅޭ ފަރެސްމާތޮޑާގެ މިހާރުގެ ބޮޑުމިނަކީ 44 ހެކްޓަރެވެ. މި މަޝްރޫޢު ނިމުމުން އެރަށަށް އިތުރުވެގެންދާ 18 ހެކްޓަރުގެ ބިމަކީ، ރަށުގެ ތަރައްޤީއަށާއި ރައްޔިތުންގެ ގެދޮރުވެރިކަމަށް ލިބިގެންދާނެ ވަރަށް ބޮޑު ކުރިއެރުމެކެވެ.
