ޤައުމުދެކެ ލޯބިވާ، ވަފާތެރި ޖީލެއް ބިނާކުރުމަށް ސަރުކާރުން ފަށާފައިވާ ”ނޭޝަނަލް ސާވިސް“ ނުވަތަ ”ދިވެހި ވަޠަނީ ޚިދުމަތް“ ޕްރޮގްރާމުގެ ދަށުން ކޮންމެ އަހަރަކު މަދުވެގެން 1،000 ކުދިން ތަމްރީނުކުރާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީ.އެސް.އެމް ނިއުސްއިން ގެނެސްދޭ ”ނޭޝަން ޗެޓް“ ޕްރޮގްރާމްގެ ތިންވަނަ އެޕިސޯޑުގައި ވާހަކަފުޅުދައްކަވަމުން ރައީސް ވިދާޅުވީ، މިވަގުތު ކެޕޭސިޓީ ހުރި ގޮތުން އަހަރަކު 1،000 ކުދިން ތަމްރީނު ކުރެވުނު ނަމަވެސް، ކުރިމަގުގައި އެ އަދަދު 2،000 އަށް އިތުރުކުރުމަކީ ސަރުކާރުގެ އަމާޒެއް ކަމަށެވެ. މި ޕްރޮގްރާމް ކުރިއަށް ގެންދަނީ އެމް.އެން.ޑީ.އެފްގެ ސީދާ ބެލުމުގެ ދަށުންނެވެ.
”އަޅުގަނޑުމެންގެ އަޒުމަކީ ޤައުމުދެކެ ލޯބިވާ، ދީނަށް ވަފާތެރި، އަޚްލާޤު ރަނގަޅު، އަދި ހަށިހެޔޮ މަސައްކަތްތެރި ކުދިންތަކެއް ބިނާކުރުން. މިއީ ޤައުމުގެ މުސްތަޤްބަލަށްޓަކައި ކުރެވޭ ވަރަށް މުހިންމު މަސައްކަތެއް،“ ރައީސް ވިދާޅުވިއެވެ.
މި ތަމްރީނުތައް ފުޅާކުރުމުގެ ގޮތުން ގިނިފުށީގައި ކުރިއަށްދާ މަސައްކަތްތައް ބާރު ސްޕީޑުގައި ކުރިއަށްދާކަން ފާހަގަކުރައްވައި، ރައީސް ވިދާޅުވީ ރާއްޖޭގެ އުތުރާއި ދެކުނުގައިވެސް ތަމްރީނު މަރުކަޒުތައް ޤާއިމުކުރުމުގެ މަސައްކަތް ހިނގަމުންދާ ކަމަށެވެ. އަދި މި ޕްރޮގްރާމަކީ ހަމައެކަނި ތަމްރީނެއް ދީފައި ދޫކޮށްލާ ކަމެއް ނޫން ކަމަށާއި، ތަމްރީނު ނިންމާ ކުދިންނަށް ވަޒީފާގެ ފުރުސަތުތައް ފަހިކޮށްދިނުމަކީ ސަރުކާރުގެ ސިޔާސަތެއް ކަމަށްވެސް އެމަނިކުފާނު ވިދާޅުވިއެވެ.
އެގޮތުން، މިހާތަނަށް ތަމްރީނު ފުރިހަމަކުރި ގިނަ ކުދިންތަކަކަށް އެމް.އެން.ޑީ.އެފް އާއި ފުލުހުންގެ ޚިދުމަތުގެ އިތުރުން ޔުނިފޯމް އެހެން ބޮޑީތަކުން ވަޒީފާ ދެވިފައިވާކަން ރައީސް ފާހަގަކުރެއްވިއެވެ. މީގެ އިތުރުން އަމިއްލަ މަސައްކަތް ކުރަން ބޭނުންވާ ކުދިންނަށް އެކި ދާއިރާތަކުން ހުނަރު ދަސްކޮށްދީ، ޕްރައިވެޓް ސެކްޓާގައި މަސައްކަތް ކުރުމުގެ ފުރުސަތުވެސް ފަހިކޮށްދީފައިވާ ކަމަށް އެމަނިކުފާނު ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، މި މަސައްކަތުގެ ސަބަބުން ކުދިންގެ އަމިއްލަ ދިރިއުޅުމަށާއި، އާއިލާތަކަށް އަދި މުޅި މުޖުތަމައަށް ބޮޑު ހިތްހަމަޖެހުމަކާއި ކުރިއެރުމެއް ލިބިގެންދާނެ ކަމަށެވެ.
