މި އަހަރުގެ ހިތްވަރު ދިނުމުގެ ގައުމީ އިނާމު 7 ބޭފުޅަކާއި ކުންފުންޏަކަށް ސަރުކާރުން މިއަދު ދެއްވައިފިއެވެ.
މި އިނާމުތައް ދެއްވީ، ގައުމީ ދުވަހުގެ މުނާސަބަތުގައި ހއ. އުތީމުގައި ބޭއްވެވި ރަސްމީ ޖަލްސާގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ހިތްވަރު ދިނުމުގެ ގައުމީ އިނާމު ލިބިވަޑައިގެންނެވި ބޭފުޅުން:
- ހައްވާ ލަތީފު، މުޝްތަރީގެ، ގއ. ދާންދޫ (އިސްލާމްދީނަށް ހޭލުންތެރިކަން އިތުރުކުރުވުމާއި ދީނަށް ހިދުމަތްކުރުމާއި ދީނީ އިލްމު އުނގަންނައިދިނުމުގެ ދާއިރާ)
- މުހައްމަދު ނަސީރު، ދަނބުގެ، ހދ. ވައިކަރަދޫ (ދިވެހި ބަހާއި އަދަބިއްޔާތުގެ ދާއިރާ)
- ކޮމާންޑް ސާޖަންޓް މޭޖާ އަބްދުﷲ ސައީދު، ހުޅުމާލެ (ދިވެހި ތާރީހުގެ ދާއިރާ)
- މުހައްމަދު އަހުމަދު، ވިނަރެސް 10 (ސިއްހީ ދާއިރާ)
- އަރުޝަދު އަހުމަދު، ފަހިވާ، ހއ. އުލިގަން (މުވާސަލާތާއި އިންފޮމޭޝަން ޓެކްނޮލޮޖީގެ ދާއިރާ)
- އާއިޝަތު ނައުރާ، ހ. ސީޓް (ކުޅިވަރުގެ ދާއިރާ)
- އިސްމާއިލް އަބްދުލްޣަފޫރު، ހ. އަރިހިޔާ (ވިޝުއަލް އާޓްސްގެ ދާއިރާ)
ހިތްވަރުދިނުމުގެ ގައުމީ އިމާދު ލިބިލެއްވި ކުންފުންޏަކީ އިމާރާތްކުރުމާއި އިމާރާތް ފަރުމާކުރުމުގެ ދާއިރާ އިން ބައިސަން މޯލްޑިވްސް ޕްރައިވެޓް ލިމިޓެޑަށެވެ.
މީގެ އިތުރުން ދިވެހިރާއްޖޭގެ ކުޅިވަރުގެ ދާއިރާއިން، ހާއްސަކޮށް ފުޓްބޯޅަ ކުޅުންތެރިން ތަމްރީނުކުރުމުގެ ރޮނގުން ދިވެހި ގައުމަށް އަގުހުރި ހިދުމަތްތަކެއް ކޮށްދެއްވާފައިވާތީ، ހިދުމަތުގެ ގައުމީ އިނާމު، ގ. އިލާ، އަލްމަރްހޫމް އިހުސާން ޢަބްދުލްޣަނީ (ސާންތީ) ގެ ހަނދާނަށް ވަނީ އަރުވައިފިއެވެ.
ގައުމީ އިނާމަކީ ދިވެހި ގައުމަށާއި މުޖުތަމައުގެ ލާބަ އާއި މަންފާއަށްޓަކާ ވަކިވަކި ފަރުދުންނާއި މަދަނީ މުއައްސަސާތަކުންނާއި ޖަމިއްޔާތަކާއި ޖަމާއަތްތަކުންނާއި ވިޔަފާރި އިދާރާތަކުން ދެމެހެއްޓެނިވި ގޮތެއްގައި ގައުމުގެ ތަރައްގީ އަށް ކުރާ މަސައްކަތްތަކުގައި އެ ފަރާތްތަކުން ހޯދާ ކުރިއެރުންތައް ބަލައިގަނެ، އެކަންކަމުގެ އަގުވަޒަންކުރުމުގެ މަގުސަދުގައި ރައީސުލްޖުމްހޫރިއްޔާ ދެއްވާ އިނާމެކެވެ.
ގައުމީ އިނާމުގެ ގޮތުގައި ދެނީ ޝަރަފުވެރިކަމުގެ ގައުމީ އިނާމާއި ހިތްވަރުދިނުމުގެ ގައުމީ އިނާމެވެ.
ޤައުމީ އިނާމަށް ބޭފުޅުން ހޮއްވެވީ، ރައީސުލްޖުމްހޫރިއްޔާ އުފައްދަވާފައިވާ ޤައުމީ އިނާމާބެހޭ ކޮމިޓީންނެވެ. ޝަރަފުވެރިކަމުގެ ޤައުމީ އިނާމުގެ ގޮތުގައި ރައީސުލްޖުމްހޫރިއްޔާ ދެއްވީ، ޝަރަފުގެ އައްޑަނައަކާއި، ޝަރަފުގެ ބެޖާއި، ހަނދާނީ ލިޔުމެކެވެ. ހިތްވަރު ދިނުމުގެ ޤައުމީ އިނާމުގެ ގޮތުގައި ރައީސުލްޖުމްހޫރިއްޔާ ދެއްވީ ހަނދާނީ ފިލައަކާއި، ހަނދާނީ ލިޔުމެކެވެ.
