ދިވެހި ފުޓުބޯޅައިގަ ވިދަމުންއަންނަ އޮޑި ސްޕޯޓްސް ކުލަބުގެ ހެޑް ކޯޗުގެ މަގާމަށް، ޕޯޗުގަލްގެ ތަޖުރިބާކާރު ކޯޗެއް ކަމުގައިވާ ރުއީ ގްރެގޯރިއޯ މިއަދު ހަމަޖައްސައިފިއެވެ. މިއީ ކުރިއަށް އޮތް ފުޓުބޯޅަ ސީޒަނަށް ޓީމު ވަރުގަދަކުރުމުގެ ގޮތުން އެ ކުލަބުން އެޅި މުހިންމު ފިޔަވަޅެކެވެ.
ރުއީ ގްރެގޯރިއޯއަކީ އޭޝިއާ އާއި ޔޫރަޕްގެ އިތުރުން އެފްރިކާގެ ފުޓުބޯޅައިގައި ވެސް ބޮޑެތި ތަޖުރިބާތަކެއް ހާސިލުކޮށްފައިވާ ބޭފުޅެކެވެ. އެގޮތުން އޭނާ ވަނީ ޕޯޗުގަލްގެ އެކި ޑިވިޝަންތަކުގެ ކުލަބުތަކާއި، ސައުދީ އަރަބިއްޔާ، އިންޑިއާ، ލުބުނާން، މިޔަންމާ އަދި އެންގޯލާގައި ވެސް މަސައްކަތްކޮށްފައެވެ.
ގްރެގޯރިއޯ އެންމެ ފަހުން ފެނިގެންދިޔައީ މިޔަންމާގެ ޑްރެގަން ސްޓާ ޔުނައިޓެޑްގެ ހެޑް ކޯޗުގެ ގޮތުގައެވެ. އޭގެ ކުރިން އޭނާ ވަނީ ލުބުނާނުގެ ސަލާމް ޒުގާތާ އާއި ގާނާގެ ބެރަކޫމް ޗެލްސީގެ ކޯޗުކަން ވެސް ކޮށްފައެވެ. މީގެއިތުރުން، ސައުދީ ޕްރޯ ލީގުގައި އަލް ތާވޫން ވާދަކުރިއިރު އެސިސްޓަންޓް ކޯޗެއްގެ ގޮތުގައި މަސައްކަތްކުރުމުގެ އިތުރުން، އިންޑިއާގެ ބެންގަލޫރު އެފްސީގެ ޓެކްނިކަލް ޑިރެކްޓަރުގެ މަގާމުގައި ތިން ސީޒަނެއްގައި އޭނާ ވަނީ ހޭދަކޮށްފައެވެ.
އޮޑި ސްޕޯޓްސް ކުލަބުން އައު ކޯޗެއް މި ހަމަޖެއްސީ މިހާރު ކުރިއަށްދާ ސީޒަނުގެ ދެ މެޗެއް ކުޅެފައިވަނިކޮށެވެ. އެ ދެ މެޗުގައި ޓީމަށް އިރުޝާދު ދީފައިވަނީ އެސިސްޓަންޓް ކޯޗު އަހުމަދު ފައްރާހު (ފައްރަ) އެވެ.
ނިމިދިޔަ ސީޒަނަކީ އޮޑި ސްޕޯޓްސް ކުލަބަށް ކާމިޔާބު ސީޒަނެކެވެ. ފުރަތަމަ ޑިވިޝަނުގައި އަލަށް ވާދަކޮށް، އެ ޓީމުން ވަނީ ދިވެހި ލީގުގެ ރަނަރަޕްކަން ހޯދައި، ޕްރެޒިޑެންޓްސް ކަޕުގެ ޗެމްޕިއަންކަން ކާމިޔާބުކޮށްފައެވެ. އޮޑިން ޕްރެޒިޑެންޓްސް ކަޕް އުފުލާލީ ފައިނަލުގައި، މުޅި ލީގުގައި ބަލިނުވެ އޮތް މާޒިޔާ ސްޕޯޓްސް އެންޑް ރެކްރިއޭޝަން ބަލިކުރުމަށްފަހުއެވެ.
މިދިޔަ ސީޒަނުގައި އެ ޓީމަށް އިރުޝާދު ދިނީ ސްޕެއިންގެ އަންދްރޭސް ގާސިއާއެވެ. އޭނާ މިހާރު ވަނީ އެ ކުލަބުގެ އެކެޑަމީގެ ޓެކްނިކަލް ޑިރެކްޓަރުގެ މަގާމާ ހަވާލުވެފައެވެ. އޮޑި ސްޕޯޓްސްގެ އުންމީދަކީ އައު ކޯޗު ރުއީ ގްރެގޯރިއޯގެ އިރުޝާދުގެ ދަށުން މި ސީޒަނުގައި ވެސް އިތުރު ކާމިޔާބީތަކެއް ހާސިލުކުރުމެވެ.
