ދިވެހިރާއްޖެއާއި ތުރުކީވިލާތާ ދެމެދު ވަކި ބާވަތްތަކަކުން ޑިއުޓީ މަޢާފުކުރުމަށް ސޮއިކޮށްފައިވާ ”މޯލްޑީވްސް-ތުރުކިޔޭ ޕްރިފަރެންޝިއަލް ޓްރޭޑް އެގްރިމެންޓް“ (ޕީޓީއޭ) އަށް މިއަދުން ފެށިގެން ޢަމަލުކުރަން ފަށައިފިއެވެ.
މި އެއްބަސްވުމުގައި ދެ ޤައުމުގެ ދެމެދުގައި ރަސްމީކޮށް ސޮއިކޮށްފައިވަނީ 2024 ވަނަ އަހަރުގެ ނޮވެންބަރު މަހުގެ ތެރޭގައެވެ. މި އެއްބަސްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2023 ވަނަ އަހަރު ވެރިކަމާ ހަވާލުވެވަޑައިގަތުމަށްފަހު، އެންމެ ފުރަތަމަ ރަސްމީ ދަތުރުފުޅެއްގައި ތުރުކީވިލާތަށް ކުރެއްވި ޒިޔާރަތުގެ ތެރެއިން ކުރެވުނު މަސައްކަތްތަކުގެ ނަތީޖާއެކެވެ.
2023 ނޮވެންބަރު 26 އިން 29 އަށް ރައީސް ޑރ. މުޢިއްޒު ތުރުކީވިލާތަށް ކުރެއްވި މި ދަތުރުފުޅުގައި އެ ޤައުމުގެ ރައީސް ރަޖަބް ޠައްޔިބް އުރުދުޣާންއާ ބައްދަލުކުރައްވައި، ދެ ޤައުމުގެ ގުޅުން ބަދަހިކުރުމަށާއި، ޚާއްޞަކޮށް ވިޔަފާރިއާއި އިންވެސްޓްމެންޓްގެ ދާއިރާއިން އެއްބާރުލުން ދިނުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައިވެއެވެ.
މި އެއްބަސްވުމަށް ޢަމަލުކުރަން ފެށުމަކީ ދިވެހިރާއްޖޭގެ މަސްވެރިކަމުގެ ސިނާޢަތަށް ލިބިގެންދިޔަ ތާރީޚީ އަދި ބޮޑު ކުރިއެރުމެކެވެ. މި އެއްބަސްވުމުގެ ދަށުން ދިވެހި ކަނޑުމަހުގެ ބާވަތްތައް ޑިއުޓީއާ ނުލައި ތުރުކީވިލާތަށް ބޭރުކުރުމުގެ މަގު ފަހިވެގެންދާނެއެވެ. މީގެ ސަބަބުން ގާތްގަނޑަކަށް 85 މިލިޔަން މީހުންގެ ބޮޑު މާކެޓެއް ދިވެހި މަސްވެރިކަމުގެ އުފެއްދުންތަކަށް ހުޅުވިގެންދާނެއެވެ.
ސަރުކާރުން ހާމަކުރައްވާ ގޮތުގައި، މިއީ މަސްވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކަށް އިޤްތިޞާދީ ގޮތުން ބޮޑެތި ފައިދާތަކެއް ލިބި، ދިވެހި އުފެއްދުންތަކަށް ބައިނަލްއަޤްވާމީ ބާޒާރުގައި ރަނގަޅު އަގު ހޯދުމަށް ފަހިވެގެންދިޔަ ރަނގަޅު ފުރުޞަތެކެވެ. މި އެއްބަސްވުމުގެ ސަބަބުން ދެ ޤައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ހަރުދަނާވެގެންދާނެ ކަމަށްވެސް ސަރުކާރުން ލަފާކުރެއެވެ.
