އިދިކޮޅު ސިޔާސީ ފަރާތްތަކުން ޤައުމީ މަސްލަހަތަށްވުރެ އަމިއްލަ އެދުން އިސްކުރަމުންދާ ކަމަށް ވިދާޅުވެ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެފަރާތްތަކަށް ވަރަށް ބޮޑަށް ފާޑުވިދާޅުވެއްޖެއެވެ. ރައީސް މިހެން ވިދާޅުވީ އއ. އުކުޅަހުގައި ބޭއްވި ޕީއެންސީގެ ޖަގަހަ ޖަލްސާގައި ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ޖަލްސާގެ ބައިވެރިންނާ މުޚާތަބު ކުރައްވަމުން ރައީސުލްޖުމްހޫރިއްޔާ ވިދާޅުވީ، ޤައުމަށް ރަނގަޅު ކަމެއް ކުރާނަމަ އަދި ރައްޔިތުންނަށް ފައިދާހުރި ކަންކަން ފޯރުކޮށްދޭނަމަ، އިދިކޮޅު ސިޔާސީ ފަރާތްތަކުން އެކަމަށް އެއްބާރުލުން ދޭންޖެހޭނެ ކަމަށެވެ. ނަމަވެސް މިއަދުގެ ސިޔާސީ މަސްރަހުން ފެންނަމުންދަނީ ޤައުމު އިސްނުކުރާ މަންޒަރު ކަމަށް އެމަނިކުފާނު ފާހަގަކުރެއްވިއެވެ.
”ގައުމު އިސްނުކުރާ މަންޒަރު އަޅުގަނޑުމެންނަށް ފެންނަމުންދަނީ. ގައުމަށް ރަނގަޅުކަމެއް ކުރާކަމުގައި ވަންޏާމު، ރައްޔިތުންނަށް ރަނގަޅުކަންތައް ފޯރުކޮށްދޭނެ ކަމަށްވަންޏާ އެކަންކަމަކީ ހަމަ ރަނގަޅު ކަންތައްތައް. އެކަންކަމަށް އިދިކޮޅު ފަރާތްތަކުން ސިޔާސީ ފަރާތްތަކުން ޖެހޭޏެ އެޔަށް އެއްބާރުލުންދޭން. އެއީ ގައުމު އިސްކުރާނަމަ ކަންތައްތައް އޮންނާނެ ގޮތަކީ،“ ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ޤައުމީ ވިސްނުން އިސްކުރާނަމަ ފަނާކުރަނިވި ފިކުރަށް ރާއްޖޭގައި ޖާގައެއް ނޯންނާނެ ކަމަށެވެ. އަދި މި ސަރުކާރުގެ އެންމެ ބޮޑު އެއް ވައުދަކީ ޤައުމަށް ހަމަޖެހުން ގެނައުން ކަމަށާއި، ރައްޔިތުންގެ މެދުގައި އޮތް ބަދަލުހިފުމުގެ ރޫހު އެއްކޮށް ނައްތާލައި، ޤައުމަށް މަންފާކުރާނެ ވިސްނުން ގެންގުޅުމަކީ ސަރުކާރުގެ މައިގަނޑު ސިޔާސަތު ކަމުގައި އެމަނިކުފާނު ވިދާޅުވިއެވެ.
ރާއްޖޭގެ ސިޔާސީ މަސްރަހު ހަލަބޮލިކޮށްލުމަށްޓަކައި އިދިކޮޅު ފަރާތްތަކުން މިހާރު މަސައްކަތްކުރަމުންދާ ކަމަށް ތުހުމަތު ކުރައްވަމުން ރައީސް ވިދާޅުވީ، ބައެއް ފަރާތްތަކުން އަމިއްލަ މަސްލަހަތު އިސްކޮށް ޤައުމުގެ ހަމަޖެހުން ނަގާލުމަށް މަސައްކަތް ކުރަމުންދާ ކަމަށެވެ.
އެހެންކަމުން، އިދިކޮޅު ފަރާތްތަކުން ޤައުމު ހަލަބޮލިކުރަން ކުރާ މަސައްކަތްތައް ދެނެގަނެ، މާޒީގައި ކަންކަން ހިނގާފައިވާ ގޮތުން އިބުރަތް ހާސިލްކުރުމަށް ރައީސް ރައްޔިތުންނަށް އިލްތިމާސްކުރެއްވިއެވެ. އަދި ބުއްދީގެ ބޭނުންކޮށްގެން ކަންކަން ވަޒަންކުރަން އެނގޭ ބަޔަކަށް ރައްޔިތުން ވާންޖެހޭނެ ކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
