ބޭންކް އޮފް މޯލްޑިވްސް (ބީއެމްއެލް) އިން ދުވާލެއްގެ މައްޗަށް އެވްރެޖްކޮށް 2.7 މިލިޔަން އެމެރިކާ ޑޮލަރު ބާޒާރަށް ދޫކުރަމުންދާކަން ހާމަކޮށްފިއެވެ.
ބީއެމްއެލްއިން މި ތަފާސްހިސާބުތައް ހާމަކުރެއްވީ، އިޤްތިސާދީ ތަރައްޤީއާއި ވިޔަފާރިއާ ބެހޭ ވުޒާރާއިން އިންތިޒާމުކޮށްގެން ބޭއްވި ”އިޤްތިޞާދު ހަމަމަގަށް“ ޕެނަލް މަޝްވަރާގައި ވާހަކަދައްކަވަމުން، އެ ބޭންކުގެ ހެޑް އޮފް ބްރޭންޑް އެންޑް މާކެޓިންގ ސްޓްރެޓަޖީ، މުޙައްމަދު ސައީދުއެވެ.
ސައީދު ވިދާޅުވީ، ރާއްޖެއަކީ ބޭރު ފައިސާއަށް، ވަކިން ހާއްސަކޮށް ޑޮލަރަށް ބޮޑުތަނުން ބަރޯސާވާ ގައުމަކަށްވުމާއެކު، އާންމުންނާއި ވިޔަފާރިތަކަށް ބޭނުންވާ ޑޮލަރު ފޯރުކޮށްދިނުމަށް ބޭންކުން ހާއްސަ އިސްކަމެއް ދޭ ކަމަށެވެ. އެގޮތުން ކާޑު މުއާމަލާތްތަކާއި، ޓީޓީ ހެދުމާއި އަދި އެހެނިހެން ބޭނުންތަކަށް މިހާރުވެސް ދުވާލަކު އެވްރެޖްކޮށް 2.7 މިލިޔަން ޑޮލަރު ވިއްކަމުންދާ ކަމަށް އޭނާ ފާހަގަކުރެއްވިއެވެ.
ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ރަސްމީ ރޭޓުގައި ބޭންކުން ވަނީ ޖުމްލަ 570 މިލިޔަން ޑޮލަރު ވިއްކާފައެވެ. އަދި ޑޮލަރުން ލޯނުގެ ގޮތުގައި 270 މިލިޔަން ޑޮލަރު ދޫކޮށްފައިވާ ކަމަށްވެސް ސައީދު ވިދާޅުވިއެވެ.
ޑޮލަރު އޭޓީއެމްތަކުގެ ބޭނުން ހިފާ މިންވަރަށް އަލިއަޅުވާލައްވަމުން ސައީދު ވިދާޅުވީ، ރާއްޖޭގެ އެކި ސަރަހައްދުތަކުގައި ގާއިމުކޮށްފައިވާ 86 ޑޮލަރު އޭޓީއެމް މެދުވެރިކޮށް، ދުވާލެއްގެ މައްޗަށް އެވްރެޖްކޮށް 1.2 މިލިޔަން ޑޮލަރު އާންމުން ނަގަމުންދާ ކަމަށެވެ. މިއީ މީގެ ތިން އަހަރު ކުރިއާ އަޅާބަލާއިރު ބޮޑު އިތުރުވުމެކެވެ. އޭރު މާލެ ސަރަހައްދުގެ އޭޓީއެމްތަކުން ދުވާލަކު ނަގަމުންދިޔައީ 6 ލައްކަ ޑޮލަރެވެ. ނަމަވެސް އަތޮޅުތެރެއަށް މި ޚިދުމަތް ފުޅާވުމާއެކު، ވޭތުވެދިޔަ 6 މަސްދުވަހުގެ ތެރޭގައި އެކަނިވެސް އޭޓީއެމްތަކުން 188 މިލިޔަން ޑޮލަރު ވަނީ ނަގާފައެވެ.
މީގެ އިތުރުން، އިޤްތިޞާދަށް ފައިސާ ދޫކުރާ މިންވަރު އިތުރުވެފައިވާކަން ފާހަގަކުރައްވަމުން ސައީދު ވިދާޅުވީ، މިދިޔަ އަހަރު މުޅި އަހަރު ދުވަހު ދޫކުރީ 10 ބިލިޔަން ރުފިޔާގެ ލޯނު ނަމަވެސް، މި އަހަރުގެ ފުރަތަމަ 7 މަސްދުވަހުގެ ތެރޭގައި އެ އަދަދު މިހާރުވެސް 9 ބިލިޔަން ރުފިޔާއާ ގާތްކޮށްފައިވާ ކަމަށެވެ.
ރާއްޖޭގެ އިޤްތިޞާދާއި ބޭންކާ އޮތް ގުޅުން ބަދަހިކަން ފާހަގަކުރައްވައި ސައީދު އިތުރަށް ވިދާޅުވީ، ދުނިޔޭގެ މަސްރަޙުގައި ހިނގަމުންދާ ރަޝިއާ-ޔޫކްރެއިން ހަނގުރާމައާއި މެދުއިރުމަތީގެ ހަމަނުޖެހުންތަކުގެ ސަބަބުން ގޮންޖެހުންތަކެއް ހުރި ނަމަވެސް، ބޭންކުން ދަނީ ރާއްޖެއަށް ބޭނުންވާ ބޭރު ފައިސާ ފޯރުކޮށްދިނުމުގައި މުހިންމު ދައުރެއް އަދާކުރަމުންނެވެ. އެގޮތުން މިއަހަރުގެ ފުރަތަމަ 6 މަސްދުވަހު ކާޑު މުއާމަލާތްތަކަށް އެކަނިވެސް 226 މިލިޔަން ޑޮލަރު ފޯރުކޮށްދީފައިވެއެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 29 އިންސައްތައިގެ އިތުރުވުމެކެވެ.
