މަސްވެރިކަމުގެ ސިނާއަތަށް ކުރިމަތިވެފައިވާ ހީނަރުކަމުން އަރައިގަތުމަށާއި، ދައުލަތުގެ ކުންފުނިތަކުގެ ޚަރަދުތައް ކުޑަކޮށް އިގުތިސާދު ހަރުދަނާކުރުމަށް ސަރުކާރުން މުހިންމު ފިޔަވަޅުތަކެއް އަޅަން ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ”ދަ ޕަލްސް“ ޕޮޑްކާސްޓް ސިލްސިލާގެ 5 ވަނަ އެޕިސޯޑްގައި ވާހަކަފުޅުދައްކަވަމުންނެވެ.
މިދިޔަ ސަރުކާރުގައި ދައުލަތުގެ ކުންފުނިތަކަށް ގިނަ އަދަދެއްގެ ޒުވާނުން ވަޒީފާއަށް ނެގުމުގެ ސަބަބުން މަސްވެރިކަން ފަދަ އުފެއްދުންތެރި ދާއިރާތަކުން ޒުވާނުން ދުރުވެފައިވާކަން ފާހަގަކުރައްވައި، ރައީސް މުއިއްޒު ވިދާޅުވީ ދައުލަތުގެ ކުންފުނިތައް ރައިޓް ސައިޒްކޮށް، ޒުވާނުން ޕްރައިވެޓް ސެކްޓަރާ ގުޅިގެން މަސައްކަތްކުރާނެ މަގު ފަހިކޮށްދެއްވާނެ ކަމަށެވެ.
އިގުތިސާދީ އިސްލާހީ މި އެޖެންޑާގެ ދަށުން އެންމެ ބޮޑު އިސްކަމެއް ދެނީ ޕްރައިވެޓް ސެކްޓަރަށް އިންސެންޓިވްތައް ދީގެން ވިޔަފާރިތައް ފުޅާކުރުމަށް ކަމަށް އެ މަނިކުފާނު ވިދާޅުވިއެވެ.
ޚާއްސަކޮށް، ރީޓެއިލް އަދި ސާވިސް ދާއިރާތަކުގައި މިހާރު ބޭރު މީހުން އަދާކުރަމުންދާ ވަޒީފާތަކަށް ދިވެހި ޒުވާނުން ނެރުމަކީ ސަރުކާރުގެ މައިގަނޑު އަމާޒެެއް ކަމަށް ވިދާޅުވިއެވެ
.“މިސާލަކަށް ކޭޝިއަރުން. ކޭޝިއަރުންނަކީ ވަރަށް ކުޑަކުޑަ މުސާރައެއް ލިބޭ ބައެއް. ބޭރު މީހުން ގިނައިން މި ގެންގުޅެނީ. ސަރުކާރުން ނިންމާފައި މިވަނީ އެކަމުގައިވެސް ޕްރައިވެޓް ސެކްޓާއާއެކުގައި މަސައްކަތްކޮށްގެން އެއީ ދިވެހިންނަށް ހާއްސަ ވަޒީފާއެއްގެ ގޮތުގައި ހަމަޖައްސަން. އެކަން ކުރެވޭނީ އިންސެންޓިވްތަކެއް ހަމަޖައްސައިގެން ކަމަށް އަޅުގަނޑު ގަބޫލުކުރަނީ
ޒުވާނުންނަށް އަމިއްލަ ވިޔަފާރިތައް ފެށުމަށް ފަހިކޮށްދިނުމުގެ ގޮތުން، ތާރީހީ ލުއި ލޯނު ސްކީމުތަކެއް މިހާރު ތައާރަފްކޮށްފައިވާ ކަމަށް ރައީސް ވިދާޅުވިއެވެ.
މި ލޯނުތަކުގެ ސަބަބުން ޒުވާން ވިޔަފާރިވެރިންނަށް އެމީހުންގެ މަސައްކަތްތައް ފުޅާކުރުމުގެ ފުރުސަތު ލިބި، އިގުތިސާދުގެ ތެރޭގައި އަމިއްލަ ފައިމައްޗަށް ތެދުވުމަށް މަގުފަހިވެގެންދާނެ ކަމަށާއި ކުރިއަށް އޮތް ދެތިން މަސް ދުވަހުގެ ތެރޭގައި އުފެއްދުންތެރިކަން އިތުރުކުރުމުގެ ހާއްސަ ޕްރޮގްރާމްތަކެއް ފެށުމަށް ރާވާފައިވާއިރު، ސަރުކާރުގެ އަމާޒަކީ ޕްރައިވެޓް ސެކްޓަރު ވަރުގަދަކޮށް، ޒުވާނުންނަށް ދެމެހެއްޓެނިވި ގޮތެއްގައި އާމްދަނީ ހޯދޭނެ ފުރުސަތުތައް ފަހިކޮށްދިނުން ކަމަށް އެ މަނިކުފާނު ވިދާޅުވިއެވެ.
