ރާއްޖޭގެ ސިއްހީ ޚިދުމަތުގެ ފެންވަރު މަތިކޮށް، އާ ދާއިރާތަކުން ޚާއްޞަ ފަރުވާ ދިނުމަށް ކުރަމުންދާ މަސައްކަތުގެ ތެރެއިން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ވަނީ ބޮޑު ކުރިއެރުމެއް ލިބިފައެވެ.
We are proud to welcome back Dr. Hammad Adam, the first Maldivian Consultant Sub Specialist in Colorectal Surgery, to our team. His return marks a significant milestone in our journey towards providing exceptional healthcare. pic.twitter.com/yRE1RQeeZB
— IGMH (@igmhmv) August 13, 2026
އެ ހޮސްޕިޓަލުން ހާމަކުރި ގޮތުގައި، ކޮލޯރެކްޓަލް ސާޖަރީގެ ދާއިރާއިން ޚާއްޞަވި ފުރަތަމަ ދިވެހި ކޮންސަލްޓަންޓް ސަބް-ސްޕެޝަލިސްޓް ޑރ. ހައްމާދު އާދަމް މިހާރު ވަނީ އައިޖީއެމްއެޗުގެ މެޑިކަލް ޓީމާ އަލުން ގުޅިވަޑައިގެންފައެވެ.
މިއީ ރާއްޖޭގެ ސިއްހީ ނިޒާމަށް، ވަކިން ޚާއްޞަކޮށް އެޑްވާންސް ސާޖިކަލް ފަރުވާ ބޭނުންވާ ބަލިމީހުންނަށް ލިބިގެންދިޔަ ވަރަށް ބޮޑު ކުރިއެރުމެކެވެ.
ކޮލޯރެކްޓަލް ސާޖަރީއަކީ ހަޖަމުކުރާ ނިޒާމާއި، ގޮހޮރު، ފުރަމޭ، ޗިސްމޭ އަދި ބޮޑުކަމުދާ ނިޒާމަށް ދިމާވާ ނުރައްކާތެރި ބަލިތަކަށް އޮޕަރޭޝަންގެ މަގުން ފަރުވާދޭ ޚާއްޞަ ދާއިރާއެކެވެ. މީގެ ތެރޭގައި ގޮހޮރުގެ ކެންސަރާއި، ފުރަމޭގެ ތަފާތު ބަލިތަކުގެ އިތުރުން ހަޖަމުކުރާ ނިޒާމަށް ދިމާވާ އެކި ކަހަލަ އުނދަގޫތަކަށް ދެވޭ އެޑްވާންސް ފަރުވާތައް ހިމެނެއެވެ.
އައިޖީއެމްއެޗުން މަޢުލޫމާތު ދޭ ގޮތުގައި، ސާޖިކަލް ގެސްޓްރޯއެންޓްރޮލޮޖީގެ ދަށުން ކޮލޯރެކްޓަލް ސާޖަރީއާއި ހެޕަޓޯބިލިއަރީ ފަދަ އުނދަގޫ އޮޕަރޭޝަންތައް އެ ހޮސްޕިޓަލުގައި އަންނަނީ ކުރަމުންނެވެ.
އެހެންކަމުން، މި ދާއިރާއިން މަތީ ތަޢުލީމާއި ތަމްރީނު ހޯއްދަވާފައިވާ ދިވެހި ޚާއްޞަ ޑޮކްޓަރަކު ހިދުމަތަށް ނުކުމެވަޑައިގަތުމާއެކު، ގޮހޮރުގެ ކެންސަރު ފަދަ ބޮޑެތި ބަލިތަކަށް ރާއްޖޭގައި ތިބެގެން ފަރުވާ ހޯދުމުގެ މަގު އިތުރަށް ފަހިވެ، ބޭރުގައުމުތަކަށް ސަރުކާރުން ކުރަންޖެހޭ ބޮޑެތި ޚަރަދުތައް ސަލާމަތްވެގެންދާނެއެވެ.
މިއީ ރާއްޖެއަށް ބޭނުންވާ މުހިންމު ދާއިރާތަކުން ދިވެހި ޑޮކްޓަރުން ތަމްރީނުކުރުމަށް ކުރެވޭ މަސައްކަތުގެ ވަރަށް ކާމިޔާބު ނަތީޖާއެއް ކަމަށް ޞިއްޙީ ދާއިރާގެ މާހިރުން ބުނެއެވެ.
މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމް ވިދާޅުވި ގޮތުގައި، މަތީ ތަމްރީނުތަކަށްފަހު މިއަހަރު އެކަނިވެސް ދިވެހި 16 ޑޮކްޓަރަކު ވަނީ އައިޖީއެމްއެޗާއި ދަރުމަވަންތަ ހޮސްޕިޓަލުގެ ޚިދުމަތާ ގުޅިފައެވެ.
މީގެ ތެރޭގައި ނިއުރޯ އިންޓަވެންޝަނަލް ރޭޑިއޮލޮޖީއާއި ޕީޑިއަޓްރިކް ޑެންޓިސްޓްރީ ފަދަ، މީގެ ކުރިން ރާއްޖޭގައި ނެތް މުޅިން އާ ދާއިރާތަކުން ޚާއްޞަވި ސަބް-ސްޕެޝަލިސްޓުން ހިމެނެއެވެ.
ރާއްޖޭގެ ސިއްހީ ދާއިރާ އިތުރު ހަރުފަތަކަށް ގެންދިއުމުގެ ގޮތުން، އައިޖީއެމްއެޗްގައި ދާދިފަހުން ވަނީ ”ރޮބޮޓިކް ސާޖަރީ“ ގެ ޚިދުމަތް ފެށުމަށްޓަކައި ވާންޖެހޭ ތައްޔާރީތައްވެސް ފަށާފައެވެ.
ހެލްތު މިނިސްޓްރީން ބުނި ގޮތުގައި، މިފަދަ ޒަމާނީ ޚިދުމަތްތަކާއި ޤާބިލު ދިވެހި މާހިރުންގެ ސަބަބުން، ބޮޑެތި އޮޕަރޭޝަންތަކަށް ރާއްޖެއިން ބޭރަށް ދާންޖެހޭ ދިއުން ނިމުމަކަށް އައިސް، ރާއްޖޭގެ ސިއްހީ ނިޒާމަށް އިންގިލާބީ ބަދަލެއް އަންނާނެއެވެ.
