ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދެމުންގެންދާ ހުރިހާ ޚިދުމަތްތަކެއް ހުޅުމާލެއަށް ބަދަލުކޮށް، މިއަދުން ފެށިގެން އާ އިމާރާތުގައި ޚިދުމަތް ދޭން ފަށާނެކަން އެ އެޖެންސީން އިއުލާނުކޮށްފިއެވެ.
މިހާތަނަށް ސިއްޙީ ވުޒާރާ ހިންގަމުން އަންނަ ރޯޝަނީ ބިލްޑިންގުގައި ހިންގަމުން އައި އެޗްޕީއޭގެ އޮފީސް ބަދަލުކޮށްފައިވަނީ، ހުޅުމާލޭގެ ފުރަތަމަ ފިޔަވަހީގައި އަލަށް ތަރައްގީކޮށްފައިވާ މެންހެޓަން ގްރޭންޑް ހޮޓެލްސް އިމާރާތަށެވެ. މިއީ ހުޅުމާލޭގެ ވެމްކޯ ސައިޓާ އިންވެގެން ތަރައްގީ ކޮށްފައިވާ އިމާރާތެކެވެ.
އެޗްޕީއޭއިން މައުލޫމާތު ދޭ ގޮތުގައި، މިއަދުން ފެށިގެން އެ އެޖެންސީގެ ހުރިހާ ޚިދުމަތެއް ދެމުންދާނީ މެންހެޓަން ގްރޭންޑް ހޮޓަލުގެ 2 ވަނަ ފަންގިފިލާގައި ގާއިމުކޮށްފައިވާ އޮފީހުގެ ކައުންޓަރުތަކުންނެވެ. އެޗްޕީއޭއަކީ މި އިމާރާތަށް ޚިދުމަތްތައް ބަދަލުކުރި ދައުލަތުގެ ފުރަތަމަ އިދާރާއެވެ.
ކޮށްލެވޭ ގޮތުގައި، ސަރުކާރުން ”މީޑިއާ ވިލެޖު“ ތަރައްގީ ކުރުމަށް ނިންމާފައިވަނީ ވެސް މި އިމާރާތުގައެވެ.
އެޗްޕީއޭއަކީ ދިވެހިރާއްޖޭގެ އާންމު ސިއްޙަތު ރައްކާތެރިކުރުމުގެ ގާނޫނުގެ ދަށުން، އާންމު ސިއްޙަތާ ގުޅޭ އެންމެހައި ކަންކަން ރާވައި ހިންގުމުގެ ޒިންމާ އުފުލާ މައި އިދާރާއެވެ. މިގޮތުން ރާއްޖޭގެ އާބާދީގެ އެކި ގިންތިތަކުގެ ސިއްޙަތު ރައްކާތެރިކުރުމަށް ބޭނުންވާ ޕްރޮގްރާމްތައް އެކުލަވާލުމާއި، ބަލިތަކުން ރައްކާތެރިވުމަށް ދައުލަތުގެ ފަރާތުން ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމުގެ މަސައްކަތް އެ އެޖެންސީން އަންނަނީ ކުރަމުންނެވެ.
މީގެ އިތުރުން، ރާއްޖެއާއި ރާއްޖޭން ބޭރުގެ ކަމާގުޅޭ މާހިރުންގެ އިރުޝާދުގެ ދަށުން، ތަފާތު ބަލިތަކަށް އާންމުން ހޭލުންތެރިކުރުވުމާއި، ސިއްޙީ ރައްކާތެރިކަން ދެމެހެއްޓުމަށް ބޭނުންވާ މުހިންމު މަސައްކަތްތައް ހުޅުމާލޭގެ އާ އޮފީހާއެކު އިތުރަށް ހަރުދަނާވެގެންދާނެ ކަމަށް އެ އިދާރާއިން އުންމީދު ކުރެއެވެ.
