އެމެރިކާގެ އަސްކަރީ އޮޕަރޭޝަންތަކަށް އެހީތެރިވެ، އެމެރިކާގެ ”ދިފާއީ އައްޑަނައެއްގެ“ ގޮތުގައި މަސައްކަތްކުރާ ސަރަހައްދީ ކޮންމެ ޤައުމަކަށް ހަނގުރާމައިގެ އަލިފާންގަނޑު ފޯރާނެކަމުގެ ވަރުގަދަ އިންޒާރެއް އީރާނުގެ އަސްކަރިއްޔާއިން ދީފިއެވެ.
އީރާނުގެ އެންމެ އިސް އަސްކަރީ ކޮމާންޑް (ޚާތަމް އަލް-އަންބިޔާ) ގެ ވެރިޔާ މޭޖަރ ޖެނެރަލް އަލީ ޢަބްދުﷲ ވަނީ، އެމެރިކާއިން މެދުއިރުމަތީ ޤައުމުތަކުގެ ވަސީލަތްތައް ބޭނުންކޮށްގެން ހަނގުރާމަ ފުޅާކުރަމުންދާ ކަމަށް ތުހުމަތުކޮށްފައެވެ.
މި އިންޒާރު މައިގަނޑު ގޮތެއްގައި އަމާޒުކޮށްފައިވަނީ އެމެރިކާގެ އަސްކަރީ މަރުކަޒުތައް ޤާއިމުކޮށްފައިވާ ގަލްފުގެ ޤައުމުތަކަށެވެ. (އޭގެ ތެރޭގައި ކުވައިތު، ޤަޠަރު، ބަޙްރައިން އަދި ޔޫ.އޭ.އީ ހިމެނެއެވެ). އީރާނުން އަންގާފައިވަނީ އެމެރިކާއަށް އެހީތެރިކަން ފޯރުކޮށްދޭ ޤައުމުތަކަކީ އީރާނުގެ އަސްކަރީ ހަމަލާތަކުގެ އަމާޒަކަށް ވާނެ ޤައުމުތަކެއް ކަމަށެވެ.
އެމެރިކާގެ ޚާރިޖިއްޔާގެ އިރުޝާދުގެ ދަށުން މެދުއިރުމަތީގެ ޤައުމުތަކުގައި ހުރި އެމެރިކާ އެމްބަސީތަކުން ދަނީ އެޤައުމުތަކުގައި ދިރިއުޅެމުންދާ އެމެރިކާގެ ރައްޔިތުންނަށް އެޤައުމުތަކުން އެއްކޮށް ފޭބުމަށް ވިސްނުމަށް އިރުޝާދު ދެމުންނެވެ. އަދި އެމެރިކާގެ އަސްކަރީ މަރުކަޒުތަކާ ގާތް ނުވުމަށާއި އިޒްރޭލުގައި އުޅެމުންދާ އެމެރިކާގެ ރައްޔިތުންނަށް ޙަމަލާތަކުން ރައްކާތެރިވާނެ ތަންތަން ހޯދައިގެން ތިބުމަށް އިރުޝާދު ދީފައެވެ. މި އިންޒާރުތައް ނެރެފައިވަނީ، ހޮރްމުޒް ކަނޑުއޮޅި ހުޅުވުމަށްޓަކައި އިޒްރޭލާ ގުޅިގެން އީރާނަށް ވަރުގަދަ ޙަމަލާތަކެއް ދޭން ރާވަމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފައިވާ ދަނޑިވަޅެއްގައެވެ.
