ދ. ކުޑަހުވަދޫގެ މަގުތައް ޒަމާނީ ފެންވަރަށް ތަރައްގީކުރުމަށް ސަރުކާރުން ކުރިއަށްގެންދާ މުހިންމު މަޝްރޫއުގެ ތެރެއިން، އެ ރަށުގެ ބޮޑުބުރު ސަރަހައްދުގައި ކާރބް ސްޓޯން ޖެހުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބާރުސްޕީޑެއްގައި ކުރިއަށް އެބަގެންދެއެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ދަށުން ކުރިއަށްގެންދާ މި މަޝްރޫއުގެ ދަށުން މިވަގުތު އެންމެ އިސްކަމެއް ދީގެން ކުރިއަށްދަނީ ބޮޑުބުރުގައި ކާރބް ސްޓޯން ޖެހުމާއި، މަގުތަކުގެ ސައިޑް ވޯކް ނުވަތަ ދުވާރު ހެދުމަށްޓަކައި ބޭނުންވާ ބެކް ފިލިންގގެ މަސައްކަތްތަކެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ދ. ކުޑަހުވަދޫ މަގު ހެދުމުގެ މަޝްރޫއުގެ ދަށުން މިވަގުތު ކުރިއަށްދަނީ ބޮޑުބުރުގައި ކާރބް ސްޓޯން ޖެހުމާއި ސައިޑް ވޯކް ބެކް ފިލިންގގެ މަސައްކަތް.#TeamRDC pic.twitter.com/mySdgx6V7d
— Road Development Corporation Ltd (@rdcmaldives) July 28, 2026
ސަރުކާރުން އުމްރާނީ ތަރައްގީއަށް ފައްޓަވާފައިވާ މި މަސައްކަތުގެ ސަބަބުން، ކުޑަހުވަދޫގެ މަގުތަކަށް ދިމާވެފައިވާ ފެންބޮޑުވުމުގެ މައްސަލައަށް ދާއިމީ ހައްލެއް ލިބި، ރަށުގެ ރައްޔިތުންނަށް ދަތުރުފަތުރު ކުރުމުގައި ބޮޑެތި ފަސޭހަތަކެއް ލިބިގެންދާނެއެވެ.
އާރްޑީސީން ހާމަކޮށްފައިވާ ގޮތުގައި، އެ ކުންފުނީގެ އަމާޒަކީ ކަނޑައެޅިފައިވާ ތާވަލާ އެއްގޮތަށް މަސައްކަތްތައް ނިންމައި، ވީހާވެސް އަވަހަށް ރަށުގެ މަގުތަކުގެ ފެންވަރު ރަނގަޅުކޮށް ރައްޔިތުންނަށް ހިދުމަތް ފޯރުކޮށްދިނުމެވެ.
