އަންނަ 2028 ވަނަ އަހަރު ބާއްވާ ރިޔާސީ އިންތިޚާބުގެ ވޯޓު ކަރުދާހުގައި އެ މަނިކުފާނުގެ ނަންފުޅު އޮންނާނެ ކަމަށާއި، ރައީސް ޑރ. މުޙައްމަދު މުއިއްޒު އެ މަނިކުފާނުގެ ފަހަތްޕުޅަށް އަރައިފި ނަމަ އެކަމަށް މަރުޙަބާ ކިޔާނެ ކަމަށް ޕީޕަލްސް ނޭޝަނަލް ފްރަންޓު (ޕީއެންއެފް)ގެ ބާނީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ޤާނޫނު އަސާސީއަށް އަށާރަ އަހަރު ފުރުމުގެ މުނާސާބާގައި ”ސަންގު ޓީވީ“އިން ގެނެސްދިން ޕްރޮގްރާމެއްގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، ރައީސް މުއިއްޒު އެ މަނިކުފާނު ޖަލަށްލައި އިތުރު އަނިޔާއެއް ނުދެއްވާނެ ކަމަށާއި، އެހެންކަމުން ކުރިއަށް އޮތް ރިޔާސީ އިންތިޚާބުގެ ވޯޓު ކަރުދާހުގައި އެ މަނިކުފާނުގެ ނަންފުޅު ކަށަވަރުކޮށް ފެންނާނެ ކަމަށެވެ.
އަޅުގަނޑު ގަބޫލެއް ނުކުރަން ރައީސް މުއިއްޒަކީ އެގޮތަށް އަނިޔާވެރި ބޭފުޅަކަށް ވެދާނެ ކަމަކަށް. އަޅުގަނޑުމެން ވަރުގެ މީހަކަށް އެވަރުގެ އަނިޔާއެއް ދެއްވަފާނެ ކަމަށް ގަބޫލެއް ނުކުރެވޭ – ރައީސް ޔާމީން
މި ސަރުކާރުގައި މިއަދާ ހަމައަށް ބޭއްވި ކޮންމެ އިންތިޚާބަކުންވެސް ރައްޔިތުން ދައްކަމުންދަނީ މި ސަރުކާރުގެ ސިޔާސަތުތަކާމެދު އޮތް ނުރުހުންތަކާއި ހިތްހަމަނުޖެހުންތައް ކަމަށް ރައީސް ޔާމީން ފާހަގަކުރެއްވިއެވެ.
އެހެންކަމުން ކުރިއަށް އޮތް ރިޔާސީ އިންތިޚާބު ކާމިޔާބުކުރެއްވޭވަރާ ގާތަށްވެސް މި ސަރުކާރަށް ވޯޓު ނުލިބޭނެކަން ރައީސް މުއިއްޒުވެސް ޤަބޫލުކުރައްވާނެ ކަމަށް ރައީސް ޔާމީން ވިދާޅުވިއެވެ.
ސަރުކާރަށް ފާޑުވިދާޅުވަނީ އެއްވެސް ޒާތީ ސަބަބަކާ ހުރެ ނޫން ކަމަށާއި އެއީ ޤައުމީ ސިޔާސަތުތަކާއި ކަންކަން ހިންގާގޮތާމެދު ހުރި ޚިޔާލުތަފާތުވުންތަކެއްގެ ސަބަބުން ކުރައްވާ ކަމެއް ކަމަށް ރައީސް ޔާމީން ވިދާޅުވިއެވެ. ނަމަވެސް، ކުރިއަށް އޮތް ރިޔާސީ އިންތިޚާބުގައި ރައީސް މުއިއްޒު އެމަނިކުފާނާ ގުޅިވަޑައިގެން މަސައްކަތްކުރެއްވުމަށް ނިންމަވައިފިނަމަ، އެކަމަށް މަރުޙަބާ ކިޔައި ފުރުޞަތު ދެއްވާނެ ކަމަށްވެސް އެމަނިކުފާނު ވިދާޅުވިއެވެ.
