އިސްލާމީ ކަންތައްތަކާބެހޭ ވުޒާރާގެ ވަޤުފު ފަންޑަށް އެހީވުމަށް މީރާ ވެބްސައިޓު މެދުވެރިކޮށް ޤާއިމުކުރި ލިންކުތަކުން މިއަހަރުގެ މިހާތަނަށް ތިން މިލިއަނަށް ވުރެ ގިނަ ރުފިޔާ ލިބިފައިވާކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އިސްލާމީ ކަންތައްތަކާބެހޭ ވުޒާރާގެ ވަޤުފު ފަންޑު ތަރައްޤީކޮށް، ޝަރުޢީ އުޞޫލުތަކާ އެއްގޮތަށް ނަގުދު ފައިސާ ވަޤުފު ކުރެވޭނެ ނިޒާމެއް ޤާއިމުކޮށްފައިވަނީ މިދިޔަ އަހަރުއެވެ.
މި ނިޒާމުގެ ދަށުން ލިބޭ ފައިސާ ޚަރަދުކުރަނީ ވަޤުފު ފަންޑުގެ ޓްރަސްޓް ސްޓޭޓްމަންޓުގައި ބަޔާންވެގެންވާ ކަންކަމަށް، އެ ފަންޑުގެ އުޞޫލާ އެއްގޮތްވާ ގޮތުގެ މަތިން ކަމަށް ވަޒީރު ވިދާޅުވިއެވެ.
ދީނީ ކަންތައްތައް ކުރިއެރުވުމަށް އެހީވާ މި ވަޤުފު ފަންޑަކީ އިސްލާމީ ދަޢުވަތު ފެތުރުމާއި، އިސްލާމީ ތަޢުލީމު ދިނުމާއި، އިސްލާމީ ޙަޟާރަތު ކުރިއެރުވުމަށް މަގުފަހިކުރުމުގެ މަޤުޞަދުގައި އުފައްދާފައިވާ ފަންޑެކެވެ. މީގެ އިތުރުން މިސްކިތްތައް ބިނާކުރުމާއި މަރާމާތުކުރުމުގެ ކަންކަމަށްވެސް މި ފަންޑުން ހޭދަކުރެއެވެ.
ޝަރީޢާ ކޮމްޕްލައެންޓު އިންވެސްޓުމަންޓުތަކުގެ ޒަރީޢާއިން ފަންޑުގެ ފައިސާ އިތުރުކޮށް، ދާއިމީ ގޮތެއްގައި އިސްލާމީ މުޖުތަމަޢަށް ޚިދުމަތް ކުރުމަށް މި ފަންޑުގެ އެންމެ މުހިއްމު އެއް މަޤުޞަދު ކަމަށް އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ހާމަކުރެއެވެ.
ވަޒީރު ޝަހީމް ވިދާޅުވީ ވަޤުފު ފަންޑަށް ޞަދަޤާތާއި، ޚައިރާތާއި، ހިބައާއި އަދި ވަޞިއްޔަތުގެ ގޮތުން ދޭ ހަދިޔާވެސް މިހާރު ބަލައިގަންނަމުންދާ ކަމަށާއި، މި ބައިތައް ބެލެހެއްޓޭނީ ކޭޝް ވަޤުފާ ވަކިން ހަރުދަނާ ނިޒާމެއްގެ ތެރެއިން ކަމަށާއި މިއީ ފަންޑު އުފެދުނުތާ 15 އަހަރުން ފަހުން ގެނެވުނު އެންމެ ބޮޑު ހެޔޮ ބަދަލު ކަމަށެވެ.
ރާއްޖެއާއި ރާއްޖެއިން ބޭރުގެ ފަރާތްތަކާއި އަދި ވިޔަފާރިތަކުން ދީނީ ކަންކަމަށްދޭ މިފަދަ އެހީތައް، ފަންޑުގެ ޓްރަސްޓް ސްޓޭޓްމަންޓުގައި ކަނޑައެޅިފައިވާ އުޞޫލުތަކާ އެއްގޮތަށް ރައްކާތެރިކަމާއެކު ބެލެހެއްޓޭނެ ކަމަށް އިސްލާމީ ކަންތައްތަކާބެހޭ ވުޒާރާއިން ބުނެފައިވެއެވެ.
