އެމެރިކާގެ ރައީސް ޑޮނަލްޑް ޓްރަމްޕް، އިރާނާއެކު މަޝްވަރާތައް ކުރިއަށްދާ ކަމަށްބުނެ، ފާއިތުވި ފަސް މަސްދުވަހުގެ ހަމަނުޖެހުންތައް ނިމުމަކަށް ގެނައުމަށް މިއީ ތެހެރާނަށް ލިބޭނެ ”ފަހު ފުރުސަތު“ ކަމަށް އިންޒާރު ކުރައްވައިފިއެވެ.
ނަމަވެސް، އިރާނުން ވަނީ ވޮޝިންގްޓަނާއެކު އެއްވެސް މަޝްވަރާއެއް ކުރަމުންދާ ކަމަށް ބުނާ ވާހަކަ ދޮގުކޮށްފައެވެ. ތެހެރާނުން ހާމަކުރި ގޮތުގައި، އެ ގައުމުން މަޝްވަރާ ކުރަމުންދަނީ ހަމައެކަނި އޮމާނާ އެކުގައެވެ. އެއީ ހޮރްމޫޒް ކަނޑުއޮޅީގެ ސަލާމަތީ ކަންކަމާ ގުޅޭގޮތުންނެވެ.
މި މައްސަލައިގައި އިރާނުގެ އިސް އަސްކަރީ މުޝީރު މުހްސިން ރިޒާއީ ވިދާޅުވީ، އެމެރިކާއިން އިރާނާ ދެކޮޅަށް ކުރިއަށްގެންދާ ކަނޑުގެ ބްލޮކޭޑް ނުވަތަ ބަންދުކުރުން ކުރިއަށް ގެންދާނަމަ، އެމެރިކާގެ އުޅަނދުފަހަރާއި ސިފައިންނަށް ”ނުރައްކާތަކާއި ބޮޑެތި ގެއްލުންތަކާ“ ކުރިމަތިލާން ޖެހޭނެ ކަމަށެވެ.
މީގެ އިތުރުން، އެމެރިކާގެ ”ބޯޑް އޮފް ޕީސް“ އިން ބުނެފައިވަނީ އިސްރާއީލުން ގާޒާއިން ފޭބުމުގެ ކުރިން ހަމާސް ޖަމާއަތުން ފުރިހަމައަށް ހަނގުރާމަ ހުއްޓާލާ އަމާންދޭން ޖެހޭނެ ކަމަށެވެ.
ފަލަސްތީނުގެ މަސްރަހަށް ބަލާއިރު، އިސްރާއީލު ސިފައިން ގާޒާ ސިޓީއަށް ދިން ހަމަލާއެއްގައި ފަލަސްތީނުގެ ދެ މީހަކު ވަނީ ޝަހީދުކޮށްލާފައެވެ. އިސްރާއީލުން ގާޒާއަށް ދެމުންދާ މެދުކެނޑުމެއް ނެތް ހަމަލާތައް ކުށްވެރިކޮށް ގަތަރާއި، މިސްރު އަދި ތުރުކީވިލާތުން ވަނީ ގުޅިފައިވާ ބަޔާނެއް ނެރެފައެވެ. މި ބަޔާނުގައި އެ ގައުމުތަކުން ވަނީ އިސްރާއީލުގެ އުދުވާންތައް ވަގުތުން ހުއްޓާލުމަށް ގޮވާލާފައެވެ.
