މަސައްކަތުގެ މާހައުލުގައި މުވައްޒަފުންގެ މެދުގައި ގެންގުޅޭ ތަފާތުކުރުންތައް ހުއްޓާލައި، ހަމަހަމަ އުސޫލަކުން ކަންކަން ތަރުތީބުކުރުމަކީ އޮފީސްތަކުގެ އުފެއްދުންތެރިކަން އިތުރުވާނެ ކަމެއްކަން ދިރާސާތަކުން ސާބިތުވާ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު މިއަދު ވިދާޅުވެއްޖެ އެވެ.
އެކަމަނާ މިހެން ވިދާޅުވީ ސަރުކާރުގެ އެކި މުއައްސަސާތައް ގުޅިގެން މިއަދު ހ. މީރުމާ ހޯލުގައި ފެށި ”ސެމިނާ އޮން ވާކްޕްލޭސް މެންޓަލް ވެލްބީން“ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ފަސްޓް ލޭޑީ ސާޖިދާ ވިދާޅުވީ، ކޮންމެ މުވައްޒަފަކު ވެސް މަސައްކަތަށް ނުކުންނަނީ އާއިލީ ކަންކަމާއި، ދަރިންގެ ތައުލީމާއި، ސިއްހީ މައްސަލަތައް ފަދަ ދިރިއުޅުމުގެ އެތައް ފިކުރުތަކަކާ އެކުގައެވެ. އެހެންކަމުން، އޮފީހުގެ ޒިންމާތައް އަދާކުރާއިރު އެ މުވައްޒަފުންގެ ނަފުސާނީ ދުޅަހެޔޮކަން ކަށަވަރުކޮށްދޭނެ މާހައުލެއް އޮތުމަކީ ނުހަނު ބޭނުންތެރި ކަމެއް ކަމަށް އެކަމަނާ ފާހަގަކުރެއްވި އެވެ.
”ސުވާލަކީ މިފަދަ ހާލަތެއްގައި އޮފީހުގެ މާހައުލު ވާންވީ ކޮން ކަހަލަ މާހައުލަކަށްތޯ؟ އޮފީހުގައި ޓީމެއްގެ ގޮތުގައި ހުރިހާ މުވައްޒަފުން އެކުވެރިކޮށް ގުޅިގެން އުޅުމަކީ ކިހާ މުހިންމު ކަމެއްތޯ؟“ މެޑަމް ސާޖިދާ ވިދާޅުވި އެވެ.
އެކަމަނާ އިތުރަށް ވިދާޅުވީ، 2021 ވަނަ އަހަރުގެ ”ސްޓެޕް“ ސާވޭގެ ނަތީޖާއަށް ބަލާއިރު، ރާއްޖޭގެ ކޮންމެ ފަސް މީހަކުން އެކަކީ ކޮންމެވެސް މިންވަރަކަށް ޑިޕްރެޝަން ނުވަތަ ނަފުސާނީ ބަލިމަޑުކަމެއް ތަހައްމަލުކުރާ މީހެއް ކަމަށެވެ. އެހެންކަމުން، މަސައްކަތުގެ މާހައުލުގައި ދިމާވާ ތަފާތުކުރުންތަކާއި ނުތަނަވަސްކަމަކީ މުވައްޒަފުންގެ އުފެއްދުންތެރިކަމަށް ހުރަސްއަޅާ ކަންކަން ކަމަށް ވިދާޅުވި އެވެ.
ދިރާސާތަކާ ހަވާލާދީ ފަސްޓް ލޭޑީ ވިދާޅުވި ގޮތުގައި، މުވައްޒަފުންގެ ނަފުސާނީ ހިތްހަމަޖެހުން އޮންނަ އިދާރާތަކުގައި އޮފީހުގެ ޖުމްލަ އުފެއްދުންތެރިކަން އިތުރުވެ އެވެ. އަދި ސަލާމް ބުނުމާއި ގަޑިޖެހުން ފަދަ މައްސަލަތައް މަދުވެ، މަސައްކަތުގެ ރޫހު ވަރުގަދަވެ، ހިދުމަތް ހޯދަން އަންނަ ފަރާތްތަކަށް ކުރާ އިހުތިރާމް ބޮޑުވެ އެވެ.
މި ސެމިނާ އަކީ ހެލްތު މިނިސްޓްރީ، ނޭޝަނަލް މެންޓަލް ހެލްތު ޑިޕާޓްމަންޓް، ސިވިލް ސާވިސް ކޮމިޝަން، ސީއެސްޓީއައި އަދި ޑަބްލިއުއެޗްއޯ ގުޅިގެން ދެ ދުވަހުގެ މުއްދަތަށް ކުރިއަށްގެންދާ ހަރަކާތެކެވެ. މީގެ މައިގަނޑު މަގުސަދަކީ ސަރުކާރުގެ އިދާރާތަކުގެ އިސްވެރިން މެދުވެރިކޮށް، މުވައްޒަފުންގެ ނަފުސާނީ ދުޅަހެޔޮކަން އިތުރުކުރެވޭނެ ގޮތްތަކާ މެދު މަޝްވަރާކޮށް ހޭލުންތެރިކަން އިތުރުކުރުމެވެ.
