ފްރާންސާއި ހުޅަނގުގެ ބާރުތަކުން އިންސާނީ ޙައްޤުތަކާއި ބައިނަލްއަޤްވާމީ ޤާނޫނުތަކާމެދު ގެންގުޅެނީ ދެފުށްކެހެރި ”ބުހުތާނު“ ސިޔާސަތެއް ކަމަށް އީރާނުގެ ޚާރިޖީ ވަޒީރު ޢައްބާސް އަރާޤްޗީ ބުނެ ވަރުގަދަ ބަހުގެ ޙަމަލާތަކެއް ދީފިއެވެ.
އަރާޤްޗީ ބުނީ، ޣައްޒާގައި އިޒްރޭލުން ހިންގާ ޖަރީމާތަކަށާއި، އީރާނާ ދެކޮޅަށް ހިންގާ އުދަވާންތަކަށް ހުޅަނގުން ވާގިވެރިވުމުގެ ސަބަބުން، ދުނިޔެއަށް އިންސާނީ ޙައްޤުތަކުގެ ވަޢުޟު ބުނުމުގެ ”އަޚުލާޤީ ބާރު“ ހުޅަނގުން މުޅިން ގެއްލުވާލާފައިވާ ކަމަށެވެ. އަދި ފްރާންސުން ދުނިޔެއަށް އިންސާނީ ޙައްޤުތަކާމެދު ނަސޭހަތް ދިނުން ހުއްޓާލުމަށް އޭނާ ވަނީ ގޮވާލާފައެވެ. ޣައްޒާގައި ހިންގާ އަސްކަރީ އޮޕަރޭޝަންތަކަށް އަސްކަރީ، މާލީ އަދި ޑިޕްލޮމެޓިކް އެހީތެރިކަން ފޯރުކޮށްދެމުން، އިންސާނީ ޙައްޤުތަކުގެ ދިފާޢުގައި ހުޅަނގުގެ ޤައުމުތަކަށް ވަކާލާތު ނުކުރެވޭނެ ކަމަށް އަރާޤްޗީ ފާހަގަކުރިއެވެ.
ބައިނަލްއަޤްވާމީ ޤާނޫނުތައް ތަންފީޒުކުރުމުގައި ހުޅަނގުން ވަކި ބަޔަކަށް އިސްކަންދީ، އަމިއްލަ ބައިވެރިން ޙިމާޔަތްކޮށް އިދިކޮޅު ޤައުމުތަކަށް އެކަނި ފިޔަވަޅު އަޅާކަމަށް އީރާނުން ތުހުމަތުކުރެއެވެ. މި ބަޔާން އައިސްފައިވަނީ ހޮރްމޫޒް ކަނޑުއޮޅީގެ ސަލާމަތީ ކަންކަމާއި ނިއުކްލިއަރ މަޝްވަރާތަކާ ގުޅިގެން ހުޅަނގުގެ އިއްތިހާދުން އީރާނަށް ފިއްތުންތައް ކުރިމަތިކުރުވަމުންދާ ދަނޑިވަޅެއްގައެވެ.
