ހުޅުމާލޭ ހޮސްޕިޓަލްގެ މުވައްޒަފަކާ ގުޅުވައިގެން މީސް މީޑިއާގައި މީޑިއާގައި ފަތުރަމުގެންދާ ވާހަކަތަކަކީ ހަގީގަތާއި ހިލާފު ދޮގު ވާހަކަތަކެއް ކަމަށް އެ ހޮސްޕިޓަލުން ބުނެފިއެވެ.
ހުޅުމާލެ ހޮސްޕިޓަލުން ނެރުނު ނޫސްބަޔާނެއްގައި ބުނެފައިވަނީ ޑޮކްޓަރަށް ދެއްކުމަށް ހުޅުމާލެ ހޮސްޕިޓަލަަށް ދިޔަ ބަލިމީހަކާއި މެދު މެޑިކަލް އޮފިސަރަކު އަމަލުކުރި ގޮތް ކަމަށް ބުނެ މީސް މީޑިއާގައި ދައުރުވަމުންދާ ވާހަކަތަކެއް އެ ހޮސްޕިޓަލުގެ ސަމާލުކަމަށް އައިސްފައިވާ ކަމަށެވެ. އަދި ދައުރުވަމުންދަނީ އެއްވެސް ކަހަލަ ހަގީގަތެއް ނެތް ވާހަކަތަކެއް ކަމަށް ވެސް ހުޅުމާލެ ހޮސްޕިޓަލުން ވަނީ ބުނެފައެވެ.
މީސް މީޑިއާގައި ދައުރުވަމުންދާ މަޢުލޫމާތާއި ގުޅޭގޮތުން ނެރޭ ނޫސް ބަޔާން: pic.twitter.com/nnLVbq7mow
— Hulhumalé Hospital (@HMH_mv) August 8, 2026
ހުޅުމާލެ ހޮސްޕިޓަލުން ބުނީ އެ ހޮސްޕިޓަލުން ފޯރުކޮށްދޭ، އެންމެހައި ހިދުމަތްތަކަކީ ބަލިމީހުންގެ ރައްކާތެރިކަމާއި، ކަރާމާތާއި، އަމިއްލަ މިނިވަންކަމުގެ އިތުރުން އިތުބާރު ދެމެހެއްޓުމަށް އިސްކަންދީގެން ދެވޭ ހިދުމަތްތަކެއް ކަމުގެ ޔަގީންކަން އަރުވާ ކަމަށެވެ. އަދި ބަލިމީހުން ހުށަހަޅާ ކޮންމެ ކަންބޮޑުވުމެއް، ކޮންމެ މައްސަލައަކީ ވެސް އެ ހޮސްޕިޓަލުން ނުހަނު ސީރިއަސް މައްސަލައެއްގެ ގޮތުގައި، ހާއްސަ އިސްކަމެއްދީގެން ބަލާނެ މައްސަލަތަކެއް ކަމަށް ވެސް ހުޅުމާލެ ހޮސްޕިޓަލުން ވަނި ބުނެފައެވެ.
އެފަދަ މައްސަލައެއް ބެލުމަށްފަހު ކަނޑައެޅިފައިވާ ސިޔާސަތުތަކާއި ފަންނީ މިންގަނޑުތަކުގެ އިތުރުން، އަމަލުކުރަންޖެހޭ ގާނޫނުތަކާއި ގަވާއިދުތަކާ އެއްގޮތަށް، އަޅަންޖެހޭ، ފިޔަވަޅުތައް އަޅަމުންދާނެ ކަމަށް ވެސް އެ ހޮސްޕިޓަލުން ބުންޏެވެ.
މީސް މީޑިއާގައި މިހާރު ދައުރުވަމުންދާ ވާހަކަތަކާއި ގުޅިގެން ހުޅުމާލޭ ހޮސްޕިޓަލުން ބުނެފައިވަނީ، އެ ހޮސްޕިޓަލަކީ ބަލިމީހުންނަށް ދެވޭ ފަރުވާއާއި، ސިއްހީ ހިދުމަތުގެ ފަންނީ މިންގަނޑުތައް އެންމެ މަތީ ދަރަޖައިގައި ހިފެހެއްޓުމަށް އަބަދުވެސް މަސައްކަތްކުރާ ދައުލަތުގެ މުއައްސަސާއެއް ކަމަށެވެ. އަދި ބަލިމީހުން ބަލައި ފަރުވާދިނުމުގައި ބަލިމީހާގެ ކަރާމާތާއި، އަމިއްލަ މިނިވަންކަމަށް އިހުތިރާމުކުރުމާއި، ބަލިމީހާގެ ރުހުން ހޯދުމުގެ އިތުރުން، ކަނޑައެޅިފައިވާ ފަންނީ މިންގަނޑުތަކާއި ކްލިނިކަލް އުސޫލުތަކާއި އެއްގޮތަށް އެންމެހައި މުވައްޒަފުންނާއި ހިދުމަތް ހޯދާ ފަރާތްތަކުން އަމަލުކުރުމަށް އަބަދުވެސް-ބާރުއަޅަމުން އަންނަކަމަށް ހުޅުމާލެ ހޮސްޕިޓަލުން ބުންޏެވެ.
ހުޅުމާލޭ ހޮސްޕިޓަލުން އިތުރަށް ބުނެފައިވަނީ، އެ ހޮސްޕިޓަލަކީ ދައުލަތުގެ ސިއްހީ ހިދުމަތްދޭ މުއައްސަސާއަކަށްވުމުން ބަލިމީހުންނާއި މުވައްޒަފުންގެ އަމިއްލަ މައުލޫމާތާއި، ސިއްރުތައް ހިފެހެއްޓުމަކީ ކަނޑައެޅިފައިވާ ގާނޫނުތަކާ ގަވާއިދުތަކާ އެއްގޮތަށް އެ ހޮސްޕިޓަލުގެ ފަރާތުން، ކަށަވަރުކުރާނެ ކަމެއް ކަމަށެވެ. އަދި އެ ހޮސްޕިޓަލާއި ހޮސްޕިޓަލުން ފޯރުކޮށްދެމުންދާ ހިދުމަތްތަކާ ގުޅޭގޮތުން ހަގީގަތް ބެލުމެއް ނެތި ފަތުރާ މައުލޫމާތުތަކުގެ ސަބަބުން ހިދުމަތް ހޯދާ ފަރާތްތަކާއި، ސިއްހީ ހިދުމަތްތެރިން އަދި އެ ފަރާތްތަކުގެ އާއިލާތަކަށް ނަފްސާނީ ނުތަނަވަސްކަން ލިބި ސިއްހީ ހިދުމަތްތަކަށް އޮންނަ އިތުބާރު ގެއްލިގެން ދިއުމަކީ ނުހަނު ކަންބޮޑުވާ ކަމެއްކަމަށް ވެސް ހުޅުމާލެ ހޮސްޕިޓަލުން ވަނީ ބުނެފައެވެ.
އެހެންކަމުން މިފަދަ އަމަލުތަކުގެ ސަބަބުން އެންމެ އެކަށީގެންވާ ގޮތުގައި ހިދުމަތްތައް ފޯރުކޮށްދިނުމުގައި ދަތިތަކާ ކުރިމަތިވެގެން ދިޔަ ނުދިނުމަށް ކަށަވަރުނުވާ ހަގީގަތާއި ހިލާފު މައުލޫމާތުތައް ނުފެތުރުމަށް ހުޅުމާލޭ ހޮސްޕިޓަލުން ވަނީ އިސްތިމާސްކޮށްފައެވެ.
