ޤައުމެއްގެ ވިލުންތެރިކަން ބިނާވެގެންވަނީ އެ ޤައުމެއްގެ ނަޒާހަތްތެރިކަން އިތުރުކޮށް، އައު އީޖާދުތަކަށް ކުރެވޭ އިންވެސްޓްމަންޓްތަކުގެ މައްޗަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ އއ. އުކުޅަހުގައި ބޭއްވި ”ސިޑްސް-އެސްއޭއައި“ ސިމްޕޯޒިއަމް ނިންމުމުގެ ރަސްމިއްޔާތާއި ”އައިޑީއައި ގްލޯބަލް ސަމިޓް“ ފެށުމަށް ބޭއްވި ޚާއްޞަ ބައްދަލުވުމުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް މުޢިއްޒު ފާހަގަކުރެއްވި ގޮތުގައި، ޙަޤީޤީ ވިލުންތެރި ދައުލަތެއް ބިނާކުރުމުގެ އެންމެ މުހިންމު ބިންގަލަކީ ހަރުދަނާ މުއައްސަސާތަކެވެ. އަދި ދައުލަތުގެ މާލީ ކަންކަން ޒިންމާދާރުކަމާއެކު ބެލެހެއްޓުމާއި، ހިންގުމުގެ ނިޒާމު ދެފުށްފެންނަ ގޮތަށް ބައްޓަންކުރުމަކީ ވިލުންތެރިކަން އިތުރުވުމަށް މަގުފަހިވާނެ ކަމެއް ކަމަށް އެމަނިކުފާނު ވިދާޅުވިއެވެ.
މި ދަނޑިވަޅަކީ ދައުލަތްތަކުގެ އޮޑިޓް މުއައްސަސާތަކުގެ ދައުރު އިންތިހާއަށް މުހިންމު ވަގުތެއްކަން ބަޔާންކުރައްވަމުން ރައީސް ވިދާޅުވީ، ރައްޔިތުންނާއި ތަރައްޤީގެ ބައިވެރިން ދައުލަތުގެ މާލިއްޔަތަށް ދޭ ކޮންމެ ފައިސާއަކީ ކަނޑައެޅިފައިވާ މަޤުޞަދުގައި ހޭދަކުރެވޭ ފައިސާއަކަށް ވާންޖެހޭނެ ކަމަށެވެ. އަދި ޖަވާބުދާރީވުމަކީ ހަމައެކަނި އިދާރީ ހިންގުމުގެ ބައެއް ނޫން ކަމަށާއި، އެއީ މުޅި ޤައުމުގެ ކުރިއެރުމާ ގުޅިފައިވާ މައިގަނޑު އަސާސްކަން އެމަނިކުފާނު ފާހަގަކުރެއްވިއެވެ.
ތަރައްޤީވަމުން އަންނަ ކުދި ޖަޒީރާ ޤައުމުތަކަށް (SIDS) ކުރިމަތިވެފައިވާ މާލީ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، މިފަދަ ގިނަ ޤައުމުތަކަކީ ބޮޑެތި ދަރަނިތައް މެނޭޖުކުރަމުން މުސްތަޤުބަލަށް އިންވެސްޓްކުރަން ޖެހިފައިވާ ޤައުމުތަކެއް ކަމަށެވެ. އެގޮތުން ބައިނަލްއަޤުވާމީ މައިދާނުގައި ހުރި ނުތަނަވަސްކަމާއި ފިއްތުންތަކާ އެކުގައިވެސް، ދިވެހިރާއްޖެއިން އަންނަނީ ޤައުމުގެ މުސްތަޤުބަލަށް އިންވެސްޓްކުރަމުން، އަދާކުރަންޖެހޭ މާލީ އިލްތިޒާމުތައް ސާބިތުކަމާއެކު އަދާކުރަމުން ކަމަށް ރައީސުލްޖުމްހޫރިއްޔާ ވިދާޅުވިއެވެ.
ހިންގުމުގެ ނިޒާމު ޒަމާނީ ކުރުމާ ގުޅޭގޮތުން ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ޑިޖިޓަލް ވަޞީލަތްތަކުގެ އެހީގައި ރާއްޖެ ފަދަ ޖަޒީރާ ޤައުމުތަކަށް ދިމާވާ ގޮންޖެހުންތަކަށް ބޮޑެތި ލުއިތަކެއް ލިބިގެންދާނެ ކަމަށެވެ. މި މަޤުޞަދުގައި ސަރުކާރުން ފައްޓަވާފައިވާ ”މޯލްޑިވްސް 2.0“ އިނިޝިއޭޓިވް މެދުވެރިކޮށް، ރައްޔިތުންނަށް ފަސޭހަކަމާއެކު ޚިދުމަތް ލިބޭނެ ޒަމާނީ ޑިޖިޓަލް ދައުލަތެއް ބިނާކުރެވޭނެ ކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
