އިދިކޮޅު އެމްޑީޕީން އިސްނަގައިގެން ބޭއްވި ”ދަތިވެއްޖެ“ މުޒާހަރާއަށް ވަރަށް ބޮޑަށް ފާޑުވިދާޅުވަމުން، ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުޙައްމަދު އިސްމާޢީލް ބަހުގެ ހަމަލާތަކެއް އަމާޒުކުރައްވައިފިއެވެ.
ސޯޝަލް މީޑިއާ ޕްލެޓްފޯމް ’އެކްސް‘ ގައި ކުރެއްވި ޕޯސްޓެއްގައި މުޙައްމަދު އިސްމާޢީލް ވިދާޅުވީ، އެއް މަސް ދުވަސް ވަންދެން މުޅި މާލޭގައި ތާޅަފިލި ހަރުކޮށް، ގޭގެއަށް ކާޑު ފޮނުވައި، އަދި ގިނަ އަދަދެއްގެ ޕްރެސް ކޮންފަރެންސްތައް ބާއްވައިގެން ބޭއްވި ކޯލިޝަން މުޒާހަރާ ފަނުފުލުން ދިއުމުން، ކުރީގެ ތިން ރައީސުންނަށް ރައްޔިތުން ކުރާ އިތުބާރު ކުޑަކަން ވަރަށް ސާފުވެއްޖެ ކަމަށެވެ.
މި މުޒާހަރާއަކީ ކުރީގެ ތިން ރައީސުން ގުޅިގެން އިންތިޒާމުކުރި ހަރަކާތަކަށް ވާއިރު، މެންބަރު މުޙައްމަދު އިސްމާޢީލް ވަނީ އެ ބޭފުޅުންނަށް މަލާމާތް ރައްދު ކުރައްވާފައެވެ. އޭނާ ވިދާޅުވީ، ދެން އެ ބޭފުޅުންނަށް އެންމެ ރަނގަޅުވާނީ ވީއެންމެ އަވަހަކަށް ޖަމާޢަތްތެރިންގެ ގްރޫޕެއް ހަދައިގެން މުޅި މާލޭގައި އަޑުގަދަކުރާ ބޭނުންކޮށްގެން އިސްތިހާރު ކުރުން ކަމަށެވެ.
”ބަލަގަ ތީގެން ކޮންމެ ބޭފުޅަކަށް ފަސް އަހަރުގެ ދައުރެއް ރައްޔިތުން ދިނުމުން، ކޮންމެ ބޭފުޅަކު ދައުރުގައި ކަންކަން ކުރި ގޮތް ރައްޔިތުން ތިބީ ލޯ ހުޅުވައިގެން ބަލަން،“ މުޙައްމަދު އިސްމާޢީލް ލިޔުއްވާފައިވެއެވެ.
މީގެ އިތުރުން އޭނާ ފާހަގަކުރެއްވި ގޮތުގައި، އިދިކޮޅު ފަރާތްތަކުން ދެފައި އެއްތާ ނުޖެހިގެން މިއުޅެނީ ގައުމަކަށް ނުވަތަ ރައްޔިތަކަށް ހެވެއް އެދިގެންނެއް ނޫނެވެ. އެއީ ހަމައެކަނި އަމިއްލަ ”އަންބޮނޑި“ ބޮޑުކުރަން ކުރާ ކަމެއްކަން މިހާރު ރައްޔިތުންނަށް ވަރަށް ސާފުކޮށް އެނގޭ ކަމަށްވެސް އޭނާ ވިދާޅުވިއެވެ.
1 މަސްވަންދެން ތާޅަފިލި ހަރުކޮއްގެން މުޅި މާލޭގަ ގޮވާ ގޭގެޔައް ކާޑުފޮނުވާ ޕުރެސްތައްފީގެން ބޭއްވި ކޯލިސަން މުޖާހަރާ ފަނުފުލުން ދިއުމުން ކުރީގެ 3 ވެރިންނަށް ރައްޔިތުން ކުރާ އިތުބާރު ވަރައްސާފް
ކުރީގެ 3 ރައީސުންގެ ކޯލިސަނުން ދެންރަގަޅުވާނީ ވީއެންމެ އަވަހަކައް ޖަމާތްތެރިންގެ… pic.twitter.com/20jsJYUKev
— Mohamed Ismail (@MPMohdIsmail) August 14, 2026
މި ފާޑުކިޔުންތައް އަމާޒުވެފައިވަނީ ރައީސް ޑރ. މުޙައްމަދު މުޢިއްޒުގެ ސަރުކާރާ ދެކޮޅަށް އިދިކޮޅު ފަރާތްތަކުން އަޑުއުފުލަމުންދާ ދަނޑިވަޅެއްގައެވެ. ނަމަވެސް އިދިކޮޅުގެ މިފަދަ ހަރަކާތްތަކަށް ރައްޔިތުންގެ ފަރާތުން ލިބެމުންދަނީ ފިނި ތަރުހީބެކެވެ.
