ދިވެހިރާއްޖޭގެ މިނިވަންކަމަށް 61 އަހަރު ފުރުމުގެ މުނާސަބަތުގައި ބޭއްވި ހެވިކަމާއި ކުޅިވަރުގެ މައިދާނީ ހަރަކާތްތައް، ހަވާއެރުވުމުގެ ކުލަގަދަ ރަސްމިއްޔާތަކާއެކު ރޭ ނިންމާލައިފިއެވެ.
ޖުމްހޫރީ މައިދާނުގައި ބޭއްވި މި ހަރަކާތްތައް ޝަރަފުވެރިކޮށްދެއްވީ، ދެ ޙަރަމްފުޅުގެ ޚާދިމުގެ މުޝީރު، ސަޢޫދީ ޢަރަބިއްޔާގެ ވަޒީރުންގެ މަޖިލީހުގެ މެންބަރު، ސްޓޭޓް މިނިސްޓަރ، ޢަމީރު ޑރ. މަންޞޫރު ބިން މުތްޢިބު ބިން ޢަބްދުލްޢަޒީޒް އަލް ސަޢޫދު އެވެ. އެމަނިކުފާނު ޖުމްހޫރީ މައިދާނަށް ވަޑައިގަތުމުން މަރުހަބާ ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު އެވެ.
މި ރަސްމިއްޔާތު ބައްލަވާލެއްވުމަށް ރައީސުލްޖުމްހޫރިއްޔާގެ ދެކަނބަލުންގެ އިތުރުން ދައުލަތުގެ އިސްވެރިންނާއި، ރާއްޖޭގެ ޚާރިޖީ ވަޒީރުގެ ދަޢުވަތަކަށް ވަޑައިގެންނެވި ބަންގްލަދޭޝްގެ ޚާރިޖީ ވަޒީރު ޑރ. ޚަލީލުއްރަޚްމާން ވެސް ބައިވެރިވެވަޑައިގެންނެވިއެވެ.
މިނިވަންދުވަހުގެ ހެވިކަމާއި ކުޅިވަރުގެ ހަރަކާތްތައް ފެށިގެންދިޔައީ ރައީސުލްޖުމްހޫރިއްޔާއަށް އެރުވި ރިޔާސީ ކުރުނީހުންނެވެ. މީގެ ތެރޭގައި ސިފައިންގެ ހެވިކަމުގެ ލަޝްކަރުގެ ޝަރަފުގެ ހިނގާލުމާއި، 15 ސްކޫލެއްގެ ދަރިވަރުން ހިމެނޭހެން އެކުލަވާލެވިފައިވާ ދިވެހިރާއްޖޭގެ ޤައުމީ ކެޑޭޓް ކޯގެ ޝަރަފުގެ ހިނގާލުން ކުރިއަށްދިޔައެވެ. މި ހިނގާލުމުގައިވެސް ރައީސުލްޖުމްހޫރިއްޔާއަށް ރިޔާސީ ކުރުނީހެއް އަރުވާފައިވެއެވެ. ޖުމްހޫރީ މައިދާނުން ފެށި މި އަސްކަރީ ހިންގާލުމާއި ޕެރޭޑް މާލޭގެ ބޮޑެތި މަގުތަކުގައި ކުރިއަށް ގެންގޮސްފައިވެއެވެ.
މިނިވަން ދުވަހުގެ މައިދާނީ ކުޅިވަރުތައް ނިންމާލާފައިވަނީ ގިނަ ބައެއްގެ ސަމާލުކަން ހުއްޓުނު، ހަވާ އެރުވުމުގެ ކުލަގަދަ ހަރަކާތުންނެވެ. މި ހަރަކާތްތަކަކީ މިނިވަން ދުވަހުގެ އުފާ ފާޅުކުރުމަށާއި، ދިވެހި އަސްކަރިއްޔާގެ ސަފުތަކުގެ ބަދަހިކަން ދައްކާލުމުގެ މަގުސަދުގައި ކުރިއަށްގެންދިޔަ ހަރަކާތްތަކެކެވެ.
