ބޭންކް އޮފް މޯލްޑިވްސް (ބީއެމްއެލް) ގެ ސީއީއޯ އަދި މެނޭޖިން ޑައިރެކްޓަރު މުހައްމަދު ޝަރީފް، އޭޝިއަން ބޭންކާސް އެސޯސިއޭޝަން (އޭބީއޭ) ގެ ޗެއާމަންކަމަށް އައްޔަންކޮށްފިއެވެ.
މިއީ މި މަގާމަށް ދިވެއްސަކު އައްޔަންކުރެވުނު ފުރަތަމަ ފަހަރުކަމަށްވާއިރު، އެސޯސިއޭޝަންގެ ބޯޑުން ނިންމެވި ނިންމެވުމާ އެއްގޮތަށް ޝަރީފް މި މަގާމާ މިއަދު ރަސްމީކޮށް ހަވާލުވެވަޑައިގަންނަވާނެއެވެ.
މީގެ ކުރިންވެސް ޝަރީފް ވަނީ އޭބީއޭގެ ލީޑަޝިޕްގައި މުހިންމު ދައުރެއް އަދާކުރައްވާފައެވެ. އެގޮތުން 2018 އިން 2020 އަށް އެ އެސޯސިއޭޝަންގެ ވައިސް ޗެއާމަންކަން ކުރައްވައި، ސަރަހައްދީ މެންބަރު ބޭންކުތަކުގެ މެދުގައި ގުޅުން ބަދަހިކުރުމަށާއި އެސޯސިއޭޝަންގެ ސްޓްރެޓެޖިކް އަމާޒުތަކަށް ވާސިލުވުމަށް އޭނާ ވަނީ މަސައްކަތްކުރައްވާފައެވެ. އޭނާގެ ލީޑަޝިޕަށް އޮތް އިތުބާރުގެ ސަބަބުން، 2025 ވަނަ އަހަރު އަލުން އެ މަޤާމަށް އޭނާ އައްޔަންކޮށްފައިވެއެވެ.
މި އައްޔަންކުރުމާ ގުޅިގެން ޝަރީފް ވިދާޅުވީ އޭބީއޭގެ ބޯޑާއި މެންބަރު ބޭންކުތަކުން އޭނާއަށް ކުރައްވާފައިވާ އިތުބާރަށް ޝުކުރުއަދާކުރައްވާ ކަމަށެވެ. އަދި އޭނާގެ ތަޖުރިބާގެ އަލީގައި މި މަގާމުގައި ހުރެ އޭބީއޭއަށް ޚިދުމަތްކޮށްދިނުމަކީ ލިބޭ ޝަރަފެއްކަމަށް ފާހަގަކުރެއްވިއެވެ. ބޭންކުތަކުގެ މެދުގައި އޮތް ގުޅުން އިތުރަށް ބަދަހިކޮށް، އޭޝިއާގެ ބޭންކިން ސިނާއަތުގެ ކުރިއެރުމަށް މަގުފަހިކުރުމަށްޓަކައި، ބޯޑާއި ސެކްރެޓޭރިއަޓް އަދި މެންބަރު މުއައްސަސާތަކާ ގުޅިގެން ވީހާވެސް ގާތުން މަސައްކަތްކުރުމަކީ އޭނާގެ އަމާޒުކަމަށް ޝަރީފް ވިދާޅުވިއެވެ.
ޝަރީފް މި މަޤާމާ ހަވާލުވެވަޑައިގަތުމާ ގުޅިގެން، އޭބީއޭގެ ސެކްރެޓަރީ-ޓްރެޜަރާ ޑރ. ޑަރސަން ޗިއު ވަނީ އެސޯސިއޭޝަންގެ އަސާސްތައް ހިފެހެއްޓުމަށް ޝަރީފް ކުރައްވަމުންދާ މަސައްކަތް ފާހަގަކުރައްވާފައެވެ. މެންބަރު ބޭންކުތަކާއި މުޅި ސަރަހައްދުގެ ބޭންކިން ސިނާއަތުގެ ކުރިއެރުމަށް އޭބީއޭއިން ކަނޑައަޅާފައިވާ ލަނޑުދަނޑިތައް ހާސިލުކުރުމަށް ކުރައްވާ މަސައްކަތުގައި ސެކްރެޓޭރިއަޓްގެ ފުރިހަމަ އެއްބާރުލުން ލިބޭނެކަމުގެ ޔަޤީންކަން އޭނާ ދެއްވިއެވެ.
އޭޝިއާ ސަރަހައްދުގެ ބޭންކުތަކާއި ބޭންކިން އެސޯސިއޭޝަންތައް ތަމްސީލުކުރާ އެންމެ އިސް އެއް ޖަމިއްޔާ ކަމަށްވާ އޭބީއޭ އުފެއްދީ 1981 ވަނަ އަހަރުއެވެ. މި މުއައްސަސާގެ މައިގަނޑު މަސައްކަތަކީ ބޭންކިން ދާއިރާގެ އިސްވެރިންނާއި ސިޔާސަތު ކަނޑައަޅާ ފަރާތްތަކާއި، ރެގިއުލޭޓަރުން އަދި ބައިނަލްއަޤްވާމީ މާލީ މުއައްސަސާތަކާއެކު މަޝްވަރާކުރުމާއި، ދާއިރާގެ ޤާބިލުކަން އިތުރުކުރުމެވެ.
ޝަރީފް މި މަޤާމަށް އައްޔަންކުރެއްވުމަކީ ބީއެމްއެލްއާއި ރާއްޖެއަށް ލިބުނު މުހިންމު ކުރިއެރުމެކެވެ. މިކަމުގެ ސަބަބުން ސަރަޙައްދީ ބޭންކިން ލީޑަރޝިޕްގައި ރާއްޖެ ތަމްސީލުކުރުން އިތުރަށް ހަރުދަނާވެގެންދާނެއެވެ.
