ސިއްހީ ހިދުމަތްތައް ހޯދުމުގައި މާލެއަށް ބަރޯސާވާންޖެހޭ މިންވަރު ކުޑަކުރުމަށްޓަކައި، އަތޮޅުތެރޭގެ ތިން ހޮސްޕިޓަލެއްގައި އެމްއާރްއައި އަދި ހަތް ހޮސްޕިޓަލެއްގައި ސީޓީ ސްކޭންގެ ހިދުމަތް ތައާރްފްކުރުމަށް ސަރުކާރުން ނިންމާފައިވާ ކަމަށް ހެލްތް މިނިސްޓަރު ޤީލާ ޢަލީ ވިދާޅުވެއްޖެއެވެ.
ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި، އެމްއާރްއައި އަދި ސީޓީ ސްކޭން ފަދަ ހިދުމަތްތައް އަތޮޅުތެރޭގެ ރަށްރަށުގައި ފުޅާކުރުމަށް ސަރުކާރުން ކުރަމުންދާ މަސައްކަތްތަކާ ގުޅޭ ގޮތުން މެންބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ޤީލާ ޢަލީ ވަނީ، މިހާރު އެ ހިދުމަތްތައް ލިބެމުންދާ ހޮސްޕިޓަލުތަކާއި އަލަށް އެ ހިދުމަތްތައް ތައާރަފުކުރުމަށް ނިންމާފައިވާ ހޮސްޕިޓަލުތަކާ ގުޅޭ ތަފުސީލުތައް ވިދާޅުވެދެއްވައިފައެވެ.
މިނިސްޓަރު ޤީލާ ހާމަކުރެއްވި ގޮތުގައި، އަތޮޅުތެރޭގެ ރަށްރަށުގެ ތެރެއިން މިހާރު އެމްއާރްއައިގެ ހިދުމަތް ތިން ހޮސްޕިޓަލަކުން ފޯރުކޮށްދެއެވެ. އެއީ ކުޅުދުއްފުށީ ރީޖަނަލް ހޮސްޕިޓަލާއި އުނގުރޫފާރު ރީޖަނަލް ހޮސްޕިޓަލުގެ އިތުރަށް އައްޑޫ އިކުއިޓޯރިއަލް ހޮސްޕިޓަލުންނެވެ. އަދި ސީޓީ ސްކޭނުގެ ހިދުމަތް މިހާރު ފޯރުކޮށްދެމުންދަނީ ތިނަދޫ ސިޓީ ޑރ. ޢަބްދުއްސަމަދު މެމޯރިއަލް ހޮސްޕިޓަލާއި، ފުވައްމުލަކު ސިޓީ ހޮސްޕިޓަލާއި، އައްޑޫ ސިޓީ އިކުއިޓޯރިއަލް ހޮސްޕިޓަލުގައި އެކަނި ކަމަށް ވެސް މިނިސްޓަރު ވިދާޅުވިއެވެ.
އަތޮޅުތެރޭގެ ތިން ރަށެއްގައި އެމްއާރްއައިގެ ހިދުމަތް އަދި ހަތް ރަށެއްގައި ސީޓީ ސްކޭންގެ ހިދުމަތް ތައާރަފްކުރުމުގެ މަސައްކަތް ހަލުވި ދުވެލީގައި ކުރިއަށްދާ ކަމަށާއި އެގޮތުން، މި އަހަރު ނިމުމުގެ ކުރިން ހއ. ދިއްދޫ، ބ. އޭދަފުށި، ދ. ކުޑަހުވަދޫ، ޅ. ނައިފަރު، ފ. ނިލަންދޫ، އދ. މަހިބަދޫގެ އިތުރުން ލ. ފޮނަދޫގައި ސީޓީ ސްކޭނުގެ ހިދުމަތް ގާއިމުކުރުމަށް ހަމަޖެހިފައިވާ ކަމަށް މިނިސްޓަރު ޤީލާ ވަނީ ވިދާޅުވެފައެވެ.
