އޮމާން މެދުވެރިކޮށް ހޮރްމުޒް ކަނޑުއޮޅި އަލުން ހުޅުވާލުމަށް ކުރެވޭ މަޝްވަރާތަކުގެ ތެރެއިން، އެކަމާ ގުޅޭ ފަންނީ އެއްބަސްވުން (ޓެކްނިކަލް ޑްރާފްޓް) އެކުލަވާލައި އެމެރިކާއާއި އީރާނުގެ ސަރުކާރަށް އޯމާނުން ހުށަހަޅައިފިއެވެ.
އާ އެއްބަސްވުމުގެ ދަށުން ކަނޑުއޮޅިން ދަތުރުކުރުމަށް ދެ މަގެއް ވަނީ ކަނޑައަޅާފައެވެ. އެތެރެއަށް ވަންނަ އުޅަނދުފަހަރު ދަތުރުކުރާނީ އީރާނުގެ ސަރަހައްދީ އިމުގެ ތެރެއިން އީރާނުން ބަލަހައްޓާ މަގަކުންނެވެ. ބޭރަށް ނުކުންނަ އުޅަނދުތައް ދަތުރުކުރާނީ އޯމާން ސިފައިން ބަލަހައްޓާ މަގަކުންނެވެ.
އީރާނުން ވަނީ ކަނޑުއޮޅިން ދަތުރުކުރާ އާންމު މުދާ އުފުލާ އުޅަނދުފަހަރަށް ހުރަސްއެޅުމާއި، އުޅަނދުފަހަރަށް އަރައި ފާސްކުރުން ހުއްޓާލުމަށް އެއްބަސްވެފައެވެ. އެއްބަސްވުމަށް މަގުފަހިކުރުމުގެ ގޮތުން އެމެރިކާގެ އަސްކަރީ މަނަވަރުތައް ވަނީ އީރާނުގެ ކަނޑުގެ އިމާ ދުރަށް، އޯމާން ކަނޑުގެ ބައިނަލްއަޤްވާމީ ސަރަހައްދަށް ފަހަތަށް ޖައްސާލަން ފަށާފައެވެ.
