ކ. ގާފަރުގައި ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ދަށުން ތަރައްޤީކުރާ އައުޓްޑޯ ޖިމްގެ މަސައްކަތްތަކުގެ ތެރެއިން، މިހާރު ކުރިއަށްދަނީ ކަސްރަތު ކުރުމަށް ބޭނުންކުރާ އާލާތްތައް ހަރުކުރުމުގެ އަމަލީ މަސައްކަތް ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ) ހާމަކޮށްފިއެވެ.
މިނިސްޓްރީ އޮފް ސްޕޯޓްސް، ފިޓްނެސް އެންޑް ރެކްރިއޭޝަންގެ ފަރާތުން ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ) އާ ހަވާލުކޮށްގެން ކުރިއަށްގެންދާ މި މަޝްރޫޢަކީ ޖުމްލަ 453,000 ރުފިޔާގެ މަޝްރޫޢެކެވެ. މި މަސައްކަތް ނިންމުމަށް އާރް.ޑީ.ސީ އަށް ދީފައިވަނީ 60 ދުވަހުގެ މުއްދަތެކެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ކ. ގާފަރުގައި ތަރައްޤީކުރަާ އައުޓްޑޯ ޖިމްގެ މަސައްކަތްތަކުގެ ތެރެއިން މިހާރު ކުރިއަށްދަނީ ކަސްރަތު ކުރުމަށް ބޭނުންކުރާ އާލާތްތައް ހަރުކުރުމުގެ މަސައްކަތް.#TeamRDC pic.twitter.com/vpuZ4g3K8T
— Road Development Corporation Ltd (@rdcmaldives) July 29, 2026
ރާއްޖޭގެ ހުރިހާ ރަށެއްގައި އައުޓްޑޯ ޖިމް ޤާއިމުކުރުމަށް ސަރުކާރުން ގެންގުޅުއްވާ އަމާޒުގެ ދަށުން، މިހާތަނަށް 71 ރަށެއްގައި މިފަދަ ޖިމްތައް ބިނާކުރުމުގެ މަސައްކަތް ސަރުކާރުން ވަނީ އާރް.ޑީ.ސީ އާ ހަވާލުކުރައްވާފައެވެ. މި މަޝްރޫޢުތަކަކީ ރައްޔިތުންގެ ޖިސްމާނީ އަދި ނަފްސާނީ ޙާލަތު ރަނގަޅުކޮށް، ދުޅަހެޔޮ މުޖުތަމަޢެއް ބިނާކުރުމަށް ސަރުކާރުން ދެއްވާ ޚާއްޞަ އިސްކަމުގެ ދަށުން ކުރިއަށްގެންދާ މަސައްކަތްތަކެކެވެ.
މީގެ އިތުރުން، މިފަދަ ވަޞީލަތްތައް ރަށްރަށުގައި ޤާއިމުކުރުމުގެ އަނެއް މަޤްޞަދަކީ ރަށުގެ އިޖުތިމާޢީ ގުޅުންތަކާއި އާއިލީ ގުޅުންތައް ބަދަހިކުރުމަށް ފުރުޞަތު ތަނަވަސްކޮށްދިނުމެވެ.
ސަރުކާރުން ރަށްރަށުގެ ތަރައްޤީއަށް ކުރައްވަމުންދާ މަސައްކަތްތަކާއެކު، ގާފަރުގެ މި އައުޓްޑޯ ޖިމް ނިމުމުން އެ ރަށުގެ ރައްޔިތުންނަށް ދުޅަހެޔޮ ދިރިއުޅުމަކަށް ބޭނުންވާ ޒަމާނީ ވަޞީލަތްތައް ލިބިގެންދާނެއެވެ.
