ބޭރުގެ ޓުއަރ އޮޕަރޭޓަރުންގެ އަތުން ޖީއެސްޓީ ނެގުން ލާޒިމުކުރުމަށްޓަކައި، މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅައިފިއެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާއޫދެވެ. މި އިސްލާހުގެ މައިގަނޑު މަގްސަދަކީ ރާއްޖޭގައި ޑެސްޓިނޭޝަން ޕްރިންސިޕަލް ތަންފީޒުކުރަން ފެށުމާއެކު، އޮފްޝޯ ބުކިންގ ޕްލެޓްފޯމްތަކާއި، ރާއްޖެއިން ބޭރުގެ ޓުއަރ އޮޕަރޭޓަރުންނާއި ޓްރެވަލް އެޖެންޓުންނަށް ފޯރުކޮށްދޭ މުދަލާއި ހިދުމަތުން ޖީއެސްޓީ ނެގުމުގެ އުސޫލުތައް ގާނޫނުގައި ކަނޑައެޅުމެވެ. މީގެ އިތުރުން، ޓެކްސް ނިޒާމު ތަންފީޒުކުރުމުގައި ދިމާވާ ގޮންޖެހުންތަކަށް ހައްލު ހޯދައި، ރާއްޖޭގެ ޓެކްސް ނިޒާމު އިތުރަށް ހަރުދަނާކުރުން ވެސް މީގެ ތެރޭގައި ހިމެނެއެވެ.
މި ބިލުގައި ބަޔާންކޮށްފައިވާ ގޮތުގައި، މުދާ ފޯރުކޮށްދިނުމުގައި ޓްރާންސްޕޯޓްކުރުން ހިމެނޭ ހާލަތްތަކުގައި، އެ މުދާ ޓްރާންސްޕޯޓް ކުރަން ފަށާ ގައުމަކީ ރާއްޖެ ކަމުގައިވުން ނުވަތަ މުދާ ފޯރުކޮށްދޭ ފަރާތުން އެ މުދަލެއް ރާއްޖެއިން ލިބޭނެ އިންތިޒާމު ހަމަޖައްސާފައިވާނަމަ، އެ މުދަލެއް ބެލެވޭނީ ރާއްޖޭގައި ފޯރުކޮށްދޭ މުދަލެއްގެ ގޮތުގައެވެ. ހަމައެއާއެކު، ރާއްޖޭގައި ގާއިމުވެފައިވާ އެ ފަރާތެއްގެ ވިޔަފާރި ހިންގާ ތަނަކުން ފޯރުކޮށްދޭ ކޮންމެ ހިދުމަތަކީ ވެސް ރާއްޖޭގައި ފޯރުކޮށްދޭ ހިދުމަތެއްގެ ގޮތުގައި ބެލުމަށް މި ބިލުގައި ވަނީ ހިމަނާފައެވެ.
އިސްލާހުގައި ބަޔާންކޮށްފައިވާ ގޮތުގަިއ، ރާއްޖޭގައި ރަޖިސްޓްރީކޮށްފައި ނުވި ނަމަވެސް، ހިދުމަތް ދިން ވަގުތު ރާއްޖޭގައި ހުރި ފަރާތަކުން އެ ހިދުމަތެއްގެ އަމަލީ މަސައްކަތް ރާއްޖޭގައި ކޮށްފިނަމަ ނުވަތަ އެއީ ރާއްޖޭގައި ހުރި ނުއުފުލޭ މުދަލަކާ ގުޅުންހުރި ހިދުމަތެއްނަމަ، އެ ހިދުމަތެއް ބެލެވޭނީ ރާއްޖޭގައި ފޯރުކޮށްދިން ހިދުމަތެއްގެ ގޮތުގައެވެ. މީގެ ތެރޭގައި އިންބައުންޑް ޓޫރިޒަމް ޕްރޮޑަކްޓް ފޯރުކޮށްދިނުމާއި، އެފަދަ ޕްރޮޑަކްޓަކާ ގުޅިގެން ދޭ އެޖެންސީ ހިދުމަތްތަކާއި ބުކިންގ ހިދުމަތްތައް ވެސް ހިމެނެއެވެ.
މި އިސްލާހުގައި ޖީއެސްޓީ ނެގުން ލާޒިމުވާ ހާލަތްތަކުގެ ތެރޭގައި، ޓެކްސް ނެގޭ ހަރަކާތް ހިންގާ ދާއިމީ ވިޔަފާރި ތަނެއް ރާއްޖޭގައި ނެތް ކަމުގައިވިޔަސް، އިންބައުންޑް ޓޫރިޒަމް ޕްރޮޑަކްޓެއް ރާއްޖޭގައި ފޯރުކޮށްދިނުން ހިމަނާފައިވެއެވެ. އަދި މިފަދަ ޕްރޮޑަކްޓްތަކުން ޖީއެސްޓީ ނަގަން ފެށުމަށް ކަނޑައަޅާފައިވަނީ މި އަހަރުގެ އޮކްޓޫބަރު މަހުގެ އެއްވަނަ ދުވަހުން ފެށިގެންނެވެ. ބިލުގައި އިންބައުންޑް ޓޫރިޒަމް ޕްރޮޑަކްޓް ކަމަށް ބަޔާންކޮށްފައިވަނީ ރާއްޖޭގައި ފޯރުކޮށްދޭ އެކޮމޮޑޭޝަނާއި، ކެއިންބުއިމާއި، ދަތުރުފަތުރުގެ ހިދުމަތްތައް ހިމެނޭހެން ފަތުރުވެރިކަމާ ގުޅުންހުރި އެންމެހައި ހަރަކާތްތަކެވެ.
މި އިސްލާހުތަކާއެކު ދައުލަތަށް ލިބޭނެ ކަމަށް ލަފާކުރާ އާމްދަނީގެ އަންދާޒާއެއްވެސް ސަރުކާރުން ވަނީ ހާމަކޮށްފައެވެ. އެގޮތުން، އޮފް ޝޯ ބުކިންގ ޕްލެޓްފޯމްތަކާއި، ރާއްޖެއިން ބޭރުގެ ޓުއަރ އޮޕަރޭޓަރުންނާއި ޓްރެވަލް އެޖެންޓުންގެ އަތުން ޓެކްސް ނަގަން ފެށުމުން، ދައުލަތުގެ އާމްދަނީއަށް އަހަރަކު ގާތްގަނޑަކަށް 1.6 ބިލިއަން ރުފިޔާ އިތުރުވާނެ ކަމަށް ވަނީ ލަފާކޮށްފައެވެ.
