އެމެރިކާއިން ސަޢޫދީ ޢަރަބިއްޔާއަށް ފޯރުކޮށްދޭން ނިންމާފައިވާ ސިވިލިއަން ނިއުކްލިއަރ އެގްރީމެންޓް ކުރިއަށްގެންދެވޭނީ ސަޢޫދީއިން އިޒްރޭލާއެކު އޮންނަ ގުޅުން އާންމުކޮށް ’އަބްރަހަމް އެކޯޑްސް‘ ގައި ބައިވެރިވެގެން ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ވައިޓް ހައުސްގައި ވާހަކަދައްކަމުން ޓްރަމްޕް ބުނީ، ސަޢޫދީއާއެކު ނިއުކްލިއަރ އެއްބަސްވުމެއްގައި ސޮއިކުރި ނަމަވެސް، އެ އެއްބަސްވުން ތަންފީޒުކުރެވޭނީ ސަޢޫދީން އިޒްރޭލު ބަލައިގަތުމުން ކަމަށެވެ. ”މިއީ އެކަން ކުރަންވީ ވަގުތު,“ ޓްރަމްޕް ބުންޏެވެ.
30 އަހަރަށް ދެމިގެންދާ މި އެއްބަސްވުމުގެ ދަށުން އެމެރިކާގެ ކުންފުނިތަކުން ސަޢޫދީގައި ނިއުކްލިއަރ ރިއެކްޓަރުތައް ބިނާކޮށްދިނުމަށް ވަނީ ހަމަޖެހިފައެވެ. ސަޢޫދީ ޢަރަބިއްޔާއިން އަދި މިކަމަށް ރަސްމީކޮށް ޖަވާބެއް ދީފައިނުވި ނަމަވެސް، ރިޔާޟުން މީގެ ކުރިން ބުނެފައިވަނީ އިޒްރޭލާއެކު ގުޅުން ޤާއިމުކުރެވޭނީ ފަލަސްޠީނުގެ މިނިވަން ދައުލަތެއް އުފެއްދުމުގެ ސާފު ހެއްކެއް ލިބިގެން ކަމަށެވެ.
ޢަރަބި ޤަައުމުތަކުގެ ބޮޑުބައެއް އިސްތިއުމާރީ ޔަހޫދީ ހަރުކަށި ދައުލަތް އިޒްރޭލާއެކު ރަސްމީކޮށް ސުލްޙަވެ، ބާކީ ތިބި ޤައުމުތައް ސަޢޫދީ ހިމެނޭހެން އިޒްރޭލާއެކު ސުލްޙަވުމަށް މަސައްކަތް ކުރަމުންދާއިރު ޣައްޒާގެ ނަސްލުހޭދުއާއި ވެސްޓުބޭންކުގައި ހިންގަމުންދާ ޖަރީމާތައް ދަނީ ކުރިއަށެވެ.
1947 ން ފަށައިގެން އިޒްރޭލުން ހިންގަމުންދާ ނަސްލުހޭދު ބަހައްޓާފައި، 2023 އޮކްޓޫބަރު މަހުން ފެށިގެން މިއަދާ ހަމައަށް އެކަނިވެސް އިޒްރޭލުން މުޅި ދުނިޔެ ކުރިމަތީ ޣައްޒާއަށް ދެމުންދާ ޙަމަލާތަކަކީ ބައިނަލްއަޤްވާމީ ކޯޓުތަކުންނާއި އދ. އިން ’ނަސްލުހޭދު‘ ގެ ގޮތުގައި ފާހަގަކޮށްފައިވާ އަމަލުތަކެކެވެ. މީގެ ތެރޭގައި އާންމުން ދިރިއުޅޭ ސަރަހައްދުތަކާއި، ހޮސްޕިޓަލްތައް ސުންނާފަތި ކުރުމާއި، ބަނޑަށް ޖެއްސުން ހިމެނެއެވެ. 45,000 އަށްވުރެ ގިނަ ފަލަސްޠީނުގެ މުސްލިމުން ޝަހީދުކޮށްލާފައިވާއިރު 10,000 އަށްވުރެ ގިނަ މީހުން ވަނީ ޢިމާރާތްތަކުގެ ދަށުގައިވެފައެވެ. 100,000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ. އަދި 1.9 މިލިއަން މީހުން (ޣައްޒާގެ އާބާދީގެ %85) ވަނީ ގެދޮރު ދޫކޮށް ދާން މަޖުބޫރުވެ ރެފިއުޖީންނަށް ހަދާފައެވެ. އަދި ވެސްޓު ބޭންކުގައި އިޒްރޭލު ސިފައިންގެ މަދަދާއެކު ހައްދުފަހަނައަޅާފައިވާ ވަޒަންވެރިން ދެމުންދާ ހަމަލާތަކުގައި 800 އަށްވުރެ ގިނަ ފަލަސްޠީނު މުސްލިމުން ވަނީ ޝަހީދުކޮށްލާފައެވެ.
