ބޭންކް އޮފް މޯލްޑިވްސް (ބީއެމްއެލް) އަށް ލިބޭ ބޭރު ފައިސާގެ މިންވަރަށާއި ކަސްޓަމަރުންގެ ބޭނުންތަކަށް ރިއާޔަތްކޮށް، ކުރިއަށް އޮތް ތިން ހަފުތާގެ މުއްދަތަށް ޓެލެގްރެފިކް ޓްރާންސްފަރ (ޓީޓީ) ތަކަށް ދޫކުރާ ޑޮލަރުގެ މިންވަރު އިތުރުކުރުމަށް އެ ބޭންކުން ނިންމައިފިއެވެ.
ބީއެމްއެލްއިން މި ނިންމުން ނިންމާފައިވަނީ މަރުކަޒީ ބޭންކު (އެމްއެމްއޭ) އިން ބޭންކުތަކަށް ފޯރުކޮށްދޭ ބޭރު ފައިސާގެ މިންވަރު ކުރިއަށް އޮތް ތިން ހަފުތާއަށް އިތުރުކުރުމާ ގުޅިގެންނެވެ. މިއީ ރާއްޖޭގެ ބާޒާރުގައި ޑޮލަރުގެ މުއާމަލާތްތައް ހިންގުމުގައި ދިމާވާ ދަތިތައް ހައްލުކޮށް، ވިޔަފާރިތަކަށް ލުއިފަސޭހަކޮށްދިނުމުގެ މަގުސަދުގައި އެޅި ފިޔަވަޅެއް ކަމަށް އެ ބޭންކުން ހާމަކުރެއެވެ.
ތަފާސްހިސާބުތަކަށް ބަލާއިރު، މި އަހަރުގެ ފުރަތަމަ ހަތް މަސްދުވަހުގެ ތެރޭގައި އެކަނިވެސް ބީއެމްއެލްއިން ވަނީ ޓީޓީ ހެދުމަށްޓަކައި 186 މިލިއަން ޑޮލަރު ކަސްޓަމަރުންނަށް ފޯރުކޮށްދީފައެވެ. މިއީ މަހެއްގެ މައްޗަށް އެވްރެޖްކޮށް 27 މިލިއަން ޑޮލަރެވެ. މިދިޔަ އަހަރުގެ މި މުއްދަތާ އަޅައިބަލާއިރު، މި އަހަރު ކޮންމެ މަހަކު އިތުރަށް 12 މިލިއަން ޑޮލަރު ބޭންކުން ވަނީ ދޫކޮށްފައެވެ.
މީގެ އިތުރުން، މި އަހަރުގެ ޖަނަވަރީ މަހުން ފެށިގެން ޖުލައި މަހުގެ ނިޔަލަށް އެކި ބޭނުންތަކަށް ބޭންކުން ޖުމްލަ 570 މިލިއަން ޑޮލަރު ދޫކޮށްފައިވާކަން ބީއެމްއެލްއިން ފާހަގަކުރެއެވެ. މިއީ ދުވާލެއްގެ މައްޗަށް ބަލާނަމަ ގާތްގަނޑަކަށް 2.7 މިލިއަން ޑޮލަރެވެ.
ބީއެމްއެލްއިން އިތުރަށް ބުނެފައިވަނީ، ކަސްޓަމަރުންނަށް ބޭނުންވާ ބޭރު ފައިސާ ދެމެހެއްޓެނިވި ގޮތެއްގައި ފޯރުކޮށްދިނުމަކީ އެ ބޭންކުގެ އެންމެ ބޮޑު އިސްކަން ކަމަށެވެ. އަދި ބޭންކަށް ލިބޭ އާމްދަނީއާ އެއްވަރަށް، އާންމުންނާއި ވިޔަފާރިތަކުގެ ބޭނުންތައް ފުއްދައިދިނުމުގައި އަބަދު ވެސް މަސައްކަތް ކުރަމުންދާނެ ކަމުގެ ޔަގީންކަން އެ ބޭންކުން ވަނީ ދީފައެވެ.
