ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި، ދިވެހި ދައުލަތުގެ މަތިވެރި އިއްޒަތް ކަމުގައިވާ ”ނިޝާން އިއްޒުއްދީން އިއްޒަތުގެ ވެރިޔާ“ ގެ ލަގަބު ހަތަރު ބޭފުޅަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އަރުވައިފި އެވެ.
ސޯޝަލް ސެންޓަރުގައި ބޭއްވި މިނިވަން ދުވަހުގެ ރަސްމީ ޖަލްސާގައި މި ޝަރަފު އަރުވާފައިވަނީ ޑރ. މުހައްމަދު ލަތީފް، އިބްރާހީމް ރަޝީދު މޫސާ، ހުސައިން އަފީފް އަދި މުހައްމަދު މޫސާ (އުއްޗު) އަށެވެ.
ޑރ. މުހައްމަދު ލަތީފަށް މި ޝަރަފު އެރުވީ ތައުލީމީ ދާއިރާއާއި ހާރިޖީ ދާއިރާއަށް އޭނާ ކޮށްދެއްވާފައިވާ އަގުހުރި ހިދުމަތްތަކުގެ އަގުވަޒަންކުރުމުގެ ގޮތުންނެވެ. ދައުލަތަށް 40 އަހަރަށް ވުރެ ދިގު މުއްދަތަކަށް ހިދުމަތް ކުރައްވާފައިވާ ޑރ. ލަތީފަކީ، ތައުލީމީ މަންހަޖުތައް ހަރުދަނާކުރުމާއި، ޓީޗަރުން ތަމްރީނުކުރުމާއި، އަދި ރާއްޖޭގެ ހާރިޖީ ގުޅުންތައް ބަދަހިކުރުމުގައި އިސް ދައުރެއް އަދާކުރެއްވި ބޭފުޅެކެވެ. މީގެ އިތުރުން ރާއްޖޭގެ ފުރަތަމަ ކޮލެޖު އުފެއްދުމާއި، ސިވިލް ސާވިސްގެ ނިޒާމު ގާއިމުކުރުމުގައި ވެސް އޭނާ ވަނީ މުހިންމު މަސައްކަތްތަކެއް ކުރައްވާފަ އެވެ.
އިބްރާހީމް ރަޝީދު މޫސާއަށް މި އިއްޒަތް އެރުވީ އިސްލާމްދީނަށް ހޭލުންތެރިކަން އިތުރުކުރުމާއި ދީނީ އިލްމު ފެތުރުމަށް އޭނާ ކުރެއްވި މަސައްކަތްތަކުގެ އަގުވަޒަން ކުރުމުގެ ގޮތުންނެވެ. މައުހަދުއްދިރާސާތިލް އިސްލާމިއްޔާގެ އިސްވެރިއެއްގެ ހައިސިއްޔަތުން، ރާއްޖޭގައި އަރަބި އަދި އިސްލާމީ ތައުލީމު ފުޅާކުރައްވައި، އިމާމުންނާއި ހަތީބުން ތަމްރީނުކުރުމަށް އޭނާ ހިންގެވި ޕުރޮގުރާމުތަކަކީ ދިވެހި މުޖުތަމައަށް ލިބުނު ބޮޑު ކުރިއެރުމެކެވެ.
ރާއްޖޭގެ ފަތުރުވެރިކަމުގެ ދާއިރާގެ ބާނީންގެ ތެރޭގައި ހިމެނިވަޑައިގަންނަވާ ހުސައިން އަފީފަށް މި އިއްޒަތް އެރުވީ ފަތުރުވެރިކަމާއި، ހޮސްޕިޓޭލިޓީ، އޭވިއޭޝަން އަދި ސިއްހީ ދާއިރާއިން އޭނާ ކޮށްދެއްވާފައިވާ ހިދުމަތްތަކުގެ ސަބަބުންނެވެ. ރާއްޖޭގެ ފުރަތަމަ ރިސޯޓު ހުޅުވުމުގެ އިތުރުން، ބައިނަލްއަގުވާމީ ފެންވަރުގެ ހޮސްޕިޓަލެއް ގާއިމުކޮށް، ރާއްޖޭގެ ސިއްހީ ދާއިރާއަށް އިންގިލާބީ ބަދަލުތަކެއް ގެނެސްދެއްވުމުގައި އަފީފް ވަނީ ނަމޫނާ މަސައްކަތްތަކެއް ކުރައްވާފަ އެވެ.
އިގްތިސާދީ އަދި އިޖުތިމާއީ ދާއިރާއަށް މުހައްމަދު މޫސާ (އުއްޗު) ކުރެއްވި ހިދުމަތްތަކުގެ އަގުވަޒަންކޮށް، ދައުލަތުން ވަނީ އޭނާއަށް މި އިއްޒަތް އަރުވާފަ އެވެ. ވިޔަފާރިއާއި ދަނޑުވެރިކަމުގެ ދާއިރާއިން ރާއްޖެއަށް ގިނަ ފައިދާތަކެއް ހޯއްދަވައިދެއްވުމުގެ އިތުރުން، އަމިއްލަފުޅަށް އިސްނަންގަވައިގެން ހިންގަވާ އަލިފުޅު ތުއްތު ފައުންޑޭޝަން މެދުވެރިކޮށް، ތައުލީމީ އަދި އިޖުތިމާއީ ކަންކަމުގައި ދެއްވަމުން ގެންދަވާ ދީލަތި އެހީތެރިކަމަކީ ގައުމީ ފެންވަރުގައި ފާހަގަކޮށްލެވޭ ކަންކަމެވެ.
