ޕްރޮސިކިއުޓަރ ޖެނެރަލްގެ އޮފީހުގެ ޑިޖިޓަލް ޓްރާންސްފޮމޭޝަން މަޝްރޫއު، ”ޕީޖީއޯ 2.0“ މިއަދު ލޯންޗުކޮށްފިއެވެ.
މިއަދު ހެނދުނު ބާސެލޯ ގައި އޮތް ޙަފްލާއެއްގައި ޕީޖީއޯ 2.0 ލޯންޗުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ޕީޖީއޯ 2.0 ގެ ދަށުން ޕްރޮސިކިއުޓަރ ޖެނެރަލްގެ އޮފީހުގެ މަސައްކަތްތައް މުޅިން ޑިޖިޓައިޒްކޮށް، އޮފީހުގެ މަސައްކަތުގައި ޕްރޮސިކިއުޝަން މަސައްކަތަށް ޚާޢްޞަ ސޮވްރިން އޭއައި ބޭނުންކުރަން ފެށޭނެއެވެ.
މީގެ އިތުރުން ޕީޖީ އޮފީހުގެ ކޭސް މެނޭޖްމަންޓް ސިސްޓަމްގެ ތެރެއަށް އޭއި އިންޓަގްރޭޓްކުރެވޭނެއެވެ.
ޕީޖީއޯ 2.0 އާ ގުޅޭ އެންމެހައި މަޢުލޫމާތު ޕީޖީ އޮފީހުގެ ވެބްސައިޓުން މިހާރު ލިބެން ހުންނާނެއެވެ.
ޕީޖީއޯ 2.0 ލޯންޗުކުރުމަށް މިއަދު ބޭއްވި ޙަފްލާގައި، ޕީޖީ އޮފީހުގެ އާ ވެބްސައިޓު pgo.mv ވެސް ވަނީ ލޯންޗުކޮށްފައިވެއެވެ. އަދި ޕީޖީ އޮފީހުން ރައްޔިތުންނާއި، ދައުލަތުގެ އިދާރާތަކަށް ދޭ އެންމެހައި ޚިދުމަތްތައް ޑިޖިޓަލްކޮށް ލިބޭގޮތަށް ތަޢާރަފްކޮށްފައިވާ އީ-ދޮރޯށިވެސް ވަނީ ރަސްމީކޮށް ލޯންޗްކޮށްފައެވެ.
