ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުގެ ބައްދަލުވުންތަކުގައި ވޯޓުލުމުގެ ކަންކަން ކުރިއަށްގެންދާނީ އެ ޕާޓީގެ އަސާސީ ގަވާއިދުގައި ބަޔާންކޮށްފައިވާ އުސޫލުތަކާ އެއްގޮތަށް ކަމަށް އެ ޕާޓީން ހާމަކޮށްފިއެވެ.
ޕީއެންސީން ނެރުނު ނޫސްބަޔާނެއްގައި ބުނެފައިވަނީ، އެ ޕާޓީގެ މަތީ މަޖިލީހުގެ ވޯޓުލުމުގެ ކަންކަން ހަމަޖެހިފައިވާ ގޮތާ ގުޅޭގޮތުން ބައެއް މީޑިއާތަކުން ފަތުރަމުންދާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމަށެވެ. ޕާޓީގެ އެކި ގުނަވަންތަކުގެ ކަންކަން އިންތިޒާމުކޮށް ތަރުތީބުކުރާނެ ގޮތާއި، ކަންކަން ނިންމާނެ ގޮތްތައް އިލެކްޝަންސް ކޮމިޝަނުގައި ރަޖިސްޓްރީކޮށްފައިވާ އަސާސީ ގަވާއިދުގައި ވަރަށް ތަފުސީލުކޮށް ބަޔާންކޮށްފައިވާނެ ކަމަށް އެ ޕާޓީން ބުނެއެވެ.
އެގޮތުން ޕާޓީގެ އަސާސީ ގަވާއިދުގެ ހަތްވަނަ ބާބުގައި މަތީ މަޖިލީހުގެ ވޯޓުލުމުގެ ކަންކަން ކުރިއަށްގެންދަންޖެހޭ ގޮތް ބަޔާންކޮށްފައިވާ ކަމަށާއި، އެކަމަށް ބަދަލެއް ނާންނަ ކަމަށް ބަޔާނުގައި ވެއެވެ.
ޕީއެންސީ ބަޔާނުގައި ބުނެފައިވަނީ، ޕާޓީގެ މަތީ މަޖިލީހުގެ ވޯޓުލުމުގެ ކަންކަން ހަމަޖެހިފައިވާ ގޮތާ ގުޅޭގޮތުން ފަތުރަމުންދާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމަށެވެ. އަދި އަތް އުފުލައިގެން ވޯޓު ނެގުމަކީ މަތީ މަޖިލީހުގެ ވިލަރެސް ކޮމިޓީން އަލަށް ނިންމި ނިންމުމެއް ނޫން ކަމަށާއި، އެއީ ޕާޓީގެ އަސާސީ ގަވާއިދުގައި ކުރިންވެސް ބަޔާންކޮށްފައިވާ ކަމެއްކަން އެ ޕާޓީން ފާހަގަކުރެއެވެ.
ޕީއެންސީގެ އަސާސީ ޤަވާއިދުގައިވާ ގޮތުން ޕާޓީގެ މަތީ މަޖިލީހުގެ ކަންކަން ފާސްކުރުމަށް ވޯޓުދޭނީ އަތް އުފުލައިގެންނެވެ. އަދި ޕާޓީގެ މަތީ މަޖިލީހުގައި ޕާޓީގެ މެންބަރުންގެ މަޖިލީހަށް މެންބަރުން އިންތިޚާބު ކުރުމަށް ނެގޭ ވޯޓަކީ ހާމަ ވޯޓަކަށް ވާން ޖެހޭނެ ކަމަށް ބަޔާންކޮށްފައިވާ ކަމަށް ޕީއެންސީން ބުނެއެވެ. އެހެން ކަމުން ޕާޓީގެ މަތީ މަޖިލީހުގައި ޕާޓީގެ ނައިބު ރައީސުންނާއި މެންބަރުންގެ މަޖިލީހުގެ މެންބަރުން އިންތިޚާބަށް ހާމަ ވޯޓެއް ނެގުމަކީ ޕާޓީގެ އަސާސީ ޤަވާއިދާއި ޚިލާފު ކަމެއް ނޫން ކަމަށް ޕީއެންސީން ބުނެއެވެ.
ޕީއެންސީ ވަނީ އެ ޕާޓީގެ މަތީމަޖިލީހުގައި އޮތް އުފުލައިގެން ވޯޓު ނެގުމަށް މަތީ މަޖިލީހުގެ ކަންކަން ވިލަރެސްކުރާ ކޮމެޓީން ނިންމި ކަމަށް ބުނާ ވާހަކަ ދޮގުކޮށްފައެވެ. އަދި އެކަމަކީ ނިންމަންޖެހޭ ކަމެއްގެ ބަދަލުގައި އަސާސީ ޤަވާއިދުގައި ބަޔާން ކުރެވިފައިވާ ކަމެއްކަން އެޕާޓީން ފާހަގަކުރެއެވެ.
ޕީއެންސީން ވަނީ އެ ޕާޓީގެ މަތީ މަޖިލީހުގައި ޢަމަލުކުރާނީ މިހާތަނަށް ޢަމަލުކުރަމުން އައިސްފައިވާ ގޮތަށް، އަސާސީ ޤަވާއިދުގައި ބަޔާންކޮށްފައިވާ ގޮތާއި އެއްގޮތައް ކަމުގެ ޔަޤީން ދީފައެވެ. އެޕާޓީން ވަނީ ޕާޓީގެ އެތެރޭގެ ހިންގުމާއި ގޫޅޭ ހުރިހާ ކަމެއް ހިންގަމުންދާނީ، ޕާޓީގެ މަތީ މަޖިލީހުން ފާސްކޮށް ޕާޓީގެ އަސާސީ ޤަވާއިދާއި އެއްގޮތަށް މިނިވަން ޑިމޮކްރެޓިކް ޕާޓީތަކުގައި ޢަމަލުކުރާ އުސޫލްތަކާއި އެއްގޮތަށް ދެފުށް ފެންނަ ގޮތަށް ކަމުގެ ޕީއެންސީން ވަނީ އެ ޕާޓީގެ މެންބަރުންނަށް ޔަޤީންކަން ދީފައެވެ.
