ފެނަކަ ކޯޕަރޭޝަނާ ހަވާލުކޮށްގެން ނ. ހެނބަދޫގައި ތަރައްގީކުރި ކުޑަކުދިންގެ ޕާކު ރަސްމީކޮށް ހުޅުވައިފިއެވެ.
މި ޕާކު ހުޅުވުމަށްޓަކައި އިއްޔެ ބޭއްވި ހާއްސަ ރަސްމިއްޔާތުގައި އެ ޕާކު ރަސްމީކޮށް ހުޅުވައިދެއްވީ ހައުސިން މިނިސްޓްރީގެ ސްޓޭޓް މިނިސްޓަރު އަހުމަދު ސާލިމާއި ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރު މުހައްމަދު އަފީފް ހުސައިންއެވެ.
މި ރަސްމިއްޔާތުގައި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު މުހައްމަދު އަފޫ ހުސައިން ވެސް ބައިވެރިވެވަޑައިގެންނެވިއެވެ.
ހެނބަދޫގައި ތަރައްގީކުރި މި ކުޑަކުދިންގެ ޕާކަކީ ރަށްރަށުގެ އިޖުތިމާޢީ ދިރުން އާލާކޮށް، ކުޑަކުދިންނަށް އުފާވެރި އަދި ރައްކާތެރި މާހައުލެއް ގާއިމުކޮށްދިނުމުގެ ގޮތުން ސަރުކާރުން ކުރިއަށްގެންދާ މަޝްރޫއުތަކުގެ ތެރެއިން ނިންމާލެވުނު މުހިންމު މަޝްރޫއެކެވެ.
މި ޕާކު ހުޅުވުމާއެކު އެ ރަށުގެ ކުޑަކުދިންނަށް ހިތްހަމަޖައްސައިލައި ކުޅިވަރު ކުޅޭނެ ޒަމާނީ ފަސޭހަތަކެއް ލިބިގެންގޮސްފައެވެ.
