މީހުންގެ ފުރާނަ ސަލާމަތްކުރުމުގެ މާތް މަގުސަދުގައި ނަރުހެއްގެ ގޮތުގައި ޚިދުމަތް ކުރަމުންދިޔަ އުމުރުން އެންމެ 24 އަހަރުގެ ޝައިހާ ފިކުރީ، މިއަދު މިވަނީ އަމިއްލަ ފުރާނަ ސަލާމަތްކުރުމަށްޓަކައި ދިވެހި އެންމެހައި ރައްޔިތުންގެ އެހީތެރިކަމަށް އިންތިހާއަށް ބޭނުންވެފައެވެ.
އުންމީދުން ފުރިގެންވާ ޒުވާން އުމުރުގައި ޝައިހާއާ ކުރިމަތިލާން ޖެހުނީ ހީވެސް ނުކުރާ ފަދަ ހިތްދަތި އިމްތިހާނަކާއެވެ. ފާއިތުވި ދެ އަހަރު ދުވަހު އޭނާ ހޭދަކުރަމުންދަނީ ކިޑްނީ ބަލީގެ ނުހަނު ވޭންދެނިވި ހާލަތެއްގައެވެ. ކިޑްނީ ބަލީގެ އެންމެ ފަހު މަރުހަލާ ނުވަތަ ”ސްޓޭޖް 5“ ގައި ހުރި ޝައިހާ، ހަފުތާއަކު ތިން ފަހަރު ޑަޔަލަސިސް ހަދަމުންދާއިރު، އޭނާގެ ފުރާނަ ސަލާމަތްކުރުމަށް އޮތް ހަމައެކަނި އުންމީދަކީ ކިޑްނީ ބަދަލުކުރުމެވެ.
މި އުންމީދުގެ އަލިކަން މިހާރު ވަނީ ފެންނަން ފަށާފައެވެ. ޝައިހާގެ ބައްޕަ ވަނީ އަމިއްލަ ދަރިފުޅަށްޓަކައި ކިޑްނީ ހަދިޔާކުރުމަށް ނިންމާފައެވެ. އޮޕަރޭޝަނަށް ބޭނުންވާ މުހިންމު ހުރިހާ ޓެސްޓުތަކެއް ނިމި، ބައްޕަގެ ކިޑްނީ ޝައިހާގެ ހަށިގަނޑާ ދިމާވާކަން (ކްރޮސްމެޗްވާކަން) މިހާރު ވަނީ ކަށަވަރުވެފައެވެ.
މި ނާޒުކު އޮޕަރޭޝަން ކުރުމަށްޓަކައި މި މަސް ނިމުމާއެކު އިންޑިއާއަށް ދިއުމަށް ޝައިހާ ދަނީ ތައްޔާރުވަމުންނެވެ. އޮޕަރޭޝަނުގެ ޚަރަދުތައް އާސަންދައިގެ ދަށުން ހަމަޖެހިފައިވީ ނަމަވެސް، ރާއްޖޭން ބޭރުގައި ހޭދަކުރަންޖެހޭ ދިގު މުއްދަތުގެ ހުރުމާއި، ކެއިންބުއިމުގެ އިތުރުން ދަތުރުގެ އެހެނިހެން ޚަރަދުތައް ހަމަޖެއްސުމަކީ އާދައިގެ އާއިލާއަކަށް އުފުލޭނެ މާލީ ބުރައެއް ނޫނެވެ.
ޝައިހާގެ ގާތް ރަހުމަތްތެރިއަކު މައުލޫމާތު ދިން ގޮތުގައި، ޝައިހާއަކީ ބަލިހާލަތުގައި ހުރެގެންވެސް ބަލިމީހުންނަށް ޚިދުމަތްކުރުމުގައި ނަމޫނާ ދެއްކި ކުއްޖެކެވެ.
”ޝައިހާ ޑަޔަލަސިސް ހަދަމުންވެސް ވަޒީފާއަށް ނުކުމެ ބަލިމީހުންނަށް އެހީވީ އޭނާގެ ހިތުގައިވާ އޯގާތެރިކަމެއްގެ ބޮޑުކަމުން. މިއަދު އޭނާ އެހީއަށް އެދި އާދޭސްކުރާ ހާލަތަށް ދިއުމުން ހިތް ފަޅައިގެންދޭ،“ އޭނާ ބުންޏެވެ.
ޝައިހާގެ ހަމައެކަނި އުންމީދަކީ މި ބަލިން އަވަސް ޝިފާއެއް ލިބި، އަލުން އެނބުރި އައިސް އިންސާނިއްޔަތަށް ޚިދުމަތްކުރުމުގެ މާތް މަސައްކަތުގައި ދެމިހުރުމެވެ. މި ޒުވާން ނަރުސް ކުއްޖާއަށް އާ ދިރިއުޅުމެއް ހޯދައިދިނުމަށްޓަކައި، ދީލަތި އެންމެހައި ފަރާތްތަކުގެ އެހީތެރިކަމަށް އާއިލާއިން އާދޭހާއެކު އެދެއެވެ.
އެހީތެރިކަން ފޯރުކޮށްދިނުމަށް:
ބޭންކް އޮފް މޯލްޑިވްސް (MVR): 7730000746589 (Shaiha Fikry)
ބޭންކް އޮފް މޯލްޑިވްސް (USD): 7730000630690 (Shaiha Fikry)
އަޅުގަނޑުމެންގެ ދުއާއަކީ މާތްﷲ ޝައިހާއަށް އަވަސް ޝިފާއެއް މިންވަރުކުރައްވައި، އެ އާއިލާއަށް ކެތްތެރިކަން ދެއްވުމެވެ. އާމީން.
މިއީ ދުނިޔެ ދައްކާ ހަގީގަތް