ނ. ހޮޅުދޫގައި ގާއިމުކުރި ފެނުގެ ނިޒާމުގެ އަމަލީ މަސައްކަތްތައް އެއްކޮށް ނިންމާލުމަށްފަހު، ރަސްމީކޮށް ޚިދުމަތް ދޭން ފަށައިފިއެވެ.
11 ރަށެއްގައި ފެނާ ނަރުދަމާގެ މަޝްރޫޢު ކުރިއަށް ގެންދިއުމަށް ފެށި މަސައްކަތުގެ ދަށުން، 16 މިލިއަން ރުފިޔާއަށް ނ. ހޮޅުދޫގެ ފެނުގެ ނިޒާމު ގާއިމުކުރުމުގެ މަސައްކަތް ހަވާލުކުރީ ސްޓެޓިކް ކޮމްޕެނީ ޕްރައިވެޓް ލިމިޓެޑާއެވެ. 1،400 އަށްވުރެ ބޮޑު އާބާދީއެއް އޮންނަ ހޮޅުދޫގެ މުޅި މަޝްރޫޢުގެ މަސައްކަތްތައް ނިންމާ ޓެސްޓްކުރުމުގެ މަރުހަލާ މިހާރު ވަނީ ކާމިޔާބުކަމާއެކު ނިމިފައެވެ.
މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން މައުލޫމާތު ދޭ ގޮތުގައި، މި މަސައްކަތުގައި މިނިސްޓްރީގެ ސްޓޭޓް މިނިސްޓަރ އިސްމާއިލް އަލީ ހާމިދާއި، މިނިސްޓްރީގެ ޓެކްނިކަލް މުވައްޒަފުންގެ އިތުރުން، މަޝްރޫޢުގެ ކޮންޓްރެކްޓަރ ސްޓެޓިކް ކޮމްޕެނީ، ފެނަކަ ކޯޕަރޭޝަން އަދި ހޮޅުދޫ ކައުންސިލުން ވަނީ ބައިވެރިވެފައެވެ.
މި މަޝްރޫޢުގެ ދަށުން ހޮޅުދޫގައި ވަނީ ވަރުގަދަ ފެނުގެ ނިޒާމެއް ގާއިމުކޮށްފައެވެ. އެގޮތުން ކުރެވުނު މައިގަނޑު މަސައްކަތްތަކުގެ ތެރޭގައި ހިމެނެނީ:
- 6.6 ކިލޯމީޓަރުގެ ދިގު ފެނުގެ ވިއުގައެއް އެޅުން.
- ދުވާލަކު 60 ޓަނުގެ ފެން އުފެއްދުމުގެ ގާބިލުކަންހުރި 2 އާރް.އޯ ޕްލާންޓް ބެހެއްޓުން.
- 25 ޓަނުގެ ވާރޭފެން ޕްލާންޓެއް ގާއިމުކުރުން.
- ބޯފެން ރައްކާކުރުމަށްޓަކައި 350 ޓަނުގެ 2 ޓޭންކް ބެހެއްޓުން.
- 200 ޓަނުގެ ވާރޭފެން ރައްކާކުރާ ޓޭންކެއް ގާއިމުކުރުން.
މިނިސްޓްރީން ހާމަކުރާ ގޮތުގައި، މިހާރު ކުރިއަށްދަނީ މި ނިޒާމު ރަސްމީކޮށް ހިންގާ ބެލެހެއްޓުމަށްޓަކައި އޮޕަރޭޓަރާ ހަވާލުކުރުމުގެ އެންމެ ފަހުގެ އިދާރީ މަސައްކަތްތަކެވެ.
މި މަޝްރޫޢަކީ ހޮޅުދޫގެ ރައްޔިތުންނަށް ސާފު ބޯފެން ފޯރުކޮށްދިނުމަށްޓަކައި ސަރުކާރުން އިސްކަންދީގެން ކުރިއަށްގެންދިޔަ މުހިންމު މަޝްރޫޢެކެވެ.
