ރައްޔިތުންގެ މަޖިލީހަށް ހުށަހެޅިފައިވާ މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލަކީ ރާއްޖޭން ބޭރުގެ ޓުއާ އޮޕަރޭޓަރުންނާއި އޮންލައިން ބުކިންގް ޕްލެޓްފޯމްތަކާއި ބޭރުގެ ޓްރެވަލް އެޖެންޓުންގެ އަތުން ޑެސްޓިނޭޝަން ޕްރިންސިޕަލް އުސޫލުން ޓެކްސް ނެގުމަށް މަގުފަހިކޮށްދޭނެ މުހިންމު ބިލެއް ކަމަށް ކިނބިދޫ ދާއިރާގެ މެންބަރު އަލީ އަޝްރަގު ވިދާޅުވެއްޖެ އެވެ.
ފޭސްބުކްގައި އަޝްރަގު މިއަދު ކުރެއްވި ޕޯސްޓެއްގައި ވިދާޅުވީ، ބައިނަލްއަގުވާމީ ޓެކްސް ނިޒާމުތަކުގެ މައިގަނޑު އަސާސަކީ ހިދުމަތްދޭ ފަރާތް ހުރި ތަނަކަށް ބެލުމުގެ ބަދަލުގައި އެ ހިދުމަތެއްގެ ބޭނުން ހިފާ ގައުމަކަށް ޓެކްސް ދެއްކުން ކަމަށެވެ.
ވިލާތުގެ އިއްތިހާދާއި ދުނިޔޭގެ ކުރިއަރާފައިވާ ގިނަ ގައުމުތަކުގެ ވެލިއު އެޑެޑް ޓެކްސް އަދި ޖީއެސްޓީ ނިޒާމުތަކުގައިވެސް އަމަލުކުރަމުން އަންނަނީ މި އުސޫލަށް ކަމަށާއި މި އިސްލާހުގެ ދަށުން، ރާއްޖޭން ބޭރުގެ އޮޕަރޭޓަރުން ޓެކްސް ނަގައި، ފަތުރުވެރިޔާ ހިދުމަތް ހޯދާ ގައުމެއްގެ ހައިސިއްޔަތުން ދިވެހި ދައުލަތަށް އެ ޓެކްސް ދައްކަންޖެހޭނެ ކަމަށް އަޝްރަގު ވިދާޅުވިއެވެ.
އަޝްރަގު ވިދާޅުވީ، މިހާރުގެ ހާލަތަށް ބަލާއިރު، ރާއްޖޭގެ ފަތުރުވެރިކަމުގެ ޕެކޭޖުތަކުގެ ބޮޑު ބައެއް ބޭރުގެ އެޖެންޓުން ވިއްކަނީ ރީޓެއިލް އަގުގައިކަމަށާއި ނަމަވެސް، ޖީއެސްޓީ މިހާރު ނެގެނީ ހަމައެކަނި ރިސޯޓުތަކަށް ލިބޭ ހޯލްސޭލް އަގުންކަމަށްވާއިރު މީގެ ސަބަބުން، ރާއްޖޭގެ ފަތުރުވެރިކަމުން އުފެދޭ އާމްދަނީގެ ބޮޑު ބައެއް ދިވެހި ޓެކްސް ނިޒާމުގެ ތެރެއަށް ނުވަދެ ބޭރުވެގެންދާ ކަމަށާއި މި ބިލުގެ ސަބަބުން އެ ހުސްކަން ފޫބެދިގެންދާނެ ކަމަށެވެ.
”ސާފުކޮށް ދަންނަވާނަމަ، މިއީ އަލަށް ތައާރަފުކުރާ ޓެކްސެއް ނޫން. ފަތުރުވެރިން މިހާރުވެސް އެ ފުރިހަމަ އަގު ދައްކަމުންދޭ. އަޅުގަނޑުމެން މިކުރާ ކަމަކީ، އެ ލިބޭ އާމްދަނީން ދައުލަތަށް ލިބެންޖެހޭ ހައްގު މިންވަރު ކަށަވަރުކޮށް، އެ ފައިސާ ބޭރުގެ ކުންފުނިތަކުގެ އަތުގައި ނުބަހައްޓައި ދިވެހި ދައުލަތުގެ ބަޖެޓަށް ޖަމާކުރުން“ އަޝްރަގު ވިދާޅުވިއެވެ.
އަޝްރަގު ވިދާޅުވީ މި ބަދަލުގެ ސަބަބުން އަގުތައް އުފުލިގެންދާނެ ކަމަށް ބައެއް ފަރާތްތަކުން ބުނި ނަމަވެސް، ރީޓެއިލް އަގު މިހާރުވެސް ނަގަމުންދާކަމަށެވެ އަދި މި އިސްލާހުގެ ސަބަބުން ވިޔަފާރީގެ މައިދާނުގައި ހަމަހަމަކަން ގާއިމުވެ، ދިވެހި އެޖެންޓުންނަށް ޓެކްސް ނުދައްކާ ބޭރުގެ ބޮޑެތި ޕްލެޓްފޯމްތަކާ އެއް ހަމައެއްގައި ވާދަކުރުމުގެ ފުރުސަތު ލިބިގެންދާނެ ކަމަށް ވިދާޅުވިއެވެ،
