އެމެރިކާގެ ކުޑަކުދިންނަށް ދޭންޖެހޭ ކަމަށް ކަނޑައަޅާފައިވާ ވެކްސިންތަކުގެ ޝެޑިއުލަށް ބޮޑެތި ބަދަލުތަކެއް ގެނައުމަށް ރައީސް ޑޮނަލްޑް ޓްރަމްޕް ރިޔާސީ ޤަރާރެއްގައި ސޮއިކޮށްފިއެވެ. ހެލްތު އެންޑް ހިއުމަން ސަރވިސަސް (އެޗްއެޗްއެސް) ގެ ސެކްރެޓަރީ ރޮބަޓް އެފް. ކެނެޑީ ޖޫނިއަރ އާއެކު އެކުލަވާލި މި ޤަރާރުގެ ދަށުން، ކުޑަކުދިންނަށް ކޮންމެހެން ދޭންޖެހޭނެ ކަމަށް ލަފާދޭ ވެކްސިންތަކުގެ އަދަދު ވަނީ 18 ބަލިން 11 ބައްޔަށް މަދުކޮށްފައެވެ.
ހެޕަޓައިޓިސް އޭ، ހެޕަޓައިޓިސް ބީ، ކޮވިޑް-19، އިންފްލުއެންޒާ، ރޯޓާވައިރަސް އަދި އާރުއެސްވީ (RSV) ވެކްސިން ވަނީ ކޮންމެހެން ދޭންޖެހޭ ލިސްޓުން އުނިކޮށް، އެއީ މައިންބަފައިންނާއި ޑޮކްޓަރުން މަޝްވަރާކުރުމަށްފަހު ގޮތް ނިންމަންޖެހޭ، ނުވަތަ ހަމައެކަނި ”ހައި-ރިސްކް“ ކުދިންނަށް ދޭ ވެކްސިންތަކެއްގެ ގޮތުގައި ކަނޑައަޅާފައެވެ.
އެމްއެމްއާރް (MMR) މީސަލްސް (ހިމަބިހި)، މަމްޕްސް އަދި ރުބެއްލާއިން ރައްކާތެރިވުމަށް މިހާރު ދެމުން އަންނަ އެއް ވެކްސިން، ކުރިއަށް އޮތް ތަނުގައި ތިން ވެކްސިނަކަށް ބަހާލައިގެން ތިން ފަހަރެއްގެ މަތިން ދިނުމަށް މި ޤަރާރުގައި ލަފާދީފައިވެއެވެ. އެއްފަހަރާ ގިނަ އިންޖެކްޝަންތަކެއް ޖެހުމުގެ ބަދަލުގައި، އެކި ދުވަސްތަކަށް ބަހާލައިގެން ވެކްސިން ދިނުމަށް ވަނީ ބާރުއަޅާފައެވެ.
އެމެރިކާއިން ”ކުޑަކުދިންނަށް ދެވޭ ވެކްސިން ލަފަޔާމެދު ރަނުގެ މިންގަނޑު ފޯރުކޮށްދިނުން“ ނަމުގައި މިގެނައި ބަދަލާއެކު އެމެރިކާގެ ފެޑެރަލް ސަރުކާރުން ކުޑަކުދިންނަށް ވެކްސިން ދިނުމަށް ކަނޑައަޅާފައިވާ ތާވަލަށް އަސާސީ ބަދަލުތަކެއް މިވަނީ ގެނެސްފައެވެ. އަދި މިއީ މައިންބަފައިންނާ ކުޑަކުދީންގެ ޙައްޤުތައް ރައްކާތެރިކޮށް، ޞިއްޙީ ރައްކާތެރިކަމަށްވެސް އެޅުނު މުހިންމު ފިޔަވަޅެއް ކަމުގައި ޓްރަމްޕު ސަރުކާރުން ވަނީ ބުނެފައެވެ.
