މި އަހަރުގެ މިހާތަނަށް މަސްތުވާތަކެއްޗާ ގުޅުންހުރި 12 އޮޕަރޭޝަނެއް ފުލުހުންގެ ޚިދުމަތުން ހިންގާފައިވާ ކަމަށާއި އަދި މި އޮޕަރޭޝަންތަކުގައި 19 ކިލޯގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސްފައިވާކަމަށް ފުލުހުންގެ މުވައްސަސާއިން ބުނެފިއެވެ.
މިއަދު ހޯމްލޭންޑް ސެކިއުރިޓީ މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުން ބޭއްވި ނޫސްވެރިންގެ ބައްދަލުވުމުގައި ފުލުހުންގެ ޚިދުމަތުގެ އިންވެސްޓިގޭޝަން ހެޑް އަހްމަދު ނާފިޒު ވިދާޅުވީ އެތަކެތީގެ މަގުމަތީ އަގަކީ 104 މިލިއަން ރުފިޔާކަމަށް ފުލުހުން ލަފާކުރެވޭ ކަމުގައެވެ.
ނިމިދިޔަ އޭޕްރީލު މަހު މަސްތުވާތަކެތީގެ މައްސަލަތަކުގައި 70 މީހުން ހައްޔަރުކޮށްފައިވާއިރު މި އަހަރުގެ މިހާތަނަށް 260 މީހަކު މަސްތުވާތަކެއްޗާއި ގުޅުންހުރި މައްސަލަތަކުގައި ފުލުހުން ހައްޔަރުކޮށްފައިވާކަމަށް ނާފިޒު ވިދާޅުވިއެވެ.
ނާފިޒު އިތުރަށް ވިދާޅުވީ މަސްތުވާތަކެތީގެ ތުހުމަތުތަކުގައި ފުލުހުން 812 މީހަކު ބަލައިފާސްކޮށްފައިވާ ކަމަށެވެ. އަދި މި އަހަރުގެ މިހާތަނަށް ޖުމްލަ 16 ބިދޭސީން މަސްތުވާތަކެތީގެ އެކި މައްސަލަތަކުގައި ތުހުމަތުކުރެވިގެން ހައްޔަރުކޮށްފައިވާކަމަށްވެސް ފުލުހުންގެ ޚިދުމަތުން ބުނެފައިވެއެވެ.
އަދި މި އަހަރުގެ މިހާތަނަށް ފުލުހުން ތަހުގީގުކުރުމަށްފަހު ދައުވާކުރުމާމެދު ގޮތެއް ނިންމުމަށް ޕްރޮސެކިއުޓާ ޖެނެރަލްގެ އޮފީހަށް މަސްތުވާތަކަތީގެ 95 މައްސަލައެއް ފޮނުވާފައިވާކަން ނާފިޒު ފާހަގަކުރެއްވިއެވެ.
