ދިވެހި ވަތަނީ ޚިދުމަތުގެ ޕްރޮގްރާމުގެ ހަތަރު ވަނަ ބުރަށް ބައިވެރިން ހޮވުމަށް މާލެ ސަރަހައްދުގައި ކުރިއަށްގެންދިޔަ އިންޓަވިއުތައް ކާމިޔާބުކަމާއެކު ނިންމާލައިފިއެވެ.
މި ބުރަށް ބައިވެރިން ހޮވުމަށް މާލެ ސަރަހައްދުގައި އިންޓަވިއުތައް ކުރިއަށްގެންދިޔައީ މިދިޔަ އާދިއްތަ އަދި ހޯމަ ދުވަހުއެވެ. ނެޝަނަލް ސަރވިސް އިނީޝިއަލް ޓްރޭނިންގެ ހަތަރު ވަނަ ބުރުގައި ބައިވެރިވުމުގެ ފުރުސަތު ދީފައިވަނީ، ތިންވަނަ ބުރަށް ކުރިމަތިލީ ކުދިންގެ ތެރެއިން ޖާގަ ނުލިބި ތިބި ކުދިންނަށެވެ. ބައިވެރިން ހޮވުމުގެ މަރުހަލާގައި އިންޓަވިއުގެ އިތުރުން، މެޑިކަލް ޗެކަޕް، އެޕްޓިޓިއުޑް ޓެސްޓް އަދި ފިޒިކަލް ފިޓްނަސް ޓެސްޓްތައް ފުރިހަމަކުރުން ހިމެނެއެވެ.
މާލެ ސަރަހައްދުގެ އިންޓަވިއުތައް ނިމިފައިވީ ނަމަވެސް، ރާއްޖޭގެ އެކި ސަރަހައްދުތަކުގައި މި މަސައްކަތް އަދިވެސް ދަނީ ކުރިއަށެވެ. އެގޮތުން ހއ. ދިއްދޫ، ށ. ފުނަދޫ، ނ. މަނަދޫ، ރ. އުނގޫފާރު، އދ. މަހިބަދޫ، ފ. ނިލަންދޫ، ތ. ވޭމަންޑޫ، ލ. ގަން، ކުޅުދުއްފުށި ސިޓީ، ތިނަދޫ ސިޓީ، ފުވައްމުލައް ސިޓީ އަދި އައްޑޫ ސިޓީ ހިތަދޫ ހިމެނޭހެން ޖުމްލަ 12 ސަރަހައްދެއްގައި އިންޓަވިއުތައް ކުރިއަށްދާނެއެވެ. މިކަމަށް އެމްއެންޑީއެފްގެ ފަސް ޓީމެއް މިހާރު ވެސް ރާއްޖޭގެ އެ ސަރަހައްދުތަކުގައި ދަނީ ހަރަކާތްތެރިވަމުންނެވެ.
ދިވެހި ވަތަނީ ޚިދުމަތުގެ ހަތަރު ވަނަ ބެޗުގެ ބައިވެރިން ހޮވުމުގެ މަރުހަލާގައި އިންޓަވިއު، މެޑިކަލް ޗެކަޕް، އެޕްޓިޓިއުޑް ޓެސްޓް އަދި ފިޓްނަސް ޓެސްޓުތައް ފުރިހަމަކުރަން ޖެހެއެވެ. މީގެ ތެރެއިން މާލެ ސަރަހައްދުގައި ކުރިއަށްގެންދިޔަ އިންޓަވިއުތައް މިހާރު ނިމިފައިވާއިރު، އިތުރު ޓެސްޓުތައް މި ހަފުތާގެ ތެރޭގައި ކުރިއަށް ގެންދިއުމަށް ވަނީ ތާވަލުކުރެވިފައެވެ.
ދިވެހި ވަތަނީ ހިދުމަތުގެ ޕްރޮގްރާމަކީ، އަމިއްލަ ނަފުސަށް އިތުބާރުކުރާ، އަގީދާ ވަރުގަދަ، އަދި ޖިސްމާނީ ގޮތުންނާއި ރޫހާނީ ގޮތުން ދުޅަހެޔޮ ޖީލެއް ބިނާކުރުމުގެ އިތުރުން ގައުމިއްޔަތަށް ލޯބިކުރާ، ޒިންމާދާރު ޒުވާނުންތަކެއް މުޖުތަމައަށް ނެރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި މުހިންމު ޕްރޮގްރާމެކެވެ.
ހަތަރުވަނަ ބުރަށް ބައިވެރިން ހޮވުމުގެ މަސައްކަތް ކުރިއަށްދާއިރު، މިދިޔަ ޖޫން މަހުގެ 19 ވަނަ ދުވަހު ވަނީ ތިންވަނަ ބުރުގެ ތަމްރީނުތައް ފަށައިފައެވެ. ޑިފެންސް މިނިސްޓްރީން މައުލޫމާތުދީފައިވާ ގޮތުގައި ތިންވަނަ ބެޗުގެ ބައިވެރިން މިހާރު ދަނީ ޅ. މާފިލާފުށީގައި ތަމްރީނުތައް ފުރިހަމަކުރަމުންނެވެ.
