ދިވެހިރާއްޖޭގެ ތަރައްޤީއަށާއި އިންޖިނިއަރިންގ ދާއިރާއަށް ދިވެހި އިންޖިނިއަރުންނާއި، އެ ދާއިރާގައި ޝާމިލުވާ ފަރާތްތަކުން ކުރަމުންދާ ބުރަ މަސައްކަތުގެ އަގުވަޒަންކުރުމުގެ ގޮތުން ދޭ ”އިންޖިނިއަރސް އެވޯޑު“ އަށް ކުރިމަތިލުމުގެ ފުރުސަތު މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން މިއަދު ހުޅުވާލައިފިއެވެ.
މި އެވޯޑަކީ ރާއްޖޭގެ އުމްރާނީ ތަރައްޤީގައި އިންޖިނިއަރުން އަދާކުރާ މުހިންމު ދައުރު ފާހަގަކޮށް، އެފަރާތްތަކަށް ހިތްވަރު ދިނުމުގެ ގޮތުން ދެވޭ ޝަރަފުވެރި އެވޯޑެކެވެ. މިނިސްޓްރީން މަޢުލޫމާތު ދެއްވާ ގޮތުގައި، މި އަހަރުގެ އިންޖިނިއަރުންގެ އެވޯޑު ޖުމްލަ 10 ގިންތިއަކުން ދިނުމަށް ވަނީ ކަނޑައަޅާފައެވެ.
އެވޯޑު ދިނުމަށް ހަމަޖެހިފައިވާ ގިންތިތަކަކީ:
•އިންޖިނިއަރ އޮފް ދަ އިޔަރ
•ލައިފްޓައިމް އެޗިވްމަންޓް އެވޯޑް
•ޔަންގް އިންޖިނިއަރ އެވޯޑް
•ވިމެން އިން އިންޖިނިއަރިންގ އެވޯޑް
•އިންޖިނިއަރިންގ އިނޮވޭޝަން، ޓެކްނޮލޮޖީ، އެޑިއުކޭޝަން އެންޑް ރިސަރޗް އެވޯޑް
•ސަސްޓެއިނަބިލިޓީ ޗެމްޕިއަން އެވޯޑު
•އިންޖިނިއަރިންގ ކޮންސަލްޓަންޓް / ކޮންސަލްޓަންސީ ފާރމް އޮފް ދަ އިޔަރ އެވޯޑު
•ސްޓޫޑަންޓް އިނޮވޭޓަރ އެވޯޑު
•ކޮމިއުނިޓީ އިމްޕެކްޓް އެވޯޑު
•ކޮންޓްރެކްޓަރ އޮފް ދަ އިޔަރ އެވޯޑް
ސަރުކާރުގެ ގެޒެޓުގައި މިހާރު ޝާއިޢުކޮށްފައިވާ ’އިންޖިނިއަރސް އެވޯޑު ދިނުމާ ގުޅޭ އުސޫލު‘ ގައި ބަޔާންކޮށްފައިވާ ޝަރުތުތައް ހަމަވާ ފަރާތްތަކުން މި އެވޯޑަށް ނަން ހުށަހެޅުމުގެ ފުރުޞަތު މިއަދުން ފެށިގެން ވަނީ ހުޅުވާލާފައެވެ. އެވޯޑަށް ކުރިމަތިލުމުގެ އެންމެ ފަހު ތާރީޚަކީ 20 އޮގަސްޓު 2026 ވާ ބުރާސްފަތި ދުވަހުގެ މެންދުރުފަހު 14:00 އެވެ.
މި އެވޯޑަށް ނަން ހުށަހެޅުމަށް ބޭނުންވާ އޮންލައިން އެޕްލިކޭޝަން ފޯމާއި، އެ ފޯމާއެކު ހުށަހަޅަންޖެހޭ ލިޔެކިޔުންތަކުގެ އިތުރުން އިޤުރާރު، މިނިސްޓްރީގެ ޚާއްޞަ ޕޯޓަލް މެދުވެރިކޮށް ލިބިވަޑައިގަންނަވާނެ ކަމަށް އެ މިނިސްޓްރީން ބުނެއެވެ.
ސަރުކާރުން އަންނަނީ ރާއްޖޭގެ ފަންނީ މަސައްކަތްތެރިންގެ އަގުވަޒަންކޮށް، އެކި ދާއިރާތަކުން ދިވެހިން ކުރިއެރުވުމަށް ގިނަ މަސައްކަތްތަކެއް ކުރަމުންނެވެ.
