އިންޑިއާގެ އުއްތަރު ޕްރަދޭޝްގެ ބަހޭރީ ސިޓީގައި މުސްލިމަކު ހިންގަމުންދިޔަ ކުޅި ކާނާ އާއި ބިރިޔާނީ ވިއްކާ ފިހާރައަކާ ދެކޮޅަށް ހިންދޫ ހަރުކަށި ފިކުރުގެ ގްރޫޕަކުން ދެކޮޅު ހެދުމުން ސަރުކާރުން ބުލްޑޯޒަރު ބޭނުންކޮށްގެން ތަޅާލި ހާދިސާއާއެކު، އިންޑިއާގައި ޤާނޫނީ އިމުގެ ތެރެއިން އިންސާފު ލިބުމާއި މުސްލިމުންގެ ޙައްޤުތަކާމެދު އަލުން ބޮޑު ބަހުސެއް ވަނީ އުފެދިފައެވެ.
މި ހާދިސާ ހިނގާފައިވަނީ ހިންދޫންގެ އަހަރީ ”ކަންވާރް ޔާތުރާ“ އަޅުކަމުގެ ދުވަސްވަރު، ހިންދޫ ހަރުކަށި ޖަމާއަތެއްކަމަށްވާ ”ބަޖްރަންގް ދާލް“ ގެ މެމްބަރުން، މުޙައްމަދު ސަލްމާން ނަމަކަށްކިޔާ މުސްލިމަކު ހިންގާ ފިހާރައިގައި ކުކުޅުމަސް ވިއްކާތީ އެކަމާ އިހުތިޖާޖުކުރުމުންނެވެ. ފިހާރައިގެ ވެރިފަރާތުން މާފަށް އެދުމުންވެސް، ފުލުހުން ވަނީ ސަލްމާން ހައްޔަރުކޮށްފައެވެ. އަދި އޭގެ ކުޑައިރުކޮޅެއް ފަހުން، ސިޓީ ކައުންސިލުން ވަނީ އެ ފިހާރައަކީ ”ޤާނޫނާ ޚިލާފަށް ހަދާފައިވާ“ ތަނެއް ކަމަށް ބުނެ ބުލްޑޯޒަރު އަރުވައި މުޅިން ސުނާމީކޮށްލާފައެވެ.
ޤާނޫނީ އަދި އިޖުތިމާޢީ ސުވާލުތައް
މި ހާދިސާއާ ގުޅިގެން މަޝްހޫރު ނޫސްވެރިޔާ އަރްފާ ޚާނަމް ޝޭރުވާނީ ވަނީ ސޯޝަލް މީޑިއާގައި ވަރުގަދަ ސުވާލުތަކެއް އުފައްދާފައެވެ. މީހެއްގެ ދީނީ އައިޑެންޓިޓީއަކީ އެމީހެއްގެ އާމްދަނީ ލިބޭނެ މަގުތަކާއި އަމިއްލަ މުދަލަށް ހަމަލާދޭންޖެހޭ ސަބަބެއް ހެއްޔެވެ؟ އިމާރާތްތައް ތަޅާލުމުގެ ކުރިން ދޭންޖެހޭ ޤާނޫނީ ނޯޓިސްއާއި ކޯޓުގެ މަރުޙަލާތައް ފަހަތަށް ޖައްސާލައި، ސަރުކާރުން ބުލްޑޯޒަރު ބޭނުންކޮށްގެން އަދަބުދެނީ ކީއްވެގެން ހެއްޔެވެ؟ އަނިޔާލިބޭ ފަރާތްތަކަށް ޤާނޫނީ ރައްކާތެރިކަން ދިނުމުގެ ބަދަލުގައި، ހަރުކަށި ގްރޫޕްތަކުގެ ނުފޫޒަށް ފުލުހުން ވާގިވެރިވަނީ ކީއްވެގެން؟
”ބުލްޑޯޒަރު އިންސާފު“ އަދި މުސްލިމުން ނިކަމެތިކުރުން
އިންސާނީ ޙައްޤުތަކަށް ކާސާކުރާ ޖަމާއަތްތަކުން ފާހަގަކުރާ ގޮތުގައި، މިއީ އިންޑިއާގެ ބައެއް ސްޓޭޓްތަކުގައި މުސްލިމުންނާ ދެކޮޅަށް ނިޒާމީ ގޮތެއްގައި ހިންގާ ”ބުލްޑޯޒަރު އިންސާފު“ ގެ ބައެކެވެ. ކޯޓު މަރުޙަލާއަކުން ނިޔާ ކަނޑައެޅުމުގެ ކުރިން، ސަރުކާރުގެ ބާރު ބޭނުންކޮށްގެން މުސްލިމުންގެ މުދަލާއި ވިޔަފާރިތައް ހަލާކުކުރުމަކީ އިންޑިއާގެ ޤާނޫނުއަސާސީން ކަށަވަރުކޮށްދޭ ”ހަމަހަމަކަމުގެ ޙައްޤު“ އިންތިހާއަށް ކަނޑުވާލާ ކަމެކެވެ.
