މިނިވަން ދުވަހުގެ މުނާސަބަތުގައި ބާއްވާ ސިފައިންނާއި ކެޑޭޓުންގެ ޝަރަފުގެ ހިނގާލުން މިއަދު ހަވީރު ހުޅުމާލޭގައި ބޭއްވުމަށް ހަމަޖެހިފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
ޤައުމީ ދިފާޢީ ބާރުން މަޢުލޫމާތު ދެއްވާ ގޮތުގައި، މި އަސްކަރީ ހިނގާލުން ފެށުމަށް ހަމަޖެހިފައިވަނީ މިއަދު ހަވީރު 4:30 ގައެވެ. މި ހިނގާލުން ފަށާނީ ހުޅުމާލޭ ހިތިގަސްމަގުގައި ހުންނަ ސިންތެޓިކް ދުވާ ޓްރެކް ކައިރިންނެވެ. އަދި ހިނގާލުން ނިންމާލުމަށް ހަމަޖެހިފައިވަނީ ކަލާސީނުކޮށި ކައިރިއަށެވެ.
މި ހިނގާލުމުގައި އެމްއެންޑީއެފްގެ ބޭންޑާއެކު ޖުމްލަ 6 ގެމަ ބައިވެރިވާނެއެވެ. މީގެ އިތުރުން، އެމްއެންޑީއެފްގެ އެކި ކޯތަކާއި ތަފާތު ދާއިރާތަކުގެ ޚިދުމަތްތައް ދައްކާލުމަށްވެސް ވަނީ ހަމަޖެހިފައެވެ. ސިފައިންގެ މި ހިނގާލުމާއެކު މާލެ ސަރަޙައްދުގެ 15 ސްކޫލަކުން ކެޑޭޓުން ބައިވެރިވާ ސްކޫލް ކުދިންގެ ޕެރޭޑްވެސް ކުރިއަށްދާނެއެވެ.
މި ހިނގާލުމުގެ ތެރެއިން ދެ ސަރަހައްދެއްގައި މަޑުކޮށް، މިލިޓަރީ ބޭންޑުގެ ރާގުތައް ކުޅުމަށް ވަނީ ރޭވިފައެވެ. އެއީ ހުޅުމާލޭ ސެންޓްރަލް ޕާކް (ހިތިގަސްމަގާއި ހުވަނދުމާހިނގުން ގުޅޭ ކަންމަތި) އަދި ސިފްކޯ ފުލެޓް (ރީތިގަސްމަގާއި އަސުރުމާހިނގުން ގުޅޭ ކަންމަތި) ސަރަހައްދެވެ.
