އިންޑިޔާގެ ޤައުމީ އިމްތިޙާނުތަކުގެ ޕޭޕަރު ލީކުވުމާ ގުޅިގެން ޒުވާނުން ކުރިއަށްގެންދާ މުޒާހަރާތަކުގައި، އިންޑިޔާގެ ފުލުހުން މުސްލިމު ދަރިވަރުންނަށާއި ޒުވާނުންނަށް ޚާއްޞަކޮށް އަމާޒުކޮށް އަނިޔާވެރި ފިޔަވަޅުތައް އަޅަމުންދާ ކަމުގެ ވަރުގަދަ ތުހުމަތުތަކެއް ފެންމަތިވެއްޖެއެވެ.
އަސާމްގައި 3 މުސްލިމު ދަރިވަރަކު ހައްޔަރުކުރުން
އަސާމްގެ ލަޚިމްޕޫރުގައި، ސުލްޙަވެރި މުޒާހަރާއެއް އިންތިޒާމުކުރުމަށް ވޯޓްސްއެޕް ގްރޫޕެއް ހެދި 3 މުސްލިމު ދަރިވަރަކު (މަންޖޫރު ރަޙްމާން، އަޝްރަފުލް އިސްލާމް، އަދި ޢަބްދުލް ޤާސިމް) ވަނީ ފުލުހުން ހައްޔަރުކޮށްފައެވެ. މި ދަރިވަރުންގެ މައްޗަށް އުފުލާފައިވަނީ ޤައުމީ ސަލާމަތަށް ނުރައްކާކުރި ކަމުގެ ’ބާރަތީޔަ ނިޔާޔަ ސަންހިތާ‘ (ބީއެންއެސް) ގެ 152 ވަނަ މާއްދާގެ ދަށުން ވަރުގަދަ ޖިނާއީ ދައުވާތަކެކެވެ.
ގުވާހާޓީގެ މުޒާހަރާއިން މުސްލިމު ޤާނޫނީ ވަކީލަކު ހައްޔަރުކޮށް ޖަލައްލުން
މުޒާހަރާގެ ބައިވެރިންނާ ދެކޮޅަށް ފިޔަވަޅު ނާޅާނެ ކަމަށާއި، މުޒާހަރާތަކާ ގުޅިގެން ހެދި މައްސަލަތައް އަނބުރާ ގެންދާނެ ކަމަށް ސަރުކާރުން އެއްބަސްވެފައިވަނިކޮށް ފުލުހުން ވަނީ މި ވަކީލު ސީދާ މުޒާހަރާ ކުރާ ސަރަހައްދުން ހައްޔަރުކޮށްފައެވެ. ވަކީލުގެ މައްޗަށް އުފުލާފައިވަނީ ބީއެންއެސް ގެ 152 ވަނަ މާއްދާގެ ދަށުން ޤައުމު އިސްތިޤްލާލާއި ސިޔާދަތަށް ނުރައްކާކުރި ކަމުގެ ދަޢުވާއެވެ.
ވަކީލުން ބުނާގޮތުގައި ސުލްޙަވެރި މުޒާހަރާއެއްގައި ޤާނޫނީ އެހީތެރިކަން ފޯރުކޮށްދޭން ހުރި ވަކީލަކު ހައްޔަރުކޮށް، މިފަދަ ބުރަ ދަޢުވާއެއް ކުރުމަކީ ޚިޔާލުފާޅުކުރުމުގެ މިނިވަންކަމާއި ވަކީލުންގެ މަސައްކަތަށް ހުރަސްއެޅުމުގެ ގޮތުން ކުރެވުނު ކަމެކެވެ.
ޖަންތަރު މަންތަރުގެ ވޮލަންޓިއަރެއްގެ އާއިލާއަށް ބިރުދެއްކުން
ދިއްލީގެ ޖަންތަރު މަންތަރުގައި މުޒާހަރާކުރާ ދަރިވަރުންނަށް ހިލޭ ކޭންބުއިމާއި ފެން ފޯރުކޮށްދެމުންދިޔަ މުޙައްމަދު ޖުނައިދު ނަމަކަށް ކިޔާ މުސްލިމު ޒުވާނެއްގެ ގެއަށް އުއްތަރު ޕްރަދޭޝް ފުލުހުން ވަދެގަނެ، އޭނާގެ ބައްޕަ ހައްޔަރުކޮށް، އާއިލާގެ ބޭންކު ފާސްފޮތްތަކާއި، އައިޑީ ކާޑުތައް ވަނީ އަތުލައިގަނެފައެވެ. މީގެ އިތުރުން ފުލުހުން ވަނީ ޖުނައިދު މުޒާހަރާއިން ދުރުކުރުމަށް އާއިލާއަށް މަޖުބޫރުކޮށްފައެވެ.
އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ބުނާގޮތުގައި، މުޅި އިންޑިޔާގައި އެތައް މިލިއަން ދަރިވަރުންނެއް އިހުތިޖާޖު ކުރަމުންދާއިރު، މުސްލިމު ޒުވާނުންނަށް އެކަނި އަމާޒުކޮށް މިފަދަ ބުރަ ދައުވާތައް އުފުލުމަކީ ޤައުމުގައި އޮތް ތަފާތުކުރުން ހާމަކޮށްދޭ ކަމެކެވެ.
