މި މަހުގެ ފުރަތަމަ ހަތަރު ދުވަހު ޑެންގޫ ޖެހިގެން 40 މީހުން އަދި ޗިކުންގުންޔާ ޖެހިގެން 58 މީހުން ރިޕޯޓުކޮށްފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ބުނީ މިދިޔަ ޖެނުއަރީ މަހުން ފެށިގެން މިދިޔަ ހޮނިހިރު ދުވަހާ ހަމައަށް ޑެންގޫ ޖެހިގެން 660 މީހަކު ރިޕޯޓުކޮށްފައިވާ ކަމަށެވެ.
އެންމެ ގިނަ މީހުންނަށް ބަލި ޖެހުނީ މިދިޔަ މަހުގެ ތެރޭގައި ކަމަށާއި އެ މަހު 239 މީހަކަށް ޑެންގޫ ޖެހިފައިވާ ކަމަށް އެޗްޕީއޭއިން ބުނެއެވެ. އެޕްރީލް މަހުގެ އެއްވަނަ ދުވަހުން ފެށިގެން މިދިޔަ ހޮނިހިރު ދުވަހަށް ޑެންގޫ ޖެހިގެން އެންމެ ގިނަ މީހުން ރިޕޯޓުކޮށްފައި ވަނީ ހުޅުމާލެއިންނެވެ. އެ މުއްދަތުގައި ހުޅުމާލެއިން 142 މީހުން އަދި މާލެއިން 47 މީހަކު ބަލިވެގެން ޑޮކްޓަރަށް ވަނީ ދައްކާފައެވެ. ތިން ވަނައަށް އެންމެ ގިނަ މީހުންނަށް ހުން ޖެހުނު ކ. އަތޮޅުން 32 މީހުން ޑޮކްޓަރަށް ދައްކާފައިވެއެވެ.
އެޗްޕީއޭއިން ބުނެފައި ވަނީ ޗިކުންގުންޔާ ޖެހިގެން ހޮނިހިރު ދުވަހާ ހަމައަށް 240 މީހުން ރިޕޯޓުކޮށްފައިވާ ކަމަށެވެ. އޭގެ ތެރެއިން އެންމެ ގިނަ މީހުން ރިޕޯޓުކުރީ މިދިޔަ މަހުގެ 28 ވަނަ ދުވަހުން ފެށިގެން މިދިޔަ ހޮނިހިރު ދުވަހާ ހަމައަށެވެ.
އެ މުއްދަތުގައި ޗިކުންގުންޔާގެ 117 ކޭސް ރިޕޯޓުކޮށްގައިވާއިރު، މި މަހުގެ ފުރަތަމަ ހަތަރު ދުވަހު 58 މީހުންނަށް ބަލި ޖެހިގެން ވަނީ ރިޕޯޓުކޮށްފައެވެ.
ޗިކުންގުންޔާ ޖެހިގެން އެންމެ ގިނަ މީހުން ދައްކާފައި ވަނީ މާލެއިންނެވެ. މާލެއިން 193 ކޭސް ރިޕޯޓުކުރިއިރު، ހުޅުމާލެއިން 40 ކޭސް ވަނީ ރިޕޯޓުކޮށްފައެވެ.
ޗިކުންގުންޔާއިން ރައްކާތެރިވާން އެޅިދާނެ ފިޔަވަޅުތައް:
- މަދިރި އާލާވާ ތަންތަނާއި ތަކެތި ނައްތާލުން
- މަދިރި ހެފުމުން ރައްކާތެރިވާން މަދިރި ލޯޝަން/ސްޕްރޭ ބޭނުންކުރުން
- ވީހާވެސް ބޮޑަށް ހަށިގަނޑު ނިވާވާ ގޮތަށް އަންނައުނުލުން
- މަދިރި ގިނަވާ ވަގުތު ދޮރާއި ކުޑަދޮރު ލައްވާފައި ބެހެއްޓުން
ޑެންގޫއިން ރައްކާތެރިވާން ކުރެވިދާނެ ކަންކަން:
- ވައި ވައްދަން ހަދާފައި ހުންނަ ގޮޅި، ފެންލައިޓު، ކުޑަދޮރު ފަދަ ތަންތަނުގައި މަދިރި ދާ ޖެހުން
- މަދިރި ހެފިޔަ ނުދިނުމަށްޓަކައި ހަށިގަނޑު ބޮޑަށް ނިވާވާނެ ކަހަލަ ހެދުން ލުން
- މަދިރި ހެފުމުން ރައްކާތެރިވާން މަދިރި ލޯޝަން/ސްޕްރޭ ބޭނުން ކުރުން
- މަދިރި އާލާވާ ގޮތަށް ފެން ހަރުލާފައި ހުންނަ ތަންތަން ނައްތާލުން
