ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ތަޢުލީމީ ކަންކަމަށް ކުރާ ޚަރަދުތަކާއި އިމްތިޙާނު ފީތައް ދެއްކުމުގައި އެއްވެސް ދަތިކަމެއް ދިމާވެއްޖެނަމަ، އެކަން ބޭންކަށް އެންގުމަށް ބީއެމްއެލްއިން އިލްތިމާސްކޮށްފިއެވެ.
ބޭންކުން މިކަމަށް އެދިފައިވަނީ، އަސާސީ ބޭނުންތަކަށް ކުރަންޖެހޭ ޚަރަދުތަކަށް ބޭނުންވާ ފައިސާ މެދުނުކެނޑި ދެއްކޭނެ އިންތިޒާމު ހަމަޖެއްސުމަށްޓަކައި، އޮންލައިންކޮށް ކުރާ ބައެއް ވިޔަފާރިތަކަށް ދުވާލަކަށް ކަސްޓަމަރުންނަށް ކުރެވޭނެ މުޢާމަލާތުގެ ޖުމްލަ ލިމިޓެއް ކަނޑައަޅާފައިވާ ދަނޑިވަޅެއްގައެވެ. ނަމަވެސް، ބީއެމްއެލްއިން ބުނި ގޮތުގައި ތަޢުލީމީ އަދި ޞިއްޙީ ޚިދުމަތްތަކުގެ އިތުރުން، މުހިންމު ސަބްސްކްރިޕްޝަންތަކަށް ކުރާ އަސާސީ ޚަރަދުތަކަށް މި ލިމިޓުތަކުގެ ސަބަބުން އެއްވެސް ހުރަހެއް ނޭޅޭނެއެވެ.
ބީއެމްއެލްއިން ފާހަގަކުރި ގޮތުގައި، ތަޢުލީމާ ގުޅުންހުރި ބައެއް އިމްތިހާން ފީތައް، މިސާލަކަށް އައިއީއެލްޓީއެސް (IELTS) ފަދަ ޓެސްޓުތަކުގެ ފީތައް ދައްކާއިރު ބައެއް ފަހަރު މައްސަލަތައް ދިމާވެއެވެ. މިކަން ދިމާވަނީ ޕޭމަންޓް ނެޓްވޯކް މެދުވެރިކޮށް ބޭންކަށް ’މަރޗަންޓް ކެޓަގަރީ ކޯޑު‘ ލިބޭއިރު، އެ މުޢާމަލާތްތައް ހިނގަނީ ”ތަޢުލީމީ“ ދާއިރާގެ ކޯޑުގެ ދަށުން ނޫންކަން ނުވަތަ އެއްވެސް ކެޓަގަރީއެއް ކަނޑައެޅިފައި ނުވާ ކޯޑުތަކެއްގެ ދަށުން ކަމަށްވާތީއެވެ. މިފަދަ ހާލަތްތަކުގައި އެ މުޢާމަލާތްތައް ފުރިހަމަނުވެ، ޑިކްލައިންވާކަން ބޭންކަށް ވަނީ ފާހަގަކުރެވިފައެވެ.
އިމްތިހާން ފީ ނުވަތަ އެފަދަ ޚިދުމަތްތަކަށް އޮންލަައިންކޮށް ފައިސާ ދެއްކުމުގައި ބައެއް ފަހަރު ދަތިތަކެއް ކުރިމަތިވޭތޯ؟
މިފަދަ ހާލަތެއްގައި އަމަލުކުރަންވީ ގޮތާއި ދަރިވަރުން އިތުރަށް ހޭލުންތެރިކުރުވުމުގެ ގޮތުން ބައެއް މައުލޫމާތު ހިއްސާކޮށްލާނަން . pic.twitter.com/dMJ3GeWEBs
— Bank of Maldives (@bankofmaldives) August 14, 2026
މިފަދަ ހާލަތެއް ދިމާވެއްޖެނަމަ، އެ މުޢާމަލާތުގެ ތަފްސީލާއެކު ބޭންކަށް ހުށަހެޅުމުން އެ މުޢާމަލާތް މުރާޖަޢާކޮށް، އެފަދަ މުޢާމަލާތްތައް ފަސޭހަކަމާއެކު ކުރެވޭނެ ގޮތަށް އެ ސައިޓެއް ކަނޑައަޅައި، އެކަން ހައްލުކޮށްދޭނެ ކަމުގެ ޔަގީންކަން ބޭންކުން ދެއެވެ.
ބޭންކުން އިތުރަށް ބުނީ، ތަޢުލީމާއި، ޞިއްޙީ ޚިދުމަތް އަދި އަސާސީ ސަބްސްކްރިޕްޝަންތަކަށް ފަސޭހަކަމާއެކު ފައިސާ ދެއްކޭނެ މަގު ފަހިކޮށްދިނުމަކީ ބޭންކުން އަބަދުވެސް އިސްކަންދޭ ކަމެއް ކަމަށެވެ. އަދި މިފަދަ މުޢާމަލާތްތަކަށް ބޭންކުގެ ފަރާތުން ފުރިހަމަ އެހީތެރިކަން ދީ، ދިމާވާ އެންމެހާ މައްސަލަތައް ހައްލުކޮށްދިނުމުގައި ދެމިތިބޭނެ ކަމަށްވެސް ބީއެމްއެލްއިން ވަނީ ބުނެފައެވެ.
