ތިލަފުށީ ޕޯޓް މަޝްރޫއުގެ މަސައްކަތްތައް ކުރިއަށްދާގޮތް ބައްލަވާލައްވަން އިކޮނޮމިކް މިނިސްޓަރު މުޙައްމަދު ސަޢީދު ވިޔަފާރިވެރިންނާއެކު ތިލަފުއްޓަށް ވަޑައިގެންފިއެވެ.
މި މަޝްރޫއުގެ މަސައްކަތްތައް ކުރިއަށްދާ ގޮތް ބައްލަވާލައްވަން ތިލަފުއްޓަށް ވަޑައިގަތުމަށްފަހު މިނިސްޓަރު ސަޢީދު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމާއި، ވަށާޖެހޭ ޖުމްލަ ހައްލެއް ބަނދަރާއި، އަދި އެ ބަނދަރާއި ގުޅިފައިވާ މުޅި ނިޒާމަށް ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންމެ މުހިއްމު އެއް ވައުދުފުޅު ކަމަށެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމާއި، ވަށާޖެހޭ ޖުމްލަ ހައްލެއް ބަނދަރާއި،އަދި އެބަނދަރާއި ގުޅިފައިވާ މުޅިނިޒާމަށް ގެނައުމަކީ ރަޢީސް ޑރ. މުޙައްމަދު މުޢިއްޒުގެ އެއްމެ މުޙިއްމު އެއް ވަޢުދު އަދި އެމަނިކުފާނު ވިދާޅުވެފައިވަނީ މިމަސައްކަތް ނޮވެމްބަރު 2027ގެ ކުރިން… https://t.co/CQHTWAbJOi pic.twitter.com/9nwhYDbmOB
— Mohamed Saeed (@em_saeed) August 12, 2026
އަދި މި މަސައްކަތް 2027 ވަނަ އަހަރުގެ ނޮވެމްބަރު މަހުގެ ކުރިން ނިންމަވާނެ ކަމަށް ރައީސް ޑރ. މުޢިއްޒު ވިދާޅުވެފައިވާތީ އެ މަސައްކަތް ވަރަށް ހަލުވި ދުވެއްޔެއްގައި ކުރިއަށްދާ ކަމަށް މިނިސްޓަރު ސަޢީދު ވަނީ ވިދާޅުވެފައެވެ. ސަޢީދު ވިދާޅުވީ، ޕޯޓުގެ ހިދުމަތްތައް ތިލަފުއްޓަށް ބަދަލުކުރުމުގެ ނަތީޖާއަކަށްވާނީ، ބަނދަރުން ޒަމާނީ އަދި އަވަސް ހިދުމަތްތަކެއް ލިބުމާއެކު، ރާއްޖޭގެ އިގްތިސާދު އެހެން ހަރުފަތަކަށް ގެންދިއުމުގައި އެޅިފައިވާ ބޮޑުއެއް ހުރަސް ނެތިގެންދިއުން ކަމަށެވެ.
މި ދަތުރާ ގުޅިގެން އިކޮނޮމިކް މިނިސްޓްރީން ބުނެފައިވަނީ، މާލޭ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަސައްކަތްތައް ކުރިއަށްދާ ގޮތް މިނިސްޓަރު ސަޢީދު ބައްލަވާލައްވާފައި ވަނީ ރާއްޖެއަށް ގިނަ އަދަދެއްގެ މުދާ އެތެރެކުރާ ބައެއް ވިޔަފާރިވެރިންނާއެކުގައި ކަމަށެވެ. އެގޮތުން މޭވާއާއި ތަރުކާރީގެ އިތުރުން އަސާސީ ބާވަތްތައް އެތެރެކުރާ ވިޔަފާރިވެރިން ހިމެނެއެވެ.
އެ މިނިސްޓްރީން ބުނީ ޖާގަ ބޮޑު، ވަސީލަތް ފުރިހަމަ ޕޯޓެއްގެ ގޮތުގައި، 2027 ވަނަ އަހަރުގެ ނޮވެންބަރު މަހު މާލޭ ވިޔަފާރި ބަނދަރު ތިލަފުށީގައި ހުޅުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވައުދުފުޅު ފުއްދުމުގެ މަސައްކަތްތައް ހަލުވިކަމާއެކު ކުރިއަށްދާ ކަމަށެވެ.
