ރަޝިއާގެ އަސްކަރިއްޔާއިން ޔޫކްރޭނުގެ ޒަޕޮރީޒިއާއާއި ވެރިރަށް ކީވްއަށް ދިން ވަރުގަދަ ވައިގެ ހަމަލާތަކެއްގައި އާންމުންގެ އެކަކު މަރުވެ، 30 އަށްވުރެ ގިނަ މީހުން ވަނީ ޒަޚަމްވެފައެވެ. ރަޝިއާގެ ބޯޓުތަކުން 90 މިނެޓު ތެރޭގައި ޒަޕޮރީޒިއާގެ އާންމުން ދިރިއުޅޭ ސަރަހައްދުތަކަށް 8 ގްލައިޑް ބޮމުގެ ހަމަލާ ދީފައިވެއެވެ. މީގެ އިތުރުން ކީވްއަށް އަމާޒުކޮށް 181 ޑްރޯން އަދި ބެލިސްޓިކް މިސައިލް ވަނީ ފޮނުވާލާފައެވެ.
ޔޫކްރޭނުގެ ރައީސް ވޮލޮޑިމިއަރ ޒެލެންސްކީ ވަނީ އެމެރިކާގައި ތައްޔާރުކުރާ ’ޕެޓްރިއޮޓް‘ ދިފާއީ މިސައިލް އިތުރަށް ފޯރުކޮށްދިނުމަށް އެމެރިކާ އާއި ވިލާތުގެ ޤައުމުތަކުގައި އެދިފައެވެ. މެދުއިރުމަތީ ހަނގުރާމައިގެ ސަބަބުން މިފަދަ މިސައިލްތައް ލިބުން ވަނީ ދަތިވެފައެވެ. އަދި މީގެ އިތުރުން ރަޝިއާގެ އެތެރޭގައި ހުރި މިސައިލް ފޮނުވާ މަރުކަޒުތަކަށް ހަމަލާދިނުމަށްޓަކައި، އިލޮން މަސްކްގެ ’ސްޓާލިންކް‘ ސެޓެލައިޓް ނެޓްވޯކް ބޭނުންކުރުމުގެ ހުއްދަ ހޯދައިދިނުމަށް ޒެލެންސްކީ ވަނީ އެމެރިކާގެ ކިބައިން އެދިފައެވެ.
